လားရှိုးမြို့ရပ်ကွက်(၅)နယ်မြေအနီး အထက်မန်အိုင်ကျေးရွာတွင် စီးပွားဖြစ်လုပ်ကိုင်နေသော ရွာလယ်မှကြက်ခြံ၏ စွန့်ပစ်အညစ်အကြေးများကြောင့် စိတ်အနှောင့်အယှက် ဖြစ်သည့်အပြင် ရွာ၏ပတ်ဝန်းကျင်နှင့် ကျန်းမာရေးကိုပါ ထိခိုက်နေသောကြောင့် မနက်ဖြန်၌ပင် ပြောင်းရွှေ့ပေးစေလိုကြောင်း ရွာသားများက ပြောကြသည်။
စီးပွားဖြစ် လုပ်ကိုင်နေသော ရွာအလယ်ကြက်ခြံတွင် ဥစားကြက် အကောင်ရေ တစ်သောင်းကျော်အထိရှိကြောင်း၊ ၎င်းကြက်ခြံမှ ကြက်ချေးများကို ရွာအလယ် လမ်းနဘေး၌ စုပုံပစ်ထားသည်မှာ ယင်ကောင်များ ပြည့်နေပြီး အနံ့အသက်ဆိုးများ ထွက်နေ၍ ရွာ၏ကျန်းမာရေးကို ထိခိုက်စေသောကြောင့် ယင်းလုပ်ရပ်အပေါ် ရွာသားများက ကျေနပ်မမှုရှိဖြစ်နေကြာင်း ရွာသားအများစုက ပြောနေကြခြင်းဖြစ်သည်။ “ကျွန်တော်တို့ အရင်သုံးလထဲက လားရှိုးခရိုင် အုပ်ချုပ်ရေးရုံးနဲ့ စည်ပင်ဌာနကို လက်မှတ်ထိုး တိုင်စာပို့ထားပြီးပါပြီ။ ဘာမှထူးခြားမှု မရှိဘူး။
ရွာအုပ်ချုပ်ရေးမှုးကိုပြောလဲ ဘာမှမလုပ်ပေးဘူး” ဟု ရွာခံဦးစံလှက ပြောကြားသည်။ ၎င်းကြက်ခြံပိုင်ရှင်မှာ တရုတ်လူမျိုးဦးလှတင်ဖြစ်ပြီး လားရှိးမြို့ ရပ်ကွက်(၂)တွင် နေထိုင်ကာ မန်အိုင်ရွာ၌ စီးပွားဖြစ်ကြက်ခြံလုပ်ငန်း လုပ်နေသူဖြစ်ကြောင်း၊ ရွာ၏အုပ်ချုပ်ရေးမှုးနှင့် နားလည်မှုယူ၍လုပ်နေကြောင်း ရွာသားများ ဆိုကြသည်။ “တစ်နေ့ထက်တစ်နေ့ ကြက်ချေးအနံ့က ပိုဆိုးလာပါတယ်။ ထမင်းစားလို့တောင် မရဘူး။ ရွာထိပ်ကဆရာတော် ဘုန်းကြီးတွေကို ဆွမ်းစားဖိတ်တဲ့အခါ အားနာစရာဖြစ်မိတယ်”ဟု ဦးသန်းလှိုင်ကလည်း ပြောကြားသည်။ ၎င်းနှင့်ပတ်သက်၍ ရွာရှိတောင်ပေါ် လွယ်ဝိန်းကျောင်းတိုက် ဆရာတော် ဦးကုသလက “ဘုန်းကြီးတို့ကအများ ဒုက္ခရောက်မှာ မလိုချင်ပါဘူး။
ပွင့်လင်းရာသီဆိုတော့ ကြက်ချေး အညစ်အကြေးတွေကြောင့် ရွာသားတွေအတွက် ၀မ်းပျက်ဝမ်းလျောဖြစ်မှာ စိုးမိပါတယ်” ဟု ဆရာတော်က မိန့်ကြားသည်။ ယင်းကိစ္စအား လားရှိုးမြို့ အထက်မန်အိုင်ရွာအလယ်မှ အုပ်ချုပ်ရေးမှူးက အဆိုပါကြက်ခြံအား အများဆန္ဒအရ ပြောင်းရွှေ့ပေးရန် ယနေ့ည၌ပင် ကြက်ခြံပိုင်ရှင်အား ဦးလှတင်ကြက်ခြံအား သွားရောက်၍ ပြောကြားမည်ဖြစ်ကြောင်း သိရသည်။
ထွန်းထွန်း
မြန်မာ့ခေတ်
