ဝန်ထမ်းအင်အားခြောက်ဆတိုးမည် FDA ကို ဦးစီးဌာနအဖြစ် တိုးချဲ့ဖွဲ့စည်းမည်

နယ်စပ်ကုန်သွယ်ရေးစခန်းများ၊ တိုင်းဒေသကြီးနှင့် ပြည်နယ်များတွင် အစားအသောက်နှင့် ဆေးဝါးကွပ်ကဲရေးစခန်းများ တိုးချဲ့ဖွင့်လှစ်သွားမည်ဖြစ်ကြောင်း နေပြည်တော်ရှိ အစားအသောက်နှင့် ဆေးဝါးကွပ်ကဲရေးဌာန FDA မှ တာဝန်ရှိသူက ပြောသည်။

FDA သည် အဆိုပါစခန်းများ တိုးချဲ့ရေးအတွက် ၀န်ထမ်းအင်အားကို ခြောက်ဆခန့်တိုးမြှင့်ခန့် ထားရန် စီစဉ်နေကြောင်းလည်း ၎င်းကပြောသည်။ လက်ရှိ ဖွဲ့စည်းပုံအရ FDA တွင် ၀န်ထမ်းအင်အား ၁၁၄ ဦးခန့်ထားရာမှ အရာထမ်း ၁၅၀ နှင့် အမှုထမ်း ၅၁၅ ဦးတို့ အပါအ၀င် ၀န်ထမ်းအင်အား ၆၆၅ ဦးအထိ ပါဝင် သည့်ဖွဲ့စည်းပုံသို့ အသစ်တိုးချဲ့ ဖွဲ့စည်းမည်ဖြစ်ကြောင်း ၎င်းကပြောကြားသည်။

FDA သည် လက်ရှိအချိန်တွင် နေပြည်တော်၊ ရန်ကုန်နှင့် မန္တလေးမြို့များတွင် အစားအသောက်နှင့် ဆေးဝါးကွပ်ကဲရေးဌာနများ ဖွင့်လှစ်ထားပြီး ၀န်ထမ်းအင်အားတိုးချဲ့ ပြီးပါက အခြားတိုင်းဒေသကြီးနှင့် ပြည်နယ်များတွင်လည်း ဌာနခွဲများ တိုးချဲ့ဖွင့်လှစ်သွားမည်ဖြစ်ကြောင်း အဆိုပါ တာဝန်ရှိသူကပြောသည်။

ပြီးခဲ့သည့်နှစ် စက်တင်ဘာလမှစတင်ပြီး နယ်စပ်ကုန်သွယ်ရေးစခန်းနှစ်ခုဖြစ်သည့် မြ၀တီနှင့် မူဆယ်တို့တွင် ဖွင့်လှစ်ထားသည့် အစားအသောက်နှင့်ဆေးဝါးကွပ်ကဲ ရေးရုံးခွဲများကဲ့သို့သော ရုံးခွဲများကို လည်း အခြားနယ်စပ်ကုန်သွယ်ရေးစခန်းများတွင် ဖွင့်လှစ်မည်ဟုလည်း အဆိုပါတာဝန်ရှိသူကပြောသည်။

“ဆေးဝါးအတုဝင်တာကတော့ တရုတ်နဲ့အိန္ဒိယ အများဆုံးပဲ။ ပုံမှန်လမ်းကြောင်းက စစ်ပေမယ့် မှောင်ခိုလမ်းကြောင်းဘက်ကလည်း အတုတွေ ၀င်နိုင်တယ်။ ဆေးဝါးအတုအပြင် အရည်အသွေးလျှော့ပြီး သွင်းနေတာတွေလည်း စစ်ဆေးဖို့ အရေးကြီးတယ်”ဟု မင်္ဂလာဈေးမှ ဆေးကုန်သည်တစ်ဦးက ပြောသည်။
 7Day News Journal