လူသတ်မှုအတွက် ပုဒ်မ-၃၀၂ နှင့် အပြင်းအထန်ထိခိုက် နာကျင်စေမှုအတွက် ပုဒ်မ-၃၂၅ ဖြင့် အမှုဖွင့်ထားပြီဖြစ်၍ အရပ်ဘက်သို့ ပြန်လည်လွှဲပြောင်းစေပြီး တရားစွဲ ပေးမည်ဖြစ်ကြောင်း၎င်းက ဆက်လက်ပြောကြားသည်။ “ညတွင်းချင်းပဲ တပ်ရင်းက ဗိုလ်ကြီးမင်းသူအောင်ဆီ လွှဲပေးလိုက်တယ်။ အခု တပ်အချုပ်ထဲမှာ” ဟု ၎င်းကဆိုသည်။
ဧပြီလ ၂၃ ရက်နေ့ ည ၉ နာရီခန့်က နဝဒေးတံတားအနီး ဧရာဝတီမြစ် သောင်ပြင်တွင် ချိန်းတွေ့နေသည့် သမီးရည်းစားနှစ်ဦးကို (ခ.လ.ရ ၇၅) တပ်ရင်းမှ သန်းထိုက်အောင်၊ ရဲကိုဦးနှင့် စိစစ်ဆဲတစ်ဦး တို့က ငွေနှင့်လက်စွပ်ကို လုယက်ကာ အမျိုးသားကို သတ်ခဲ့သည့်အမှု ဖြစ်ပွားခဲ့ကြောင်း အမှတ်(၂)ရဲစခန်းထံက စုံစမ်း သိရှိရသည်။
အပေါ်ပိုင်း အဝတ်ဗလာကျင်းထားသူ သုံးဦးက မီးခြစ်လာတောင်းသဖြင့် မရှိကြောင်း ပြန်လည်ပြောဆိုစဉ် ရုတ်တရက် နောက်ကျောဘက်မှ သိုင်းဖက်ကာ မျက်နှာနှင့် ဦးခေါင်းကို ထိုးကြိတ်ပြီး လုယက်ခြင်းဖြစ်ကြောင်း လုယက်ခံရပြီး အသက်မသေဘဲ ကျန်ရစ်ခဲ့သူ အသက်၂၇နှစ်ရှိ မအိဇင်မိုးကိုက ရှင်းပြသည်။
“နှစ်ယောက်လုံးကို လည်ပင်းညှစ်တယ်၊ ပါးစပ်ကိုလည်း ဆွဲဖြဲထားတယ်။ သမီးက အသက်မရှုဘဲ သေချင်ယောင် ဆောင်လိုက်တယ်၊ သေပြီထင်ပြီး ပစ်ထားတော့မှ အနီးဆုံးမှာရှိတဲ့ View Point က ဆိုင်ကယ်အပ်ဆိုင်က တစ်ဆင့် ရပ်ကွက်ကို အကူအညီ တောင်းတာပါ” ဟု ပြည်မြို့ ပြည်သူ့ဆေးရုံကြီး ခွဲစိတ်ဆောင်တွင် တက်ရောက် ကုသနေသည့် ၎င်းကဆိုသည်။
သွေးထွက်ဒဏ်ရာများနှင့် အမျိုးသမီးငယ် တစ်ဦး၏ ငိုယိုအကူအညီ တောင်းမှုကြောင့် ဒဏ်ရာရရှိသူ မိန်းကလေးနှင့် လည်ပင်းနှင့် မျက်နှာတို့တွင် အညိုအမည်းဒဏ်ရာများနှင့် သေဆုံးနေသော ကိုဇော်မင်းဦးကို ဆေးရုံသို့ ပို့ပေးခဲ့ကြောင်း ဆင်စုရပ်ကွက် ဒေသခံများက ပြောကြားသည်။ “လုယက်သူတွေကို ဝိုင်းဝန်းရှာကြတာ ကိုင်းတောထဲက တက်လာတဲ့ ကျုးလွန်တယ်လို့ ယူဆရတဲ့ နှစ်ယောက်ကို ဖမ်းမိတယ်။ သူတို့ကို အမှတ်-၂ ရဲစခန်းကို ဆက်သွယ်ပြီး အပ်လိုက်တယ်” ဟု လုယက်သူများကို ဝိုင်းဝန်းဖမ်းဆီးရာတွင် ပါဝင်သူ ဆင်စု ရပ်ကွက်နေ ဒေသခံတဦးက ပြောသည်။
ယင်းဖြစ်စဉ်နှင့် ပတ်သက်၍ ပြည် အမှတ် (၂) ရဲတပ်ဖွဲ့စခန်းက ပ/၂၉၄/ ၂၀၁၃၊ လူသတ်မှုအတွက် ပုဒ်မ ၃၀၂ နှင့် အပြင်းအထန် ထိခိုက်နာကျင်စေမှု အတွက် ပုဒ်မ-၃၂၅ ဖြင့် အမှုဖွင့်ထားကြောင်း ယင်းရဲတပ်ဖွဲ့စခန်းမှ စုံစမ်း သိရှိရသည်။
ပြည်မြို့တွင် သုံးရက်အတွင်း ပစ္စည်းယူ လူသတ်မှု နှစ်ကြိမ်ဖြစ်ပွား ခဲ့ပြီး နှစ်ကြိမ် စလုံးတွင် အသတ်ခံရသူ များသည် အခင်း ဖြစ်ပွားရာနေရာတွင် ပွဲချင်းပြီး သေဆုံးခဲ့သည်။
The Voice Weekly
