ဆားလင်းကြီး၊ ဧပြီ ၂၅။
စစ်ကိုင်းတိုင်း ဆားလင်းကြီးမြို့နယ် လက်ပံတောင်းတောင်ဒေသ၌ ယနေ့ ဧပြီလ ၂၅ ရက် နံနက် ၉
နာရီခန့်တွင် လက်ပံတောင်းတောင် ဒေသခံပြည်သူများနှင့် လုံထိန်းများကြား ပဋိပက္ခဖြစ်ပွားခဲ့မှုကြောင့်
တုံရွာသားတစ်ဦး သေနတ်ဒဏ်ရာ ရရှိ၍ လူ ၁၀ ဦးကျော် ဒဏ်ရာရရှိခဲ့ ကြောင်း သိရသည်။
ဖြစ်စဉ်မှာ ဆားလင်းကြီးမြို့နယ်နေ လက်ပံတောင်းတောင်ဒေသရှိ ဆည်တည်းကျေးရွာနေ မရီရီဝင်းပိုင်
မြေကွက်၌ လယ်သမားများ ထွန်ယက်နေစဉ် လယ်သမားများကို လက်ပန်းတောင်းတောင်ကြေးနီစီမံကိန်းအနီး ပုဒ်မ ၁၄၄ ထုတ်ပြန်ထားသည့် နေရာဖြစ်သည့်အတွက် လယ်မထွန်ရဟုဆိုကာ လုံထိန်းအင်အား ၅၀၀ ခန့်က ဝင်ရောက် ရိုက်နှက်ခဲ့ကြောင်း၊ ယင်းနောက် ရန်ကုန် ပြည်သူ့အကျိုးဆောင်ကွန်ရက်မှ ကိုအောင်စိုး ရွာသားနှစ်ဦးကို ဖမ်းဆီးသွားကြောင်း လက်ပံတောင်းအရေး တက်ကြွလှုပ်ရှားသူ ကိုဟန်ဝင်းအောင်ထံမှ သိရသည်။
ကိုဟန်ဝင်းအောင်က “ဒီနေ့ မနက် ၉နာရီလောက်မှာ လုံထိန်းအင်အား ၅၀၀လောက် ကားတွေနဲ့ ရောက်လာတယ်၊ ဒီနေရာမှာ မထွန်ပါနဲ့ ပုဒ်မ ၁၄၄ ထုတ်ထားတယ်တဲ့၊ မရီရီဝင်းတို့က ဒီနေရာ ကျွန်မတို့မြေ ကိုယ့်မြေကိုယ် ထွန်တာပဲ မဖယ်ပေးနိုင်ဘူးတဲ့၊ ရဲတွေက မြေထဲကို ပြေးဆင်းလာပြီးတော့တုတ်တွေဒိုင်းတွေနဲ့ ဝင်ရိုက်တယ်၊ အဲဒီမှာ စပြီး ရန်ကုန်ပြည်သူ့အကျိုးဆောင် ကွန်ယက်က သတင်းမှတ်တမ်းသမား ကိုသူ အရိုက်ခံလိုက်ရတယ်၊ လဲကျသွားတော့ စစ်ဖိနပ်နဲ့ကန်တယ်၊ သေနတ်ဒင်နဲ့ ထုတယ်၊ ကင်မရာကို ရိုက်ခွဲလိုက်တယ်၊ ကိုအောင်စိုးတို့က ဝင်ထိန်းတဲ့အခါမှာလည်း ရိုက်ပြီးတော့ ဖမ်းသွားတယ်၊ လယ်သမားတွေက မခံနိုင်တဲ့အခါမှာ ဝိုင်းအော်တော့ ထပ်ရိုက်ပြီး ထပ်ဖမ်းတယ်၊ အခုစာရင်းကောက်တာ သုံးယောက်လောက် အဖမ်းခံရတယ်” ဟု ပြောကြားသည်။
အဖမ်းခံရသည်ဟု အခြားရွာများက ကြားသည့်အခါ မရီရီဝင်းကို ပြန်လွှတ်ပေးရန် သွားပြောကြကြောင်း၊
မနက် ၁၀နာရီခန့်တွင် လုံထိန်း များက သေနတ်နဲ့စပစ်ကြောင်း ဟု မျက်မြင်တွေ့ရှိသူ ဆည်တည်းကျေးရွာနေ မဝင်းဝင်းဌေးက ပြောကြားသည်။
“သေနတ်နဲ့ ပစ်တော့ တုံရွာက ကိုတင့်ဇော်က လက်မောင်းနဲ့ ၀မ်းဗိုက်ကို ရှပ်ထိသွားတယ်၊ ၁၂ချက်
၁၃ချက်လောက်ပစ်တော့ ရွာသားတွေလည်း မခံနိုင်တော့ဘူး။ အကုန် ပြန်ဆုတ်လာကြရတယ်” ဟု ယင်းက ဆိုသည်။
ယင်းအပြင် မိုးကြိုးပြင်ရွာနေ ကိုဝင်းကျော် ပိုင်မြေကွက်တွင် လုပ်ကိုင်နေသော လယ်သမားများအား
ရဲများက ဝင်ရောက်ရိုက်နှက်ခဲ့ပြီး မြန်မာနိုင်ငံ ဝိဇ္ဇာသိပ္ပံ တက္ကသိုလ် ကျောင်းသားများ ကွန်ရက်တာဝန်ခံ
ကိုသောင်းထိုက်အား ဖမ်းဆီးရန် ကြိုးစားခဲ့ကြောင်း၊ လယ်သမားများက ပြန်လည်လုယူ၍သာ လွတ်မြောက်
ခဲ့ရခြင်း ဖြစ်ကြောင်း၊ ကိုအောင်စိုးနှင့်အတူ ကိုစိုးသူ၊ ကိုမောင်ဆန်း တို့ စုစုပေါင်း ၃ ယောက် အဖမ်းခံရပြီး အခြေအနေမှာ တည်ငြိမ်မှုမရှိသေးကြောင်း သိရသည်။
ယင်းကဲ့သို့  မဖြစ်ပွားမီ ရက်ပိုင်းခန့်ကတည်းက လုံထိန်းများနှင့် ရွာသားများကြား တင်းမာမှုများ ရှိခဲ့ကြကြောင်း၊ ယခုအခါ သေနတ်ဒဏ်ရာ ရရှိသူကို မုံရွာပြည်သူ့ဆေးရုံကြီး ကို ဆေးကုသမှု ခံယူနေပြီး ဆေးရုံအုပ်ကြီးက သေနတ် ဒဏ်ရာရရှိသည်မှာ မှန်ကန်သည်ဟု အတည်ပြု ပြောကြားခဲ့ကြောင်း ကိုဟန်ဝင်းအောင်ကပြောကြားသည်။
၂၀၁၂ ခုနှစ် နိုဝင်ဘာလ ၂၉ ရက်နေ့ နံနက် ၃ နာရီခန့်တွင် လုံခြုံရေးတပ်ဖွဲ့ဝင်များက သပိတ်စခန်းများ၏ သပိတ်မှောက် ဆန္ဒပြမှုကို အကြမ်း ဖက်ဖြိုခွဲခဲ့မှုကြောင့် ရဟန်းသံဃာများနှင့် ဒေသခံပြည်သူများ မီးလောင်ဒဏ်ရာ ရရှိခဲ့ကြပြီး ယခုအကြိမ် အကြမ်းဖက်ဖြိုခွဲမှုသည် လက်ပံ တောင်းတောင် ဒေသအတွက် ဒုတိယအကြိမ်မြောက် အကြမ်းဖက်မှုဖြစ်ကြောင်း သိရသည်။
ရည်မွန်
The Myanma Age
ဒေသခံပြည်သူများနှင့် လုံထိန်းများ၏ ပဋိပက္ခကြား တုံရွာသားတစ်ဦး ကျည်ဆန်ထိမှန်
Labels:
ပြည်တွင်းသတင်း