နေပြည်တော်၊ ဧပြီ ၁၁။
ယနေ့နံနက် (၁ဝ)နာရီခွဲခန့်က နေပြည်တော်၏ အနောက်တောင်ဘက်(၃၆)မိုင်ခန့် အကွာကိုဗဟိုပြု၍ အင်အား ရစ်(ခ်)တာစကေး (၅.၅) အဆင့်ရှိ အင်အားအသင့်အတင့် မြေငလျင်တစ်ခု လှုပ်ရှားသွားကြောင်း မိုးလေဝသနှင့် ဇလဗေဒ ညွှန်ကြားမှု ဦးစီးဌာန၏ ထုတ်ပြန်ချက်အရ သိရသည်။ နေပြည်တော်တွင် နေထိုင်သူ မစုလှိုင်ထွန်းက “အရင်တစ်ခါက လှုပ်သလောက်တော့ မသိသာပါဘူး၊ နည်းနည်း ဝေးလို့လည်း ထင်ပါတယ်”ဟု ပြောကြားသည်။
အင်အား ရစ်(ခ်)တာစကေး (၄.၇) အဆင့်ရှိ အင်အား အနည်းငယ်ရှိ မြေငလျင်တစ်ခုသည် ယနေ့နံနက် (၄)နာရီခွဲ အချိန်ခန့်က ကယားပြည်နယ်၊ ဘော်လခဲမြို့နယ် အနီး၌ လှုပ်ရှား ခဲ့ကြောင်းလည်း မိုးလေဝသနှင့် ဇလဗေဒက ဖော်ပြထားသည်။ ဘော်လခဲမြို့နယ်နှင့် မိုင် ၃၀ ခန့် ဝေးကွာသော ဒီမောဆိုမြို့တွင် နေထိုင်သူ မစိုးစိုးမြာက “အိမ်ခေါင်းမိုးတွေ အိမ်တွေကတော့ ယိုင်သွားယုံပဲ”ဟု ပြောကြားသည်။
ပြည်မြို့တွင် နေထိုင်သူ ကိုအောင်ဦးနိုင်က “မနက်အစောကြီး လှုပ်သွားတယ်ဆိုတာတော့ မသိလိုက်ပါဘူး၊ (၁၁)နာရီလောက်က လှုပ်တာကိုတော့သိတယ်၊ ရပ်ထားတဲ့ စက်ဘီးတွေ၊ အိမ်ပေါ်က တိုင်ကပ်နာရီတွေတော့ လှုပ်တယ်၊”ဟု ပြောကြားသည်။
နေပြည်တော်၊ တောင်ငူနှင့် ပြည်မြို့ အနီးတဝှိုက်တွင် ယခုလအတွင်း ငလျင်များ မကြာခဏ လှုပ်ရှားခဲ့ပြီး အမေရိကန်နှင့် ထိုင်းနိုင်ငံ မိုးလေ၀သဌာနမှ ဖော်ပြချက် များအရ မြန်မာနိုင်ငံတွင် ဧပြီလ(၁)ရက်နေ့မှ ယနေ့ချိန်အထိ အင်အားအနည်းငယ်နှင့် အတင့်အသင့်ရှိ ငလျင်လှုပ်ခတ်မှု အကြိမ် (၂ဝ)ထက်မနည်း ရှိသွားပြီ ဖြစ်ကြောင်း သိရသည်။ ထက်နောင်နောင်
မြန်မာ့ခေတ်
