ဘုရင့်နောင်ဈေး ကားဝင်ကြေးပြသနာ ယခုချိန်ထိ ပြေလည်မှုမရရှိသေး

Thursday, April 11, 2013
ရန်ကုန်၊ ဧပြီ ၁၁။
ဘုရင့်နောင်ဈေးဝင်းအတွင်း ဝင်ရောက်သောကားများကို ကားဝင်ကြေးကောက်ခံမှုများကို ဧပြီလ ၁ရက်နေ့မှ စတင်ကောက်ခံရာမှ ကားဝင် ကြေးကောက်ခံသော ကုမ္ပဏီနှင့် ဈေးသူဈေးသားများကြား မပြေလည်မှုများဖြစ်ပွားခဲ့ပြီး ညှိနှိုင်းမှုများ ပြုလုပ်သော်လည်း ယခုအချိန်အထိ ပြေလည်မှု မရရှိသေးပဲ မကျေနပ်မှုများသာ ထပ်မံဖြစ်ပွားလျက်ရှိကြောင်း ဘုရင့်နောင်ဈေးမှ ဆိုင်ရှင်တစ်ဦးဖြစ်သူ ကိုစိန်မြင့်၏ ပြောကြား ချက်အရ သိရသည်။

ဘုရင့်နောင်ဈေး ကားဝင်ကြေးကောက်ခံမှုအတွက် လေလံအောင်မြင်ထားသောကုမ္ပဏီမှ ဝင်ကြေးများကို ကားလေး ၃၀၀ကျပ်၊ ကားအလတ် ၁၀၀၀ကျပ်၊ ကားအကြီး ၃၀၀၀ကျပ်အဖြစ် ကားအရွယ်စားပေါ် မူတည်ပြီး ဈေးနှုန်းများ ပြောင်းလဲသတ်မှတ်ကာ ဧပြီလ ၁ရက်နေ့မှ စတင် ကောက်ခံခဲ့ကြောင်း၊ အဆိုပါဈေးနှုန်း ကို ဈေးသူဈေးသားများမှ လက်ခံနိုင်ခြင်း မရှိတဲ့အတွက် တင်ပြမှုများပြုလုပ်ရာ ကားလေး ၁၀၀ကျပ်၊ ကား အလတ် ၂၀၀ကျပ်၊ ကားအကြီး ၃၀၀ ကျပ်အဖြစ် သတ်မှတ်ပြီး ၀င်ကြေးကောက်ခံသည့်အပြင် ကားရပ်နားခအဖြစ် တစ်နာရီကို ကားအမျိုးအစားအလိုက် ကားဝင်ကြေးနှင့်ညီမျှသောနှုန်းထားကို ထပ်ဆောင်း ပေးဆောင်စေခြင်းကြောင့် ဈေးသူဈေးသားများမှာ မကျေနပ်မှုများ ပိုမို မြင့်တက်လျက်ရှိကြောင်း သိရသည်။

“အခုက ပိုဆိုးနေတယ်။ ကားတွေက ဈေးထဲမှာ တစ်နေကုန် ရပ်ထားကြတာ။ ကားကြီးတွေ ၀င်ကြေးက ၃၀၀ပေးရတယ်၊ ကားရပ်နားခ ဆိုပြီး တစ်နာရီ ၃၀၀ ထပ်ဆောင်းပေးရတယ်။ အရင်သတ်မှတ်တဲ့ဈေးနဲ့ ဘာမှ မကွာဘူး၊ တစ်နေ့ကို ကားပါကင်ကြေးပဲ မနည်းဘူးပေးနေရတာ” ဟု ဘုရင့်နောင်ဈေးမှ ဆိုင်ခန်းပိုင်ရှင် ဦးစိန်မြင့်က ပြောကြားသည်။

အဆိုပါကိစ္စရပ်နှင့်စပ်လျဉ်းပြီး ဈေးမိဈေးဖများနှင့် လေလံအောင်မြင်သော ကုမ္ပဏီတို့ ဧပြီလ ၁၀ရက်တွင် တွေ့ဆုံဆွေးနွေးမှုများ ပြုလုပ်ခဲ့ ကြောင်း၊ အဆိုပါတွေ့ဆုံမှုတွင် ဈေးအတွင်းမှ ဆိုင်ခန်းများမှ ကားများအတွက် ကားဝင်ကြေးလစဉ်ပေးကတ်များပြုလုပ်ပေးမည် ဖြစ်ကြောင်း၊ သို့သော် ဈေးသို့လာရောက်ဝယ်ယူသူများကိုမူ သတ်မှတ်ထားသည့်အတိုင်း ကားဝင်ကြေးနှင့် နာရီအလိုက် ကားရပ်နားခ ကောက်ခံမှုပြုလုပ် မည် ဖြစ်ကြောင်း လေလံအောင်မြင်သော ကုမ္ပဏီဘက်မှပြောကြားရာ ဈေးမိဈေးများဘက်မှ လက်မခံနိုင်ကြောင်း ပြောကြားခဲ့ကြောင်း၊ အဆို ပါကိစ္စရပ်ကို ထပ်မံဆွေးနွေးရန် ဧပြီလ ၂၂ ရက်နေ့တွင် ချိန်းဆိုလိုက်ကြောင်း သိရသည်။

“လစဉ်ကြေး ကဒ်ပေးမယ် ပြောတယ်။ ဘယ်လောက် သတ်မှတ်တယ်ဆိုတာလည်း မပြောဘူး။ ဈေးသူဈေးသားကို တစ်မျိုး ဈေးလာဝယ် တဲ့လူတွေကို တစ်မျိုးကောက်ခံမယ် ဆိုတာကို လက်မခံနိုင်ဘူး။ ဈေးဝယ်သူတွေဘက်က ကြည့်ရင်လည်း ကားရပ်ခ အများကြီးပေးရမှာ ဈေးဝယ် တဲ့ သူတွေ အဆင်ပြေမှ ကျွန်တော်တို့လည်းဈေးရောင်းကောင်းမှာ။ အခုတောင်ဈေးက ရောင်းအားအရမ်းကျနေတာ။ ဒီလိုကောက်လို့ ဈေးထဲ ဝယ်သူမရှိရင်ဘယ်လိုလုပ်မလဲ” ဟု ကိုစိန်မြင့်က ပြောကြားသည်။

ဘုရင့်နောင်ဈေးတွင် ဆိုင်ခန်းပေါင်း နှစ်ထောင့်ငါးရာကျော်ရှိကြောင်း၊ ဘုရင့်နောင်ကားဝင်းအား လေလံအောင်သောကုမ္ပဏီမှာ တစ်နှစ်စာ ကျပ်သိန်းပေါင်း နှစ်ထောင့်ခုနှစ်ဆယ်ဖြင့် လေလံအောင်မြင်ခဲ့ခြင်း ဖြစ်ကြောင်း၊ ပြီးခဲ့သောနှစ်တွင် ဈေးသာယာရေးမှ ကျပ်သိန်းပေါင်း တစ်ထောင့်ခုနှစ်ရာကျော်ဖြင့် လေလံအောင်မြင်ခဲ့ကြောင်း ယခုနှစ်တွင် ဈေးသာယာရေးမှ လေလံအောင်မြင်ခြင်း မရှိဘဲ အဆိုပါကုမ္ပဏီ မှ လေလံ ကြေးမြင့်မားစွာဖြင့် အောင်မြင်ခဲ့သဖြင့် ကားဝင်ကြေးများ ဈေးတက်ကာကောက်ခံသဖြင့် မကျေနပ်မှုများ ဖြစ်ပွားခဲ့ခြင်းဖြစ်ကြောင်း၊ အဆိုပါကိစ္စရပ်ကို ပြေလည်အောင် ဖြေရှင်းပေးခြင်း မရှိပါက ဘုရင့်နောင်ဈေးသူ ဈေးသားများမှ တရားဝင်စာတင်ကာ ဆန္ဒဖော်ထုတ်ရန် စီစဦလျက် ရှိကြောင်းသိရသည်။
ဆုဝေ
မြန်မာ့ခေတ်