ကလေး၊ မေ ၂၆။
၁၉၈၂ ခုနှစ် မြန်မာနိုင်ငံသား ဥပဒေနှင့် ၂၀၀၈ အခြေခံဥပဒေ အခန်း(၈)မှနိုင်ငံသား၊ နိုင်ငံသားများ၏ မူလ အခွင့်အရေးများနှင့် တာဝန်များကို အသိပညာ မျှဝေခြင်းနှင့် နှီးနှောဆွေးနွေးခြင်းကို ကလေးမြို့တွင် ဆွေးနွေးပွဲတစ်ခုအဖြစ် ယမန်နေ့က ပြုလုပ်ခဲ့ကြောင်း သိရသည်။
အဆိုပါ ဆွေးနွေးပွဲတွင် ၁၉၄၇ ခုနှစ် လူဝင်မှုကြီးကြပ်ရေး လတ်တလောပြဌာန်းချက်များ၊ ၁၉၄၈ ခုနှစ် မြန်မာနိုင်ငံသား မှတ်ပုံတင်ရေး၊ ပြည်ထောင်စု မြန်မာနိုင်ငံသား အဖြစ်ရွေးချယ်ရေးနှင့်နိုင်ငံသား ဖြစ်မှုတို့ကို ဒု-ခရိုင် ဥပဒေအရာရှိ တစ်ဦးမှ ပြောဆိုဆွေးနွေးခဲ့ကြောင်း သိရသည်။
၁၉၄၇ ခုနှစ် မြန်မာနိုင်ငံ လူဝင်မှု ကြီးကြပ်ရေး (အရေးပေါ်ပြဌာန်းချက်) အက်ဥပဒေနှင့် နည်းဥပဒေများ၊တရားမ၀င်ဘဲ ရောက်လာသူများ အား ပြည်နှင်ဒါဏ်ပေးခြင်းနှင့် ချုပ်ထားခြင်းများ၊ ၁၉၄၉ ခုနှစ် ပြည်ထောင်စု မြန်မာနိုင်ငံအတွင်း နေထိုင်သူများ မှတ်ပုံတင်ရေး အက်ဥပဒေနှင့် နည်းဥပဒေများ၊ ၁၉၅၁ ခုနှစ် ပြည်ထောင်စု မြန်မာနိုင်ငံအတွင်း နေထိုင်သူများ မှတ်ပုံတင်ရေး နည်းဥဒေများကို အထက်တန်းရှေ့နေတစ်ဦးက ပါဝင်ဆွေးနွေးခဲ့ကြောင်း သိရသည်။
“ကျွန်တော်အနေနှင့် ကတော့ ၁၉၈၂ ဥပဒေကို လုံးဝဖျက်သိမ်းရမယ်ဆိုတာမျိုး မဟုတ်ဘဲ လက်ရှိအခြေအနေနှင့် လျှော်ကန်မှု မရှိတော့တဲ့ အချို့ဥပဒေတွေကို ပြုပြင်သင့်တယ်လို့ ထင်ပါတယ် ” ဟု တက်ရောက်လာသူ တစ်ဦးက ဆွေးနွေးခဲ့ကြောင်း သိရသည်။
ယင်းဆွေးနွေးပွဲကို ယမန်နေ့ နေ့လည်(၁)နာရီမှ ညနေ(၃)နာရီအထိ နေသာစာကြည့်တိုက် အပေါ်ထပ်တွင် လူမှုကွန်ယက်(ကလေး)မှ ဦးဆောင်ပြုလုပ်ခဲ့ပြီး ခရိုင်ဥပဒေ အရာရှိတစ်ဦး၊ အထက်တန်းရှေ့နေများ၊ တက္ကသိုလ်ကျောင်းသား ကျောင်းသူများ၊ အမျိုးဘာသာ သာသနာ ကာကွယ်စောင့်ရှောက်သူများနှင့် ဥပဒေရေးရာ စိတ်ဝင်စားသူများ (၃၀)ဦးခန့် တက်ရောက်ခဲ့ကြောင်း သိရသည်။
ကျော်သူစိုး(ကလေးမြို့)
မြန်မာ့ခေတ်
မြန်မာနိုင်ငံသား ဥပဒေနှင့် ဖွဲ့စည်းပုံအခြေခံဥပဒေ အခန်း(၈)ကို နှိုင်းယှဉ်ဆွေးနွေး
Labels:
ပြည်တွင်းသတင်း