ရွှေဘိုမြို့နယ် ဧရာဝတီမြစ်ကြောင်း တစ်လျှောက်ရှိ အေဒီ ၁၇ ရာစု အင်းဝခေတ် ဗုဒ္ဓဆင်းတုတော်များ မကြာခဏ ခိုးယူခံနေရကြောင်း ရှေးဟောင်း ဆင်းတုတော်များ ထိန်းသိမ်းစောင့်ရှောက်မှုများ ဆောင်ရွက်လျက် ရှိသည့် ရွှေဘို မြို့နယ် ကျောက်မြောင်းမြို့နယ်ခွဲ မခေါက်ကျေးရွာ နန်းဦးကျောင်းတိုက် ဆရာတော်ဦးကုဏ္ဍလက မိန့်ကြားသည်။
သင်္ကြန်ကာလမတိုင်မီက မခေါက်ကျေးရွာ ရွှေတောင်ဦးစေတီရှိ ရှေးဟောင်း ဆင်းတုတော် ခုနစ်ဆူ ရှိသည့်အနက် ခြောက်ဆူ ခိုးယူခံခဲ့ရပြီး တစ်ဆူကို ဦးခေါင်းတော်ပြတ်သွား သည့်အတွက် စွန့်ပစ်ထား ခံခဲ့ရကြောင်း ဆရာတော်ဦးကုဏ္ဍလက မိန့်ကြားသည်။
"ဘုရားတွေကို ရေလမ်းက သယ်ပုံရတယ်။ တောင်ပေါ်ကနေ ရေစပ်ထိ ဆွဲချလာတဲ့အရာတွေ တွေ့ရ တယ်။ ရှေးဟောင်းပစ္စည်း နိုင်ငံခြား ထုတ်မယ်ဆိုရင် သာမန်အဖွဲ့အစည်း နဲ့ လုပ်လို့မရဘူး။ ဒါတွေ ဖော်ထုတ်ဖို့ ဆိုရင် သက်ဆိုင်ရာအဖွဲ့အစည်း တော်တော်များများ လိုအပ်တယ်" ဟု ဆရာတော် ဦးကုဏ္ဍလက မိန့်ကြားသည်။
ယင်းမတိုင်မီ လွန်ခဲ့သည့် ရှစ်လခန့်က ရွှေဘိုမြို့နယ် ရွှေတိုက် ကျေးရွာ ရွှေခြင်္သေ့ ကျောင်းတိုက်ရှိ ဆင်းတုတော်နှစ်ဆူနှင့် ဝက်လက် မြို့နယ် ရှားကွဲကျေးရွာ၊ ရေဂမိုး ကျေးရွာ၊ ငါးဘတ်ချောင်းကျေးရွာရှိ ဆင်းတုတော်များနှင့် မန္တလေးတိုင်း ဒေသကြီး ခက်သင်းကျေးရွာရှိ ဆင်းတုတော်များ ခိုးယူခံခဲ့ရကြောင်း ရှေးဟောင်းဆင်းတုတော် ထိန်းသိမ်း စောင့်ရှောက်ရေး အစည်းအဝေးပွဲသို့ တက်ရောက်လာသည့် ရွှေဘိုဒေသခံ ကျောင်းထိုင် ဆရာတော်များထံမှ စုံစမ်းသိရှိရသည်။
"ဘုန်းဘုန်းတို့ ခတ်ထားတဲ့ သော့ကို ဖျက်ဆီးပြီး ဘုရားနှစ်ဆူ ခိုးသွားတယ်။ ပျောက်သွားတဲ့ ဘုရား တွေတော့ ပြန်ရတဲ့ အတွက် နောက်ထပ် မပျောက်အောင် ဘယ်လို လုပ်ရမလဲဆို စိတ်ပူနေရတယ်" ဟု ရွှေဘို မြို့နယ် ရွှေတိုက်ကျေးရွာ ရွှေခြင်္သေ့ ကျောင်းတိုက်ဆရာတော် ဦးဝိစိတ္တက မိန့်ကြားသည်။
ရှေးဟောင်းဆင်းတုတော် ထိန်းသိမ်းရေးအတွက် ပြီးခဲ့သည့် ဧပြီလ ၂၇ ရက်နေ့ မွန်းလွဲ ၂ နာရီခန့်က ရွှေဘိုမြို့နယ် ကျောင်းမြောင်းမြို့နယ်ခွဲ ဓမ္မရက္ခိတ လက်ရွေး ကျောင်းကြီးတိုက်တွင် ရှေးဟောင်းဆင်းတုတော် ထိန်းသိမ်းရေးစောင့်ရှောက်ရေး အစည်းအဝေး တစ်ရပ် ကျင်းပခဲ့ရာ ကျောက်မြောင်းမြို့နယ် အတွင်းရှိ ကျောင်းထိုင် ဆရာတော် အပါး ၃၀ ခန့် တက်ရောက်ခဲ့ကြောင်း ယင်းပွဲစီစဉ်သူများက ပြောကြား သည်။
"ဝက်လက်နယ် ရေဂမိုးရွာက ဘုရား နှစ်ဆူ ၄ လပိုင်း ၃ ရက်နေ့က ပျောက်သွား တော့ သစ်ဆိပ်ရဲစခန်းကို သွားတိုင်တာကို ဘုရားပျောက်တာနဲ့ ပတ်သက်ပြီး သူတို့ မစွမ်းဆောင်နိုင်ဘူး။ ငွေကြေး အကုန်အကျ များတယ်။ ဒါကိုရှာဖို့ဆိုတာက အလွန်ခက်ခဲ တယ်လို့ ရဲစခန်းတာဝန်ရှိသူက ပြန်ပြော လိုက်တယ်။ တာဝန်ရှိသူတွေကို အားကိုးလို့ မရရင် ဘုန်းဘုန်းတို့က ဘယ်သူ့သွားအားကိုး ရမလဲ" ဟု ဝက်လက်မြို့နယ် ရေဂမိုးကျေးရွာ ကျောင်းထိုင်ဆရာတော် ဦးအာစရက မိန့်ကြားသည်။
ရွှေဘိုမြို့နယ် ကျောက်မြောင်းမြို့နယ် ခွဲအတွင်းမှ ယခုနှစ်အတွင်း ရှေးဟောင်း ဆင်းတုတော် ခြောက်ဆူသာ ပျောက်ဆုံး စာရင်းဖွင့်ထားပြီး ယင်းဆင်းတုတော်များ နှင့် ပတ်သက်၍ စုံစမ်းမှုများ ဆောင်ရွက် လျက်ရှိကြောင်း ရွှေဘိုမြို့နယ်ခွဲ ကျောက်မြောင်း ရဲတပ်ဖွဲ့စခန်းရှိ ဒုရဲအုပ်ထွန်းလင်းခိုင်က ပြောကြားသည်။ ဧရာဝတီမြစ်ကြောင်းရှိ အခြား မြို့နယ်များရှိ ဆင်းတုတော် ပျောက်ဆုံး စာရင်းကိုမူ သိရှိခြင်းမရှိကြောင်း ၄င်းက ဆိုသည်။
The Voice Weekly
