နိုင်ငံတကာနှင့် ချိတ်ဆက်ထားသော ဘဏ်များမှတစ်ဆင့် ပြည်ပရောက် မြန်မာများက ပြည်တွင်းသို့ တရားဝင် လွှဲငွေလမ်းကြောင်းဖြင့် လွှဲပို့သည်မှာ ၂၀၁၂ ခုနှစ် ဖေဖော်ဝါရီလမှ ယခုနှစ် မတ်လကုန်ထိ တစ်နှစ်အတွင်း ကျပ် ၈၈ ဘီလီယံကျော် ရှိကြောင်း အလုပ်သမား ဝန်ကြီးဌာန၏ ငွေလွှဲဝင်ရောက်မှု စာရင်းများအရ သိရသည်။
ယင်းငွေများသည် ဧရာဝတီဘဏ်၊ သမဝါယမဘဏ်၊ အာရှစိမ်းလန်းမှု ဖွံ့ဖြိုးရေးဘဏ်၊ ကမ္ဘောဇဘဏ် တို့မှတစ်ဆင့် ဝင်ရောက်လာခြင်း ဖြစ်ကြောင်း ယင်းစာရင်း များအရ သိရသည်။
တရားဝင်လွှဲငွေများသာ စာရင်း သိနိုင်ပြီး ဟွန်ဒီဖြင့် ငွေလွှဲမှုများလည်း ရှိနေဆဲ ဖြစ်သောကြောင့် မြန်မာနိုင်ငံသို့ စီးဝင်ငွေမည်မျှ ရှိသည်ကို မခန့်မှန်း နိုင်ကြောင်း ဘဏ်လုပ်ငန်းရှင်များက ပြောဆိုသည်။
စင်ကာပူနိုင်ငံတွင် သွားရောက် အလုပ်လုပ်ကိုင်သူ အများစုမှာ ဘဏ်စနစ် ဖြင့် တရားဝင်ငွေလွှဲသူ များပြားပြီး မလေးရှား၊ ထိုင်းနိုင်ငံတို့ရှိ မြန်မာလုပ်သားများမှာမူ ဟွန်ဒီကိုသာ အားကိုးကြကြောင်း ယင်းနိုင်ငံများတွင် သွားရောက်အလုပ် လုပ်ကိုင်နေကြသူများထံမှ စုံစမ်း သိရှိရသည်။
"ဘဏ်နဲ့ လွှဲတာက စိတ်ချရတယ်။ ဒီမှာ (စင်ကာပူ) က တော်တော်များများ
ဘဏ်နဲ့ပဲ လွှဲကြပါတယ်" ဟု စင်ကာပူနိုင်ငံမှ ဘဏ်စနစ်အသုံးပြု၍ သမဝါယမဘဏ်သို့ ငွေလွှဲလေ့ရှိသူ အီလက်ထရွန်နစ် ကုမ္ပဏီတစ်ခုမှ စက်မှုအင်ဂျင်နီယာ ဒေါ်ဇင်ဇင်ဦး က ပြောဆိုသည်။
ထိုင်းနိုင်ငံနှင့် မလေးရှားနိုင်ငံတွင် အလုပ်လုပ်ကိုင်နေသော မြန်မာနိုင်ငံသား အများစုမှာ ၄င်းတို့၏ မိသားစုများကို ငွေလွှဲပို့ရာတွင် ဘဏ်များမှတစ်ဆင့် တရားဝင် ငွေလွှဲပို့နိုင်သော်လည်း အားလပ်ချိန်မှာ
ဘဏ်ဖွင့်ချိန်နှင့် မတိုက်ဆိုင်သောကြောင့် ဟွန်ဒီကိုသာ အသုံးပြု၍ ငွေလွှဲကြကြောင်း အဆိုပါ မြန်မာနိုင်ငံသားများနှင့် ဟွန်ဒီလုပ်ငန်း လုပ်ကိုင်နေသူများက ပြောကြားသည်။
ထိုင်းနှင့်မလေးရှား တို့မှ ငွေလွှဲသူ နည်းပါးပြီး ဘဏ်ဖွင့်ချိန်၊ ပိတ်ချိန်များမှာ ယင်းနိုင်ငံမှ ဘဏ်များနှင့် သက်ဆိုင်ကြောင်း အာရှစိမ်းလန်းမှု ဖွံ့ဖြိုးရေးဘဏ်၏ ဒုတိယ အုပ်ချုပ်မှုဒါရိုက်တာ ဦးသက်လွင်ရွှေက ပြောကြားသည်။
The Voice Weekly
