ရခိုင်ပဋိပက္ခ အစီရင်ခံစာ ကုလသမဂ္ဂထောက်ခံ

ရခိုင်ပြည်နယ်တွင် ဖြစ်ပွားခဲ့သော ပဋိပက္ခများနှင့် ပတ်သက်၍ စုံစမ်းစစ်ဆေး ရေး ကော်မရှင်က ဧပြီလ ၂၉ရက်နေ့က ထုတ်ပြန်လိုက်သည့် အစီရင်ခံစာကို ကုလသမဂ္ဂ(UN)က ထောက်ခံကြိုဆို ကြောင်း ကုလသမဂ္ဂ နေရာချထားရေးနှင့် လူသားချင်း စာနာထောက်ထားမှုဆိုင်ရာ ညှိနှိုင်းရေးမှူး Mr.Bertrand Bainvel က မေလ ၁ရက်နေ့က့ ပြောကြားလိုက်သည်။

ယင်းအစီရင်ခံစာတွင် ကယ်ဆယ်ရေး စခန်းမှ ဒုက္ခသည်များအတွက် လူသားချင်း စာနာထောက်ထားမှု ဆိုင်ရာ အထောက်အပံ့ များ အရေးပေါ်ပေးအပ်ရန်နှင့် ဒုက္ခသည် များကို မိုးမကျမီ အမိုးအကာအောက် ရောက်ရန်ထောက်ပြ အကြံပြုထားသဖြင့် ၄င်းက အသိအမှတ်ပြုကြောင်း ကုလသမဂ္ဂသတင်း ပြန်ကြားရေးဌာနက ထုတ်ပြန်သည်။

အစီရင်ခံစာ အပြည့်အစုံနှင့် ယင်းအစီရင်ခံစာတွင် ပါရှိသော အချက်များကို ကုလသမဂ္ဂ၏ အပြည်ပြည်ဆိုင်ရာ စံသတ်မှတ်ချက်များ၊ သဘောတူညီချက် များနှင့်အညီ ပြန်လည်သုံးသပ်မှုများ ပြုလုပ်ပြီး ဖြစ်ကြောင်း၊ ပဋိပက္ခများ ဖြစ်ပွားခဲ့သော ရခိုင်ဒေသတွင်း လူမှုရေး၊ စီးပွားရေး ဖွံ့ဖြိုးတိုးတက်မှု များနှင့် ပြန်လည်သင့်မြတ်ရေး လုပ်ငန်းစဉ်တွင် အကူအညီပေးနိုင်ရန်၊ ကုလသမဂ္ဂ နိုင်ငံတွင်း အဖွဲ့အစည်းများက မြန်မာနိုင်ငံအစိုးရ၊ ရခိုင်အစိုးရ၊ လူ့အဖွဲ့အစည်းများ၊ အပြည်ပြည်ဆိုင်ရာ ဖွံ့ဖြိုးရေးအေဂျင်စီ များနှင့် လက်တွဲကာ ဆောင်ရွက်သွားမည် ဖြစ်ကြောင်း Mr.Bertrand Bainvel ကဆိုသည်။

ယင်းအပြင် ရခိုင်ပြည်နယ်အတွင်း အထောက်အပံ့များ ပေးအပ်နေသော လူမှုအဖွဲ့အစည်းများ အနှောက်အယှက်မရှိ ကူညီနိုင်ရန် အစိုးရက တာဝန်ယူသင့်ပြီး အဓိကရုဏ်း ဖြစ်စေနိုင်သည့် မည်သည့် လှုံ့ဆော်မှုကိုမဆို အချိန်မီ အရေးယူရန် ကုလသမဂ္ဂက တိုက်တွန်းသည်။

ရခိုင်ပြည်နယ်တွင် ဖြစ်ပွားခဲ့သော ပဋိပက္ခဖြစ်စဉ်များ၊ သမိုင်းနောက်ခံ အကြောင်းအရာများ အပါအဝင် ဒုက္ခသည်များ ရင်ဆိုင်နေရသည့် အခက်အခဲများကို ဖြေရှင်းရန်၊ ၁၉၈၂ ခုနှစ် နိုင်ငံသားဥပဒေ အတိုင်း အမြန်ဆုံး အကောင်အထည်ဖော် ရန်၊ ငြိမ်းချမ်းစွာ အတူနေထိုင်ရေး၊ တရား ဥပဒေ စိုးမိုးရေး၊ လုံခြုံရေး၊ လူမှုရေး၊ စီးပွားရေး၊ ပညာရေး၊ ဘာသာရေး၊ သားဖွားနှုန်း၊ သတင်းထုတ်ပြန်ရေး ကိစ္စများအတွက် အကြံပြုချက်များ ပါဝင်သည့် အစီရင်ခံစာကို စုံစမ်းစစ်ဆေးရေး ကော်မရှင် က ဧပြီလ ၂၂ရက်နေ့တွင် နိုင်ငံတော်သမ္မတထံသို့ တင်ပြခဲ့ပြီး ၂၉ရက်နေ့တွင် သတင်း စာရှင်းလင်းခဲ့သည်။

“မျှတမှု ရှိပါတယ်။ လပေါင်းများစွာ ကွင်းဆင်းလေ့လာပြီး ရေးသားထားတဲ့ အစီရင်ခံစာ ဖြစ်တယ်” ဟု ရန်ကုန်တိုင်းဒေသကြီး ရခိုင်တိုင်းရင်းသားရေးရာ ဝန်ကြီး ဦးဇော်အေးမောင်က ပြောကြားသည်။

စုံစမ်းစစ်ဆေးရေး ကော်မရှင်တွင် ရခိုင်ပြည်နယ်မှ ရခိုင်တိုင်းရင်းသား လွှတ်တော်ကိုယ်စားလှယ် နှစ်ဦး ပါဝင်သော်လည်း အခြားလူ့အဖွဲ့အစည်းမှ ဒေသခံ ကိုယ်စားပြု ခေါင်းဆောင်များ ပါဝင်ခြင်း မရှိခဲ့ကြောင်း၊ အစီရင်ခံစာတွင် ရခိုင်တိုင်းရင်းသားများက တင်ပြသည့် အချက်အလက် အများစုကို အခြေခံထားသဖြင့် မျှတမှု မရှိကြောင်း ဒီမိုကရေစီနှင့် လူ့အခွင့်အရေး ပါတီ ဗဟို အလုပ်မှုဆောင် ဦးကျော်စိုးအောင်က ဆိုသည်။

အစီရင်ခံစာမှာ မြေပြင်ပကတိ အခြေအနေ၊ ပဋိပက္ခဖြစ်ပွားရသည့် အကြောင်းအရင်း များကို ဘက်ပေါင်းစုံ၊ ထောင့်ပေါင်းစုံမှ သုံးသပ် ဖော်ပြထားသဖြင့် ဖြစ်ရပ်မှန်နှင့် အလွန်နီးစပ်ကြောင်း၊ အစီရင်ခံစာမှ ဖော်ပြချက် များကြောင့် ယခင်မသိခဲ့သော ရခိုင်တိုင်းရင်းသားများ အပေါ် ဘင်္ဂါလီများ၏ သဘောထားကို သိမြင်ခဲ့ရကြောင်း စစ်တွေမြို့ မြို့မိ မြို့ဖ တစ်ဦးဖြစ်သူ ဦးသန်းထွန်းက ပြောကြား သည်။

အစီရင်ခံစာနှင့် ပတ်သက်၍ မှတ်ချက် မပေးလို သော်လည်း နိုင်ငံသမ္မတ၏ ဆုံးဖြတ်ချက်များကို စောင့်ကြည့်သွားမည် ဖြစ်ကြောင်း မြန်မာနိုင်ငံလုံးဆိုင်ရာ မော်လဝီအဖွဲ့ ဌာနချုပ်မှ အထွေထွေ အတွင်းရေးမှူးချုပ် ဦးကျော်စိုးက ဆိုသည်။

ယင်းအစီရင်ခံစာကို လူပေါင်း ၂၀၀၀ ကို တွေ့ဆုံ မေးမြန်းထားမှု၊ ကွင်းဆင်း သုတေသန ပြုမှုများကို အခြေခံကာ ရေးသားထားခြင်းဖြစ်သည်။
The Voice Weekly