 |
| ဓါတ်ပုံ google |
မြန်မာနေရှင်နယ်လိဂ် ဘောလုံးပွဲ၏ ရန်ကုန်-နေပြည်တော်ပွဲ၌ အချင်းများ ခဲ့သည့် နှစ်ဖက် ကစားသမားများနှင့် ရန်ပြု တိုက်ခိုက်ခဲ့သည့် ပရိသတ် အချို့ကို ဗီဒီယို အထောက်အထားများဖြင့် စုံစမ်း ဖော်ထုတ် အရေးယူသွား မည် ဖြစ်ကြောင်း မြန်မာနိုင်ငံ ဘောလုံးအဖွဲ့ချုပ် ပြန်ကြားရေး တာဝန်ခံ ဦးစိုးမိုက ပြောကြားသည်။
သြဂုတ်လ ၄ ရက်၊ ညနေ ၆ နာရီတွင် ရန်ကုန်-နေပြည်တော် ပွဲ၌ ပြဿနာ ဖြစ်ပွားအောင် ဖန်တီးခဲ့သည့် နှစ်ဖက် ကစားသမားများ အပါအဝင် ပြဿာနာရှာ ရန်ပြုခဲ့သည့် ပရိသတ်များကို စုံစမ်းဖော်ထုတ် အရေးယူသွားမည် ဖြစ်ကြောင်း ၎င်းက ဆိုသည်။
အရေးယူမည်ဆိုလျှင် အိမ်ရှင် ဖြစ်သော နေပြည်တော် အသင်းကိုသာ အရေးယူမည် ဖြစ်ကြောင်း ပွဲမစခင် ရက်အနည်းငယ်က နေပြည်တော် အသင်း ပရိသတ်များကို စည်းကမ်းတကျ အားပေးစေရန် ထိန်းသိမ်းရေး မေတ္တာရပ်ခံစာကို နေပြည်တော်အသင်းထံ ပို့ထား ပြီး ဖြစ်ကြောင်း မြန်မာ နေရှင်နယ်လိဂ် စည်းကမ်း ထိန်းသိမ်းရေး ကော်မတီ မှ ဦးခင်မောင်ထွေး (ပျဉ်းမနား) က ပြောကြား သည်။
မြန်မာနိုင်ငံ ဘောလုံး အဖွဲ့ချုပ်က ယင်းကိစ္စနဲ့ ပတ်သက်၍ စည်းကမ်း ထိန်းသိမ်းရေး ကော်မတီကို တာဝန်ပေးခြင်း မရှိသေးကြောင်း ၎င်းက ဆိုသည်။
“ကော်မတီကို တာဝန်ယူဖို့ ပြောခဲ့ရင်တော့ ကွင်းထဲက ပျက်စီးသွားတဲ့ တန်ဖိုးတွေကို အကုန် ပေးလျော်ခိုင်းမှာပါ။ အဆင့်အတန်းရှိရှိ လုပ်ထား တာကို ဖျက်ဆီးခဲ့လို့ပါ။ ပေါင်းလောင်းကွင်း မဟုတ်ဘူး၊ SEA Games အတွက် ရည်ရွယ်ထားတဲ့ ကွင်းပါ” ဟု ဦးခင်မောင်ထွေးက ဆိုသည်။
နေပြည်တော်ရှိ ဝဏ္ဏသိဒ္ဓိ အားကစားကွင်းတွင် ယှဉ်ပြိုင် ကစားခဲ့ သည့် နေပြည်တော် အသင်းနှင့် ရန်ကုန်အသင်းတို့၏ ရာသီပိတ်ပွဲတွင် ပရိသတ်နှင့် ကစားသမားများ အချင်းများခဲ့သော ကိစ္စနှင့် ပတ်သက်၍ လုံခြုံရေးပိုင်းဆိုင်ရာ အားနည်းမှုများ ရှိခဲ့ကြောင်း မြန်မာနိုင်ငံ ဘောလုံး အဖွဲ့ချုပ် ဥက္ကဋ္ဌ ဦးဇော်ဇော်က ပြောကြားခဲ့သည်။
“ကျွန်တော်တို့ လုံခြုံရေး အားနည်းခဲ့တယ်ဆိုတာ ဝန်ခံပါတယ်။ဒါပေမဲ့ သက်ဆိုင်ရာ အစိုးရအဖွဲ့ကို လုံခြုံရေး တောင်းခံပါသေးတယ်။ မရခဲ့ပါဘူး” ဟု ၎င်းက ဆိုသည်။
ရန်ကုန်နှင့် နေပြည်တော်ပွဲတွင်ရန်ကုန်ပရိသတ် နှစ်ထောင်ကျော်နှင့် နေပြည်တော်အသင်း ပရိသတ် နှစ်သောင်းခန့် လာရောက် အားပေးခဲ့ကြပြီး ပွဲမစမီကပင် နှစ်ဖက် ပရိသတ်များ အပြန်အလှန် အရာဝတ္ထုများနှင့် ပစ်ခတ်မှု များ ရှိခဲ့ကြောင်း ပွဲချိန် ၃၂ မိနစ်ခန့် တွင် ရန်ကုန်အသင်း ပင်နယ်တီ ပြစ် ဒဏ်ဘော ကန်ခွင့်ပေးခဲ့ခြင်းအပေါ် မကျေနပ်၍ နေပြည်တော် ပရိသတ် တစ်ဦး ကွင်းအတွင်းသို့ ဝင်ရောက်ခဲ့ကြောင်း ပင်နယ်တီ ပြစ်ဒဏ်ဘောကို ရန်ကုန်အသင်းမှ ဆီဇာ ကန်သွင်းပြီး အချိန်တွင် နေပြည်တော် ပရိသတ် ၂၅ ဦးခန့် ကွင်းအတွင်းသို့ ဝင်ရောက်ခဲ့ပြီး ရန်ကုန် ကစားသမားများကို ရန်ပြုရန် ကြိုးစားရာမှ နှစ်ဖက် ကစားသမားများနှင့် ပရိသတ်များ ခိုက်ရန် ဖြစ်ပွားကာ ပွဲကို ရပ်နားခဲ့ရခြင်းဖြစ်သည်။
နေပြည်တော်အသင်းသည် ပရိသတ်များ ဆိုးရွားစွာ အားပေးသဖြင့် ဒဏ်ငွေ ရှစ်သိန်း ပေးဆောင်ထားရပြီး ယမန်နှစ်ကလည်း ဒဏ်ငွေ ၁၁သိန်း ပေးဆောင်ထားရသည့် အသင်း ဖြစ်သည်။
နေပြည်တော်-ရန်ကုန် ပွဲစဉ်ကို ပြိုင်ပွဲ ရပ်ဆိုင်းရေး စည်းမျဉ်း အမှတ် ၂၈ အပိုဒ်ခွဲ (ဂ) အရ လက်ရှိ ပွဲရလဒ်အတိုင်း ရန်ကုန်အသင်းအား တစ်ဂိုး ဂိုးမရှိဖြင့် အနိုင်ပေးခဲ့ကြောင်း မြန်မာနိုင်ငံ ဘောလုံး အဖွဲ့ချုပ် ထုတ်ပြန်ချက်အရ သိရသည်။
The Voice Weekly
