![]() |
ဓါတ်ပုံ မြဝတီ |
ကချင်ပြည်နယ်အစိုးရ၏ လမ်းညွှန်မှုဖြင့် ဗန်းမော်ခရိုင် ရွှေကူမြို့နယ်အတွင်း တရားမဝင်ကျွဲ၊ နွား ရောင်းဝယ်သူများထံမှ သက်သေခံပစ္စည်းအဖြစ် သိမ်းဆည်းရမိထားသော ကျွဲ၊ နွား ၈၉ ကောင်ကို ကျေးလက်ဒေသ ဖွံ့ဖြိုးရေးနှင့် ဆင်းရဲနွမ်းပါးမှု လျှော့ချရေး အစီအစဉ်ဖြင့် လယ်ယာလုပ်ငန်း လုပ်ကိုင်သည့် ဆင်းရဲနွမ်းပါးသူ တောင်သူများထံသို့ သြဂုတ်လ ၅ ရက်နေ့တွင် မဲစနစ်ဖြင့် ရောင်းချပေးသွားမည် ဖြစ်ကြောင်း ရွှေကူမြို့နယ်တရားရုံး၏ လေလံကြေညာစာအရ သိရှိရသည်။
ကျွဲ၊ နွားလုံးဝမရှိသူနှင့် အနည်းဆုံး တစ်ကောင်ရှိသူများကိုသာ ရောင်းချပေးမည် ဖြစ်ကြောင်း၊ ကျွဲ၊ နွားဝယ်ယူမည့် တောင်သူများအနေနှင့် အမှန်တကယ် လယ်ယာလုပ်ငန်း လုပ်ကိုင်သူ ဖြစ်ကြောင်း ကျေးရွာအုပ်ချုပ်ရေးမှူး၊ မြို့နယ်မြေ စာရင်းရုံး၊ မြို့နယ်စိုက်ပျိုးရေး ဦးစီးဌာန၊ မြို့နယ်မွေးမြူရေးနှင့် ကုသရေးဦးစီးဌာနတို့မှ ထောက်ခံစာနှင့်အတူ မြို့နယ်တရားရုံးသို့ ကျွဲ၊ နွားဝယ်ယူခွင့် လျှောက်လွာ တင်သွင်းရမှာ ဖြစ်ကြောင်း ရွှေကူမြို့နယ် အုပ်ချုပ်ရေးမှူး ဦးညီညီက ရှင်းပြသည်။
“တင်သွင်းလာတဲ့ လျှောက်လွှာတွေကို စိစစ်ပြီး မဲနှိုက်တဲ့စနစ်နဲ့ ရောင်းချပေးသွားမယ်” ဟု မြို့နယ် အုပ်ချုပ်ရေးမှူးက ဆိုသည်။
ကျွဲ၊ နွားဝယ်ယူမည့် တောင်သူများအနေနှင့် လက်ရှိပြင်ပပေါက်ဈေးထက် များစွာသက်သာသော ကျွဲ၊ နွားတစ်ကောင်လျှင် ကျပ်နှစ်သိန်း ဝန်းကျင်ခန့်ဖြင့် ဝယ်ယူရရှိမည်ဖြစ်ပြီး ယင်းဈေးနှုန်းမှာ ကချင်ပြည်နယ် အစိုးရအဖွဲ့က အတည်ပြုထားပြီး ဖြစ်သော ဈေးနှုန်းဖြစ်ကြောင်း ၎င်းမှထပ်ဆင့် ပြောကြားသည်။
လက်ရှိရွှေကူမြို့နယ်တွင် တရားမဝင် ကျွဲ၊ နွား ရောင်းဝယ်မှုများကြောင့် လယ်ယာလုပ်ငန်းခွင် ဝင်နိုင်သည့် နွားတစ်ရှဉ်းလျှင် ကျပ်သိန်း ၂၀ ကျော်ခန့် ပေါက်ဈေး ရှိကြောင်း ဒေသခံ နွားကုန်သည် တစ်ဦးက ပြောပြသည်။
ကချင်ပြည်နယ်အတွင်း ကျွဲ၊ နွား တရားမဝင် ရောင်းဝယ်မှုများကို ဖမ်းဆီး အရေးယူမှုများ ပြုလုပ်နိုင်ရန်အတွက် ပြည်နယ် ရဲတပ်ဖွဲ့မှူးမှ သက်ဆိုင်ရာ ခရိုင်မှူး၊ မြို့နယ်မှူးများထံသို့ ညွန်ကြား ထားပြီးဖြစ်ကာ လက်ရှိတွင် ကျွဲ၊ နွားတရားမဝင် ရောင်းဝယ်မှုများကို ဖမ်းဆီးအရေးယူမှု ဆက်တိုက် ပြုလုပ်လျက် ရှိကြောင်း ကချင်ပြည်နယ် ရဲတပ်ဖွဲ့မှူးရုံးမှ ဒုတိယရဲမှူး တင်ကိုကိုက The Voice သို့ ပြောကြားထားသည်။
ရွှေကူမြို့နယ်တွင် ယခုကဲ့သို့ သိမ်းဆည်းရမိ ကျွဲ၊ နွားများကို တောင်သူများထံသို့ ရောင်းချပေးခြင်းမှာ ပထမဆုံးအကြိမ် ဖြစ်ကြောင်းနှင့် တရားရုံးက စစ်ဆေးမှု မပြီးပြတ်သေးသော ကျွဲ၊ နွား တရားမဝင် ရောင်းဝယ်မှုများမှ ကျွဲ၊ နွား အရေအတွက် ၅၇ ကောင်ခန့် ကျန်ရှိနေသေးကာ အမှုပြီးပြတ်သွားပါက ဒုတိယအကြိမ်အဖြစ် ထပ်မံရောင်းချပေးသွားမည် ဖြစ်ကြောင်း ရွှေကူမြို့နယ် အထွေထွေအုပ်ချုပ်ရေး ဦးစီးဌာနမှ စုံစမ်းသိရှိရသည်။
The Voice Weekly