မြန်မာနိုင်ငံအတွင်းသို့ ဝင်ရောက်လာသည့် နိုင်ငံခြားသားများနှင့် အိမ်နီးချင်းနိုင်ငံများမှ မည်သည့် ခရီးသွားဧည့်သည်မဆို မြန်မာ-ထိုင်းနယ်စပ် တာချီလိတ်-မြဝတီ-ကော့သောင်း ဝင်ထွက်စခန်းများ တွင် နိုင်ငံကူးလက်မှတ်နှင့် ဗီဇာပါရှိပါက သြဂုတ်လမှ စတင်ကာ လွတ်လပ်စွာ ဝင်ထွက်ခွင့် ပြုကြောင်းနှင့် မြန်မာနိုင်ငံအတွင်း မည်သည့် ထွက်ပေါက်မှမဆို ပြန်လည် ထွက်ခွာခွင့် ပြုမည် ဖြစ်ကြောင်း လူဝင်မှု ကြီးကြပ်ရေးနှင့် အမျိုးသားမှတ်ပုံတင်ရေး ဦးစီးဌာနမှ ရှမ်းပြည်နယ် (အရှေ့ပိုင်း) တွဲဖက် ပြည်နယ်ဦးစီးဌာနမှူး ဦးစိုင်းဘုန်းတင့်က ပြောကြားသည်။
ဇူလိုင်လ ၃၀ ရက် နေ့လယ် ၂ နာရီ အချိန်က ကျိုင်းတုံမြို့ တွဲဖက်ပြည်နယ် ဦးစီးဌာနမှူးရုံး အစည်းအဝေးခန်းမတွင် ခရိုင်နှင့် မြို့နယ်အဆင့် ဌာနဆိုင်ရာများ၊ ဟိုတယ်လုပ်ငန်းရှင်များ၊ ကုမ္ပဏီ လုပ်ငန်းရှင်များ၊ နိုင်ငံခြားသား ကြီးကြပ်ထိန်းသိမ်းရေး ကော်မတီအဖွဲ့ဝင်များ၊ မီဒီယာများနှင့် အစည်းအဝေး တက်ရောက်သူများကို မြန်မာ-ထိုင်း နယ်စပ် စခန်းများမှ ဝင်ထွက်ခွင့် ပြုခြင်းကိစ္စများ ရှင်းလင်းခြင်း အခမ်းအနားတွင် ၎င်းက အထက်ပါအတိုင်း ပြောကြားခြင်း ဖြစ်သည်။
“ရှမ်းအရှေ့မှာတော့ တာချီလိတ်မြို့နယ်၊ တာလေမြို့နယ်ခွဲနဲ့ ကျိုင်းလပ် မြို့နယ်ခွဲတွေမှာကတော့ လွတ်လပ်စွာ သွားလာခွင့် ရပါတယ်။ ကျန်မြို့နယ်နဲ့ မြို့နယ်ခွဲအားလုံးမှာ မြို့ပေါ်မှာတော့ လွတ်လပ်စွာ သွားလာခွင့်ရပေမယ့် မြို့ပြင်ထွက်မယ် ဆိုရင်တော့ ခွင့်ပြုချက် တောင်းရမှာပါ” ဟု ဦးစိုင်းဘုန်းတင့်က ဆိုသည်။
ယင်းသို့ တားမြစ်ထားရခြင်းမှာ ပြည်ထဲရေးဝန်ကြီးဌာနမှ ၁၅.၁.၂၀၁၃ ရက်စွဲပါ ကြေညာစာအမှတ် ၇၇/၂၀၁၃ အရ ခရီးသွားဧည့်သည်များ၏ လုံခြုံရေးအတွက် ဖြစ်ကြောင်း ၎င်းကရှင်းပြသည်။
“ဒီလိုခွင့်ပြုပေးလိုက်တော့ ရန်ကုန်က ခရီးသွားကုမ္ပဏီတွေ အနေနဲ့ အာမခံချက် ရှိသွားတာပေါ့။ အရင်ကဆို မြန်မာနိုင်ငံ လာဖို့ နိုင်ငံခြားသားတွေက တစ်နှစ်လောက် ကြိုတင်လက်မှတ် ဝယ်ထားတယ်။ အဲဒီမှာ နိုင်ငံတော်က ရုတ်တရက် ပိတ်လိုက်တော့ ကုမ္ပဏီတွေ ဒုက္ခရောက်ကုန်တာပေါ့။ အခုဆို ခရီးသွားလုပ်ငန်းတွေ ဖွံ့ဖြိုးတိုးတက်လာရုံတင် မကဘူး။ ဒေသခံတွေပါ အလုပ်အကိုင် အခွင့်အလမ်းတွေ ရလာပြီး လူမှုစီးပွားတွေပါ ကောင်းမွန်လာတော့မှာပါ” ဟု မြန်မာနိုင်ငံ ဟိုတယ်လုပ်ငန်းရှင်များအသင်း (ရွှေတြိဂံဇုန်) ဥက္ကဋ္ဌ ဦးစိုးရွှေက သုံးသပ်ပြောဆိုသည်။
လူဝင်မှုကြီးကြပ်ရေးနှင့် အမျိုးသား မှတ်ပုံတင်ရေး ဦးစီးဌာနသည် ထိုင်းနိုင်ငံရှိ မြန်မာသံရုံး၏ ခွင့်ပြု နိုင်ငံကူးလက်မှတ်ဖြင့် ပြည်ဝင်ခွင့်ဗီဇာ ရှိသူများထဲမှ ကမ္ဘာလှည့် ခရီးသွားများနှင့် လူမှုရေး အလည်အပတ် လာရောက်သူများကို လေးပတ်၊ စီးပွားရေး လုပ်ငန်းရှင်များကို ၁၀ ပတ်နှင့် ဖြတ်သန်းခွင့် ဗီဇာကို ၂၄ နာရီ ခွင့်ပြုထားကြောင်း ယင်းဌာန၏ ထုတ်ပြန်ချက်အရ သိရသည်။
ရန်နိုင်
The Voice Weekly
