ရွှေဈေး ယခုရက်ပိုင်းအတွင်း ဆက်လက် ကျဆင်းနေသော်လည်း မန္တလေးရွှေ အရောင်းအဝယ် ဈေးကွက်မှာ ယခုနှစ်ပတ်အတွင်း ဆက်တိုက် အေးနေကြောင်း မန္တလေးမြို့တော်ရှိ ရွှေ အရောင်းဆိုင်များထံမှ စုံစမ်း သိရှိရသည်။
ရွှေအရောင်းအဝယ် ဈေးကွက်သည် နှစ်စဉ် မိုးရာသီ ကာလများတွင် အရောင်းအဝယ် ပါးလေ့ရှိကြောင်း၊ ယခုနှစ်တွင် မြေယာဈေးနှုန်းများနှင့် မြေ ဝယ်ရောင်း လုပ်ကိုင်သူများစသည့် လုပ်ငန်းရှင် အများစု၏ အရောင်းအဝယ် အေးနေသောကြောင့် မန္တလေး ရွှေဈေးကွက်တွင်ပါ အရောင်းအဝယ် အေးလျက်ရှိကြောင်း အဆိုပါ ရွှေ အရောင်းဆိုင်များထံမှ ထပ်မံ စုံစမ်းသိရှိရသည်။
"အခုနှစ်ပတ်အတွင်းမှာ ရွှေ အရောင်းအဝယ်က ထက်ဝက်လောက် ကျသွားတယ်။ မြေပွဲစားတွေ၊ အထည်ဆိုင်တွေကလည်း ညည်းကြတယ်။ အရောင်းအဝယ် မဖြစ်ကြဘူး" ဟု မန္တလေးတိုင်းဒေသကြီး ချမ်းအေးသာစံ မြို့နယ်ရှိ အောင် ရွှေအရောင်းဆိုင်မှ တာဝန်ရှိသူ တစ်ဦးက ပြောကြားသည်။
ကုန်သည်များက ငွေပိုငွေလျှံများကို ရွှေဝယ်ယူမှု ရှိတတ်သော်လည်း လုပ်ငန်းအများစုမှာ အလုပ်မဖြစ်သောကြောင့် ရွှေ အရောင်း အဝယ်အေးနေခြင်းဖြစ်ကြောင်း မဟာအောင်မြေမြို့နယ်ရှိ သီရိရွှေစင် ရွှေ အရောင်းဆိုင်မှ တာဝန်ရှိသူ တစ်ဦးက သုံးသပ် ပြောကြားသည်။
"အခုရက်ပိုင်းမှာ ရွှေဈေးက ကွာလည်း တစ်ထောင်၊ နှစ်ထောင်ပဲ၊ လုပ်ငန်းတွေလည်း တော်တော် ပါးကြတယ်" ဟု ၎င်းက ဆိုသည်။
"အခုရက်ပိုင်းမှာတော့ ဒေါ်လာဈေး ပြန်ကျတယ်။ နောက်ရွှေအရောင်းအဝယ် ကတော့ ပုံမှန်ပဲ၊ ဒီရာသီမှာတော့ အရောင်းအဝယ်က အေးတယ်" ဟု ၎င်းက ဆိုသည်။
လက်ရှိ မန္တလေးမြို့တော် ရွှေဈေးနှုန်းမှာ မီးလင်းအခေါက်ရွှေ တစ်ကျပ်သား လျှင် ၇၉၀,၀၀၀ ကျပ်၊ ဒင်္ဂါးရွှေ ၆၃၀,၀၀၀ ကျပ်၊ ၁၅ပဲရည် ၆၆၈,၀၀၀ ကျပ် ရှိကြောင်း မန္တလေးမြို့တော်ရှိ ရွှေ အရောင်းဆိုင်များထံမှ စုံစမ်း သိရှိရသည်။
ဖြိုးဖြိုးဇော်
The Voice Weekly
