ဧရာဝတီတိုင်း ဒေသကြီး ကျောင်းကုန်းမြို့နယ် ဓနှုန်းချောင်းကျေးရွာတွင် ထွန်တုံး တိုက်ပွဲဝင်ခဲ့ကြသော လယ်သမားခြောက်ဦးကို တရားစွဲဆို ထားကြောင်း လယ်သမား အရေး ကူညီဆောင်ရွက်ပေး နေသော ဧရာဝတီတိုင်းဒေသကြီး တောင်သူ လယ်သမားနှင့် ရေလုပ်သား ဖွံ့ဖြိုးတိုးတက်ရေး သမဂ္ဂမှ အတွင်းရေးမှူး ဦးမောင်ငြိမ်းက ပြောကြားသည်။
ဇွန်လ၂၅ ရက်နေ့တွင် ကျောင်းကုန်း မြို့နယ်ရဲစခန်းသို့ လယ်သမားများ လာရောက်ရန် မြို့နယ်ရဲစခန်းက အသိပေးထားသည်ဟု ၄င်းကဆိုသည်။
ငါးကန်အဖြစ် ပြောင်းထားသော လယ်မြေ ၁၀ဧကအတွင်း ဆင်းကာ မေလအတွင်း ထွန်တုံးတိုက်ပွဲ ဝင်ခဲ့သဖြင့် ငါးကန်ပိုင်ရှင် ဦးစိုင်းရီက ပိုင်နက်ကျူးကျော်မှု၊ အကျိုးစီးပွား ဖျက်ဆီးမှုတို့ဖြင့် လယ်သမားခြောက်ဦးကို ကျောင်းကုန်းမြို့နယ်ရဲစခန်းတွင် တရားစွဲဆို ထားကြောင်း ထွန်တုံးတိုက်ပွဲဝင် ခဲ့သည့် လယ်သမား မန်းလှဌေးက ပြောကြားသည်။
၁၉၉၁ ခုနှစ်တွင် ဧရာဝတီတိုင်း တိုင်းမှူးဗိုလ်ချုပ်မြင့်အောင်က ငါးမွေးမြူ ရေးစီမံကိန်း လုပ်ဆောင်မည်ဟု ဆိုကာ ဓနှုန်းချောင်း ကျေးရွာရှိ လယ်သမား ၃၉ဦး ၏ လယ်မြေဧက ၃၅၀ ကျော်ကို မတရား သိမ်းယူခဲ့ကြောင်း၊ အဆင့်ဆင့် လက်လွှဲပြောင်းကာ ရောင်းချခဲ့ရာ နောက်ဆုံးတွင် ဦးစိုင်းရီ ဆိုသူကို ကျပ်သိန်း ၁၇၀၀ နှင့် ရောင်းချခဲ့ကြကြောင်း ၄င်း၏ ပြောကြားချက်အရ သိရသည်။
ကျောင်းကုန်းမြို့နယ် ရဲစခန်းသို့ ဆက်သွယ်မေးမြန်ရာ ယင်းကိစ္စနှင့် ပတ်သက်၍ မသိရှိကြောင်း တာဝန်ရှိသူတစ်ဦးက ဖြေကြားသည်။
The Voice Weekly
