ပြီးခဲ့သည့် ဇွန် ၄ ရက်နေ့က ထုတ်လွှင့်ခဲ့သည့် နိုင်ငံတော်သမ္မတ ဦးသိန်းစိန်၏ အသံလွှင့် မိန့်ခွန်း၌လည်း တည်ဆဲပြစ်မှုဆိုင်ရာ ကျင့်ထုံးဥပဒေ၊ ပုဒ်မ ၄၀၁ ပါ ပြဋ္ဌာန်းချက်များကို နိုင်ငံရေးလက်နက်တစ်ခု အနေနှင့် အသုံးပြုရန် ရည်ရွယ်ချက် မရှိကြောင်းနှင့် ကျင့် ၄၀၁(၁)အရ လွတ်မြောက်ပြီးသူ များအား ယင်းပုဒ်မဖြင့် ထပ်မံအရေးယူ အပြစ်ပေးမည် မဟုတ်ကြောင်းလည်း လူသိရှင်ကြား အတိအလင်း ကတိကဝတ်ပြုထားခဲ့သေးရာ အစိုးရ နှင့် နိုင်ငံရေးတက်ကြွလှုပ်ရှားသူ များအကြား၌ အတိုင်းအတာတစ်ခုအထိ အမြင်ရှင်းရှင်း ကြည်ကြည်လင်လင် ယုံကြည်မှု တည်ဆောက်နိုင်ကြပြီ ဟုလည်း စိတ်နှလုံးပေါ့ပါး ဝမ်းမြောက်မိခဲ့ရသေး၏။
အစိုးရသစ်လက်ထက်တွင် မြန်မာနိုင်ငံ အကျဉ်းထောင်အသီးသီးတွင် ပြစ်ဒဏ်ကျခံဆဲ အကျဉ်းသားများကို ကျင့် ၄၀၁(၁) အရ ပြစ်ဒဏ်လွတ် ငြိမ်းသက်သာခွင့် (Remission) ပြုခဲ့ရာ ယခုအကြိမ်အပါအဝင် ခုနစ်ကြိမ် ရှိခဲ့ပြီဖြစ်ပြီး အကျဉ်းသား ၂၈,၆၁၈ ဦး လွတ်မြောက်စေခဲ့ပြီး ဖြစ်သည်။ ယင်းတို့အနက် နိုင်ငံရေးအကျဉ်းသား ၃၀၀ ကျော် ပါဝင်ခဲ့သည်။ အကျဉ်းထောင် အသီးသီးတွင် နိုင်ငံရေးအကျဉ်းသား ၁၆၂ ဦး ကျန်ရှိနေသေးကြောင်း ကိုလည်း လက်ကျန် နိုင်ငံရေးအကျဉ်းသား စိစစ်ရေးကော်မတီက ဆိုသည်။ တစ်ဖန် ဤ ၂၀၁၃ အကုန်တွင် အကျဉ်းထောင်များ အတွင်း၌ နိုင်ငံရေး အကျဉ်းသား တစ်ဦးတစ်ယောက်မျှ မရှိစေရဘဲ လွှတ်ပေးမည်ဟု နိုင်ငံတော် သမ္မတက ပဋိညာဉ် ပြုထားသေးရာ ခေတ်အဆက်ဆက် အစိုးရများနှင့် လူထု အကျိုးဆောင် နိုင်ငံရေးတက်ကြွလှုပ်ရှားသူ များအကြားက ပဋိပက္ခများနှင့် “တစောင်းစေးနှင့် မျက်ချေး” ပမာ ဖြစ်နေခဲ့ကြသည့် ရှုထောင့်အမြင် မတူညီမှုများကို ပြည်ဖုံးကားချ ရင်ကြားစေ့နိုင်ခဲ့ပြီ ဟု ဆိုလောက်ဖွယ် ဖြစ်လာခဲ့သည်။
သို့ရာတွင် ဆိုခဲ့ပါ သမ္မတကြီးက လက်နှင့် ရေးသမျှ ခြေနှင့်လိုက်၍ ဖျက်နေသည့်ပမာ တရားဥပဒေစိုးမိုးရေး အကြောင်းပြ ရှေ့နောက် မညီသော “ကျားကျားမီးယပ်” အရေးယူမှုများ ကိုလည်း နားမချမ်းသာဖွယ် ဟောတစ်မျိုး၊ ဟောတစ်မျိုးကြားနေ၊ သိနေကြရ ပြန်သည်။
လက်ပံတောင်းတောင် အရေး အခင်းတွင် တာဝန်ရှိသူအသီးသီး တို့သည် ပြစ်မှုဆိုင်ရာဥပဒေ၊ အခန်း (၄) ကင်းလွတ်ရမြဲ အချက်များပုဒ်မ (၇၉) ပြဋ္ဌာန်းချက်ပါ “ဥပဒေအရ ပြုပိုင်သူက သော်လည်းကောင်း၊ ဥပဒေကို အယူအဆ လွဲခြင်းကြောင့်မဟုတ်ဘဲ အကြောင်းခြင်းရာကို အယူအဆ လွဲခြင်းကြောင့် ဥပဒေအရ ပြုပိုင်သည်ဟု သဘောရိုးနှင့် ယုံကြည်သူက လည်းကောင်း ပြုလုပ်လျှင် ထိုသို့ပြုလုပ်မှုသည် ပြစ်မှုမမြောက်” ဟူသော အကာအကွယ် အောက်၌ ရေခဲနှင်းဆောင်း ရှိနေကြချိန်တွင် လက်ပံတောင်းတောင် အရေး တက်ကြွလှုပ်ရှားခဲ့သူ များအား စစ်ကိုင်းတိုင်းဒေသကြီး အစိုးရ အဖွဲ့က ပိုက်စိပ်တိုက် ဖမ်းဆီးခြင်း၊ ဖမ်းဝရမ်းထုတ်ခြင်း၊ တရားခံပြေး ကြေညာခြင်း၊ ရုံတင်တရားစွဲခြင်း၊ ထောင်ဒဏ်ချမှတ်ခြင်း များကို အရေးတကြီး စီမံချက်ကြီးတစ်ခုနှယ် တက်သုတ်ရိုက်၍ ဝိုင်းပတ်ပိတ်ဆို့ စီမံဆောင်ရွက်လျက် ရှိသည်။ အလားတူပင် နိုင်ငံအနှံ့အပြား ၌လည်း အလုပ်သမားအရေး၊ တောင်သူလယ်သမားအရေး တက်ကြွလှုပ်ရှားသူ များကို နှီးနွှယ်ရာ ဥပဒေ တစ်မျိုးမျိုးဖြင့် ရမယ်ရှာလျက် ဖမ်းဆီးအရေးယူနေခြင်း ကိုလည်း တိုး၍ တိုး၍ ဆောင်ရွက်ကြဆဲ။
လတ်တလော သတင်းကြီးနေသည့် ရုပ်ပျက်ဆင်းပျက်ဖြစ်မှု တစ်ခုမှာ ပြန်ကြားရေးဝန်ကြီးဌာန ဒုတိယဝန်ကြီး ကိုယ်တိုင်က ဆိုင်းငံ့ထားသည်ဟု တရားဝင် ပြောဆိုထားသည့် ၁၉၆၂ ခုနှစ် ပုံနှိပ်အက်ဥပဒေပုဒ်မ ၁၇(၂၀) ဖြင့် ဖမ်းဆီးတရားစွဲဆိုခြင်း ခံထားရသော Generation Wave (GW) အတွင်းရေးမှူး ဦးဝေဖြိုးအောင်ကို ပြည်မြို့နယ် တရားရုံးက ဒဏ်ငွေသုံးသောင်းကျပ် ပေးဆောင်စေရန် သို့မဟုတ် ထောင်ဒဏ်သုံးလ ကျခံစေရန် ဇူလိုင်လ ၂၆ ရက်နေ့က အမိန့် ချမှတ်လိုက်သည့်ဖြစ်စဉ် ဖြစ်သည်။ ဥပဒေ တစ်ရပ်သည် ဆိုင်းငံ့ထားစဉ် ကာလအတွင်း ဥပဒေအာဏာသက်ရောက်မှု ကင်းမဲ့နေ သည့်အတွက် ထိုသို့အသက်မဝင်သော ဥပဒေပြဋ္ဌာန်းချက်ကို အထောက်အထားပြု၍ တရားစီရင်နိုင်သလော၊ တရားစီရင်ရေးမဏ္ဍိုင်တွင် အုပ်ချုပ်ရေးမဏ္ဍိုင်က ဝင်ရောက်စွက်ဖက်၍ လွှမ်းမိုးခြယ်လှယ်နိုင်သလော၊ ဥပဒေအထက်တွင် မည်သူမျှ မရှိစေရဟူသော မူသဘောတရားသည် ကြားကောင်းရုံ ဟန်ရေးပြစကား သက်သက်ပေလော။ တိတိပပ စေ့ငု ဆင်ခြင်ကြည့်စရာ ဥပဒေရေး အယိမ်းအယိုင်တွေ လက်ကြားရေယိုရှိနေ သည်ကား ငြင်း၍မရ။
ဆိုရလျှင် အစိုးရအဖွဲ့အတွင်း အထက်အောက် စည်းနှောင်မှု (Chain of command) နှင့် ထိန်းကွပ်မှု (Check, recheck, countercheck-control System)၊ ပြည်ထောင်စုဝန်ကြီးဌာန အချင်းချင်းအကြား ပေါင်းစပ် ညှိနှိုင်းဆောင်ရွက်မှု (Coordination & Cooperation) မညီမညွတ်ဖြစ်နေသည်ကား အထင်အရှားပင်။
နိုင်ငံတော်သမ္မတ အပါအဝင် အပြုသဘောဆောင် အပြောင်းအလဲ များကို ဖော်ဆောင်လိုသူ များက တခုတ်တရ ဖန်တီးထုဆစ်နေသည့် ဒီမိုကရေစီ အခင်းအကျင်းများကို အုပ်ချုပ်ရေးမဏ္ဍိုင် အဖွဲ့အစည်းအချို့က တရားဥပဒေစိုးမိုးရေး ခေါင်းစဉ်ဖြင့် ရည်ရွယ်ချက်ရှိရှိ ကတ်ဖဲ့တိုက်၍ တရွတ်သီထိုး ဆန့်ကျင်ဖီလာ ပြုနေသည်မှာ ပေါ်လွင်နေသည်။ ဤဝိရောဓိ ဖြစ်စဉ်များသည် နာတာရှည် ကြုံတွေ့ခံစားခဲ့ကြရသည့် ပြည်တွင်းပဋိပက္ခများ ရပ်စဲရေး၊ တိုင်းရင်းသား လက်နက်ကိုင် အဖွဲ့အစည်းများနှင့် ငြိမ်းချမ်းရေးလုပ်ငန်းစဉ် များ ဖော်ဆောင်ရေး အပါအဝင် ၂၀၁၅ ခုနှစ် မတိုင်မီ လက်ရှိအစိုးရအဖွဲ့က ဆောင်ရွက်ပေးပါမည်ဟု ကတိကဝတ်ပြုထားသည့် အရေးအရာပေါင်း များစွာ တို့အပေါ်တွင် တန်ပြန် အကျိုးသက်ရောက်မှုများ ပေါ်ပေါက်လာစေ နိုင်သည်ကို အလေးအနက် သတိမူကြရန်လိုပါသည်။
ပြည်ထဲရေးဝန်ကြီးဌာန အပါအဝင် အုပ်ချုပ်ရေးမဏ္ဍိုင်ရှိ ဌာန၊ အဖွဲ့ အစည်းအသီးသီး တို့သည် တည်ဆဲ ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံ အခြေခံဥပဒေ (၂၀၀၈ ခုနှစ်)၊ အခန်း (၃) ပုဒ်မ ၅၇ ပါ “နိုင်ငံတော် သမ္မတနှင့် ဒုတိယသမ္မတ များသည် နိုင်ငံတော်ကို ကိုယ်စားပြုသည်”၊ ပုဒ်မ ၅၈ ပါ “နိုင်ငံတော်သမ္မတသည် ပြည်ထောင်စုသမ္မတ မြန်မာနိုင်ငံတော် တစ်ဝန်းလုံးတွင် နိုင်ငံသားအားလုံး၏ အထွတ်အထိပ်နေရာ ရရှိသည်” ဟူသော ပြဋ္ဌာန်းချက်များကို လျစ်လျူရှုရန် မသင့်။ “တစ်ရုံးတစ်ထုံး” ငါတကော ကောခဲ့ကြခြင်းဖြင့် နိုင်ငံနှင့် နိုင်ငံသားတို့ဘဝ ဤအခြေအထိ တွင်းဆုံးကျ ခဲ့ကြရသည် ကိုလည်း မျက်ခြည်မပြတ်သင့်။
နိုင်ငံတော်သမ္မတသည် နိုင်ငံတော်၏ မျက်နှာဖြစ်သကဲ့သို့ နိုင်ငံတော် သမ္မတ၏ ကတိကဝတ်နှင့် လူသိရှင်ကြား နုတ်ထွက်စကား များသည်လည်း “ဆိုခဲစေမြဲစေ”၊ လူရိုသေရှင်ရိုသေ ဖြစ်စေဖို့ ဝိုင်းဝန်း ထိန်းသိမ်းပေးကြရန် မှာလည်း အုပ်ချုပ်ရေးမဏ္ဍိုင်တွင် အမှန်တကယ် တာဝန်ရှိနေပါကြောင်း တိုက်တွန်း လိုပေသည်။
ဇေယျမင်းသျှင်
The Voice Weekly
