နှစ်ပေါင်း ၂၀ ခန့် အာဇာနည်နေ့နှင့် ပတ်သက်သည့် ဟောပြောပွဲ၊ စာစီစာကုံးပြိုင်ပွဲများ လုံးဝ မရှိခဲ့သည့်အတွက် အာဇာနည် ပုဂ္ဂိုလ်များနှင့် အာဇာနည်နေ့အပေါ် ကျောင်းသား လူငယ်များ၏ ခံစားချက်၊ အလေးထားမှု များ လျော့ပါးခဲ့သည်။ ထို့ကြောင့် ကချင်ပြည်နယ် မိုးညှင်း ဒီဂရီကောလိပ်မှ သမိုင်းအဓိက နောက်ဆုံးနှစ်ကျောင်းသား မောင်နိုင်လင်းထိုက်၏ အာဇာနည် ချစ်စိတ်ကို ဂုဏ်ပြုသောအားဖြင့် ၎င်းရေးသားထားသည့် ဆောင်းပါးကို ဖော်ပြလိုက်ပါသည်။
(အယ်ဒီတာ)
အာဇာနည်ဆိုသည်မှာ မြန်မာ အဘိဓာန်၌ ‘လူသာမန်တို့ထက် လက်ရုံးရည်၊ နှလုံးရည် ထူးကဲ သာလွန်၍ အများအကျိုးအတွက် အသက်ကို စွန့်လွှတ်နိုင်သူ’ ဟု အဓိပ္ပာယ် ဖွင့်ဆိုပါသည်။ မြန်မာနိုင်ငံတွင် နေ့ထူးနေ့မြတ်များကို ရုံးပိတ်ရက်အဖြစ် သတ်မှတ်၍ ဆိုင်ရာ နေ့အသီးသီး၏ သမိုင်းအကြောင်းကို အမျိုးသားရေး အသိယှဉ်၍ ဟောပြောကြလေ့ ရှိပါသည်။ နှစ်စဉ် ဇူလိုင်လ ၁၉ ရက်နေ့၌ ကျရောက်သော အာဇာနည်နေ့တွင် ကာလအတန်ကြာ မတူညီသော အမြင်ရှိသူတို့ ကြားဝယ် မျက်နှာငယ်ခဲ့ရသည်ကတော့ ငြင်းမရနိုင်ပေ။ လုပ်ရပ်တွင် သက်ဝင်နေသော စေတနာများကို အများ သိကြသည့်အတွက် သီးခြား သက်သေ မပြလိုပေ။ အပြောင်းအရွှေ့ကြားမှ (၆၅) နှစ်မြောက် အာဇာနည်နေ့ အခမ်းအနားသို့ နိုင်ငံတော် ဒုတိယ သမ္မတ ဒေါက်တာ စိုင်းမောက်ခမ်း တက်ရောက်သည်မှ စ၍ ခံစားခဲ့ရသော ကျေနပ်မှု ပီတိမှာ အများနှင့် ထပ်တူ ကျလိမ့်မည်ဟု ထင်ပါသည်။ အာဇာနည်နေ့သည် မှေးမှိန် ပျောက်ကွယ်စေရန် စီမံ ဆောင်ရွက်နိုင်သောနေ့ မဟုတ်ပါ။
နိုင်ငံတော် တည်ဆောက်ရေး၏ အရေးကြီးသော အခန်းကဏ္ဍတိုင်းကို ဒီမိုကရေစီ စနစ်အတိုင်း ဗိုလ်ချုပ်ကဲ့သို့ စွမ်းစွမ်းတမံ ဆောင်ရွက်နိုင်မည့်သူအား ပညာရပ်ဝန်းမှ မွေးထုတ်ပေးနိုင်ရေး ပျောက်ကွယ်ခဲ့ရသည်နှင့် တစ်ပြိုင်နက် ယနေ့ခေတ် လူငယ်များသည် ပျောက်သောလမ်းမှာ စမ်းတဝါးဝါး ဖြစ်ခဲ့ကြရတော့သည်။ အင်အား ကြီးမားသော မူးယစ်ဆေးဝါး လှိုင်းဒဏ်များကြား ဘဝ အိပ်မက်တို့ ဝေဝါးခဲ့ကြရသည်။ အားကောင်းမောင်းသန် ပညာရေး စီမံကိန်းများအကြား နွမ်းလျ အိမ်ပြန်ခဲ့ရသည့် နေ့ရက်များက အစီအရီ။ စီးပွားရေး ပန်းတိုင်များကြား ပြည်ပသို့ လျင်လျင်မြန်မြန် ရောက်ရှိ သွားကြရတော့သည်။ အာဇာနည်ကို မွေးဖွားရန် ကြိုးပမ်းသူများသည်လည်း ဖျက်ချခဲ့ကြရတော့သည့်အတွက် တိုင်းပြည်ချစ်သော ပြည်သူများ အကြားဝယ် မျှော်တလင့်လင့်နှင့် အသက်ရှင်ရင်း သမိုင်းရွေ့ခဲ့ရသည်ကတော့ လက်ခံရမည်သာ။
ယခုအခါ ပြည်သူ တစ်ဦးချင်း၏ စွမ်းဆောင်ရည် ပြည့်ဝမှု၊ နိုင်ငံကြီးသား ပီသမှု၊ ခွင့်တူညီမျှ ဝါဒ ဖြူစင်မှုများနှင့်အတူ အမျိုးသားရေး စိတ်ဓာတ်ကို မှန်မှန်ကန်ကန် မွေးမြူကြရန် အထူး လိုအပ်ပါသည်။ မြန်မာနိုင်ငံ၏ အခြေအနေ အရပ်ရပ်သည် ပုဂ္ဂိုလ်စွဲ ရှာဖွေခြင်းထက် တစ်ဦးချင်းစီတွင် အာဇာနည် စိတ်ဓာတ် ကိန်းဝပ်ရန် လိုပါသည်။ ဗိုလ်ချုပ်သည် အာဇာနည်အဖြစ် စတင် မွေးဖွားလာသည် မဟုတ်ဘဲ ဖြတ်သန်းခဲ့ရသော သမိုင်းများကသာ အာဇာနည်အဖြစ် မွေးဖွားစေခြင်း ဖြစ်သည်။ ဗိုလ်ချုပ်အောင်ဆန်း၏ ဦးဆောင်မှု၌ ညီညွတ်စွာ လိုက်ပါခဲ့ကြကာ ၁၉၄၀ တွင် ဖွဲ့စည်းခဲ့သော ဗမာ့ ထွက်ရပ်ဂိုဏ်းနှင့် ဂျပန်ပြည်သို့ လျှို့ဝှက် သွားရောက် စစ်ပညာ သင်ကြားခဲ့ကြသော ရဲဘော် သုံးကျိပ် သမိုင်းတို့သည် အမျိုးသား စည်းလုံးမှု၏ အစ၊ ညီညွတ်မှု၏ နိဒါန်း ဖြစ်သည်။ ထို့ကြောင့် ၁၉၄၁ ခုနှစ် ဒီဇင်ဘာ ၂၆ ရက်နေ့၌ မြန်မာ့ တပ်မတော်၏ သန္ဓေ (B.I.A) ဗမာ့ လွတ်လပ်ရေး တပ်မတော်ကို မွေးထုတ်နိုင်ခဲ့ခြင်း ဖြစ်သည်။ မတူညီသော ပစ္စုပ္ပန် အခြေအနေ အသီးသီး ဖြစ်ကြသော်လည်း အချိန်အခါနှင့် လိုက်လျော ညီညွတ်စွာ ပြည်သူ တစ်ဦးချင်းစီ၌ သမိုင်း တည်ဆောက်နိုင်ရေး၊ အမျိုးသား နိုင်ငံရေး အသိစိတ်ဓာတ် ရှင်သန် သက်ဝင် ထက်မြက်နိုင်ရေးသည် ပန်းတိုင်အဖြစ် တူညီမျှစွာ လှမ်းချီကြရန် လိုပါသည်။
အမျိုးသား ခေါင်းဆောင်ကြီး ဗိုလ်ချုပ်အောင်ဆန်း၏ ရဲဘော် ရဲဘက်များအပေါ် သစ္စာရှိမှု၊ ဇွဲရှိမှု၊ အပင်ပန်းခံနိုင်မှု၊ အတ္တ မာန ကင်းမဲ့မှုများကို စံထား ကြိုးစားကြရန် လိုသည်။ ခံစား နားလည်မှုတန်ဖိုး အမြင့်ဆုံး ဗိုလ်ချုပ်အောင်ဆန်းအား ပမာပြု၍ ပစ္စုပ္ပန် သမိုင်းဘီးအား ဟန်ချက်ညီညီ လှည့်ဖို့ရန်အတွက် အားလုံးတွင် တာဝန်ရှိပါသည်။ တိုတိုပြတ်ပြတ် အပြောနှင့် စိတ်မချနိုင်စွာ မိန့်ခြွေခဲ့သော ဗိုလ်ချုပ်၏ မိန့်ခွန်းများသည် ကိုယ်စီကိုယ်ငှ အမျိုးသားနိုင်ငံရေး အသိစိတ်ဓာတ် ရှင်သန်ထက်မြက် နေစေရေးပင် ဖြစ်သည်။ အခြေအနေနှင့် အချိန်အခါကို လိုက်၍ ပြတ်သားသည့် ပြောင်းလဲမှု တစ်ရပ်အဖြစ် အကူအညီလို၍ တောင်းလိုက်သည့် ဂျပန်တို့၏ မနှစ်မြို့ဖွယ် ဖက်ဆစ် ဝါဒအား ပြန်လည် တွန်းလှန် တိုက်ခိုက်ရန် ဝန်မလေးခဲ့သော ရှင်းလင်း ပြတ်သားသည့် ဗိုလ်ချုပ် လမ်းစဉ်သည် ယနေ့အချိန်တွင် သတိပြုမိကာ အတုယူသင့်လှသည်။
နိုင်ငံခေါင်းဆောင်တို့မည်သည် စည်းရုံးရေး သဘောကို နားလည်ကြသည်။ နိုင်ငံရေးသမား အမျိုးမျိုး ရှိသည့်အနက် သမိုင်းလှသော နိုင်ငံရေးသမားသည် ရှား၏။ မှန်ကန်သော သမိုင်း အမြင်ကို ရဲရဲဝံ့ဝံ့ ပေးပြီး စည်းရုံးခဲ့သည့် နိုင်ငံရေးသမားကား မြန်မာပြည်၌ သာ၍ပင် ရှား၏။ ယင်းတို့တွင်မှ အသုံးဝင် တန်ဖိုးကို ကျော်လွန်၍ မြတ်နိုး စံထား တန်ဖိုးထားရသည့် ဗိုလ်ချုပ်ကဲ့သို့ ပုဂ္ဂိုလ်မျိုးသည် သားစဉ် မြေးဆက်အထိ တန်ဖိုးရှိနေဦးမည် ဖြစ်သည်။ ဗိုလ်ချုပ်ဟုဆိုလျှင် ဗိုလ်ချုပ်အောင်ဆန်းမှန်း သိကြ၏။ နိုင်ငံရေး လုပ်ငန်းစဉ် အဆင့်ဆင့် ရိုးသားခဲ့သည်။ ရှုထောင့် အသီးသီးကို လက်တွေ့ကျကျ ရှုမြင် သုံးသပ်နိုင်သည်။ သမိုင်း အလှည့်အပြောင်းကို မျက်ခြည်ပြတ် မခံခဲ့သူဖြစ်သည်။ ယင်းမှတစ်ဆင့် လက်ရှိ နိုင်ငံတော် အစိုးရ၊ တိုင်းရင်းသား အသီးသီး၊ ပါတီ အသီးသီးနှင့် အဖွဲ့အစည်း အစုစု အရပ်ရပ်တို့သည် ကိုယ်စီ ကိုယ်ငှ တာဝန်ခံမှု၊ တာဝန်ယူသည့် စိတ်ဓာတ်ဖြင့် အကူးအပြောင်း ဒဏ်ကို ကြံ့ကြံ့ခံကာ လှည့်စားမှုမပါ၊ နိုင်ငံရေး သီလ အပြည့်ဖြင့် ရှေ့ဆက်နိုင်ကြရန် လိုပါသည်။ ရောက်အောင် သွားရမည့် ပန်းတိုင်သို့ စနစ်ဟောင်းမှ အငွေ့အသက်များ၊ အသားအမျှင်များအား တတ်နိုင်သရွေ့ ခွာချကြရန် လိုသည်။
နိုင်ငံတော် အစိုးအနေနှင့် လွတ်လပ်ရေးနှင့်အတူ မွေးဖွားလာသော တိုင်းရင်းသားအရေး၊ လက်ရှိ စိန်ခေါ်မှု ရှိနေဆဲ ပြည်သူ့ အကျိုးပြု မူဝါဒ သက်ဝင် ရှင်သန်ရေးတို့အား ကိုင်တွယ်ရာ၌ အခြေအနေ အရပ်ရပ်ကို ထည့်သွင်း စဉ်းစားလင့်ကစား သမိုင်းဝင်သည့် သန့်ရှင်းသော အစိုးရ၊ ကောင်းမွန်သော အစိုးရ၊ ဒီမိုကရေစီ အစိုးရ ဖြစ်ရေးသည်သာ၍ အရေးကြီးသည်။ ၁၉၄၇ ဇန်နဝါရီ၌ ဗြိတိန်နိုင်ငံ လန်ဒန်မြို့၌ နန်းရင်းဝန် အက်တလီနှင့် တွေ့ဆုံစဉ်က ကြုံတွေ့ခဲ့ရသော အခက်အခဲများ၊ အင်္ဂလန်မှ ပြန်လာပြီး လွတ်လပ်ရေး၏ ရောင်နီဦး တိုင်းရင်းသား စည်းလုံး ညီညွတ်မှုကို ဖော်ညွှန်းသော ပင်လုံ ညီလာခံ မီးရှူး ထွန်းညှိခဲ့သော ဗိုလ်ချုပ်အောင်ဆန်း၏ ရင်ဆိုင် ကြုံတွေ့ခဲ့ရသည့် သမိုင်း စိန်ခေါ်မှုများကြားမှ မွေးဖွားလာသော ပြည်ထောင်စုနေ့။ ဗိုလ်ချုပ်၏ နှလုံးသားဝယ် လွတ်လပ်သော မြန်မာနိုင်ငံ၊ အချုပ်အခြာပိုင်သော မြန်မာနိုင်ငံ ဖြစ်ပေါ်စေရေး ရင့်သန်နေသည့် မျိုးချစ်စိတ်ဓာတ်တို့ကို တွေ့သူတိုင်း မြင်ကြ၏။ မြင်သူတိုင်း သိကြ၏။
နိုင်ငံရေး ဖြစ်စဉ်တွင် ပါဝင်ကြသော ပုဂ္ဂိုလ် တစ်ဦးချင်းစီ၏ စိတ်အား ထက်သန်မှု၊ ဖြောင့်မတ် တည်ကြည်မှု၊ နိုင်ငံရေး သီလရှိမှုတို့သည် နိုင်ငံ တည်ဆောက်ရေး၏ စံ ပေတံများ ဖြစ်သည်။ နိုင်ငံရေး လိပ်ပြာလုံမှုကို အဆိုပါ စံနှုန်း စံထားများဖြင့် တိုင်းတာနိုင်သကဲ့သို့ ဖြတ်သန်းခဲ့ရသည့် သမိုင်း တာဝန်များအပေါ် ကျေပွန်စွာ ထမ်းဆောင်ခဲ့မှုတို့ဖြင့်လည်း အကဲဖြတ်နိုင်သည်။ ယနေ့အခါ ဇူလိုင် ၁၉ ရက်နေ့၌ ကျရောက်မည့် သမိုင်းဝင် အာဇာနည်နေ့သည် ပြည်သူတို့၏ ရင်မှာဖြစ်သော အားအင်ဖြင့် သမိုင်းဝင်ခဲ့သည်ဆိုလျှင် မှန်ပါလိမ့်မည်။ ကြာခဲ့ပြီဖြစ်သော ၁၉၄၇ ဇူလိုင် ၁၉ သည် နှစ်ကာလ ကြာလာသည်နှင့် အမျှ ပြည်သူတို့၏ နှလုံးသားထဲ၌ အုန်းအုန်းကျွတ်ကျွတ် လှိုက်လှိုက်လှဲလှဲ ရှိမှုတို့သည် ဗိုလ်ချုပ်အောင်ဆန်း အမှူးပြုသော ကျဆုံးလေပြီးသော အာဇာနည် ပုဂ္ဂိုလ်တို့၏ လုပ်ရပ် သမိုင်းမှ သက်ဝင် ရှင်သန်နေခြင်းပင် ဖြစ်ပါလိမ့်မည်။ ဂဠုန် ဦးစောတို့၏ ပက်စက်သော အကြံအစည်၊ ယုတ်မာသော လုပ်ရပ်တို့သည် မြန်မာ့ သမိုင်းတွင် အမည်းစက် စွန်းထင်းခဲ့ရသလို နိုင်ငံရေး ရှေ့လုပ်ငန်းစဉ်တွင် တိုင်းတာမရသော ဆုံးရှုံးမှုကြီးလည်း ဖြစ်သည်။ ယင်းမှ နိုင်ငံရေး သင်ခန်းစာ ယူတတ်ကြ၍ စေတနာမှန်သော ရုန်းထွက်မှုများဖြင့် နိုင်ငံသစ်ဆီ တက်လှမ်း ချီတက်သင့်လှပေသည်။
သေသောသူ ကြာလျှင် မေ့သောသူများတွင် အာဇာနည် ပုဂ္ဂိုလ်ကြီးများ မပါဝင်ပါ။ အာဇာနည်နေ့၏ အနှစ်သာရကို ယနေ့ အခြေအနေနှင့် မှန်မှန်ကန်ကန် ရှုမြင် သုံးသပ်ပြီး တိုင်းပြည် အကျိုး၊ နိုင်ငံ အကျိုးကို သယ်ပိုး ဆောင်ရွက်ကြရန် လိုပါသည်။ သမိုင်း အမှန်ကို မှတ်တမ်းတင်၍ အနာဂတ်ကို မီးမောင်းထိုးပြရန် ပျက်ကွက်ခြင်းဖြင့် သမိုင်းကို သစ္စာမဲ့သူများ အဖြစ်မှ ရှောင်လွှဲနိုင်ကြရန် လိုပါသည်။ မြန်မာ့ တပ်မတော်၏ ဖခင် လွတ်လပ်ရေး ဗိသုကာကြီး ဗိုလ်ချုပ်အောင်ဆန်း အမှူးပြုသည့် ကျဆုံးလေပြီးသော သမိုင်းဝင် အာဇာနည် မျိုးချစ် သူရဲကောင်း ပုဂ္ဂိုလ်အပေါင်းတို့ကို (၁၉) ဇူလိုင်တွင် အသိဝင်ကာ ဉာဏ်ယှဉ်သော အမျိုးသား နိုင်ငံရေး ချစ်စိတ် စေတနာဖြင့် တိုင်းပြည် ကောင်းရာ ကောင်းကြောင်း၊ တိုိးတက်ရာ တိုးတက်ကြောင်းများကို ဝိုင်းဝန်း ပုံဖော် ညှိနှိုင်းနိုင်ကြရန် ဆုမွန်ကောင်း တောင်း၍ (၆၆) နှစ်မြောက် အာဇာနည်နေ့ကို ဂုဏ်ပြုလိုက်ရပါသည်။
နိုင်လင်းထိုက် (မိုးညှင်းဒီဂရီကောလိပ်)
The Voice Weekly
