ဓားထိုးခံရ၊ ပြိုင်ကားပေါ်မှ ပစ်ချခံရ၊ သေဆုံးသည့်အပြင် မူးယစ်ပုဒ်မဖြင့်အမှုထပ်ဖွင့်ခံရ

ရန်ကုန်၊ မတ်-၂၃
လှိုင်မြို့နယ်၊ တံတားဖြူအနီး IBC အဆောက်အအုံရှေ့က မတ်လ ၁၇ ရက်တွင်(ပြိုင်ကားပေါ်မှ ဓားဒဏ်ရာများဖြင့်) ပစ်ချခံရကာ သေဆုံးသွားသူအား စစ်ဆေးရာ မူးယစ်ဆေးဝါးဆေးပြား၂၀ ကျော်တွေ့ရှိရ၍ ၎င်းကို မူးယစ်ဆေးဝါးရောင်းဝယ်သုံးစွဲမှုဖြင့် အမှုဖွင့်အရေးယူထားကြောင်း ရန်ကုန်တိုင်းရဲတပ်ဖွဲ့မှူးရုံးမှ သတင်းရရှိသည်။

လှိုင်မြို့နယ်၊ ပြည်လမ်း ၁၁ ရပ်ကွက်တွင် နေထိုင်သော သေဆုံးသူ အာမက်အေဘိုလတ်အား ၎င်းဝတ်ဆင်ထားသည့် ဂျင်းဘောင်းဘီအိတ်အတွင်း ရှာဖွေရာ WY စာတန်းပါ စိတ်ကြွရူးသွပ်ဆေးပြား ၂၈ ပြားတွေ့ရှိသဖြင့် မူးယစ်(ပ)၁/၂၀၁၃၊ မူးယစ်ပုဒ်မ ၁၉/(ဂ)၂၀(က)ဖြင့် လှိုင်မြို့နယ်ရဲစခန်း၌ အမှုဖွင့်အရေးယူဆောင်ရွက်ထားကြောင်း သတင်းရရှိသည်။

“သေဆုံးသူထံကနေ မူးယစ်ဆေးဝါးတွေ့လို့ မူးယစ်ပုဒ်မနဲ့ ထပ်မံအရေးယူထားပါတယ်။ တရားခံကိုတော့ ဆက်လက်စုံစမ်းနေပါတယ်” ဟု လှိုင်မြို့နယ်ရဲစခန်းမှူးက ပြောသည်။

အဆိုပါအခင်းဖြစ်ပွားခဲ့သည့် ပြိုင်ကားအား ယခုလ ၁၇ ရက် ည ၁၀ နာရီ မိနစ် ၃၀ အချိန်က တောင်/မြောက်လမ်းဆုံအနီး မြယမုံအိမ်ရာရှေ့တွင် သော့တန်းလန်းနှင့်တွေ့ရှိပြီး သက်သေများနှင့်ရှာဖွေရာ တရားခံအသုံးပြုခဲ့သော ဓားနှင့် ကတ်တစ်ခုရရှိသဖြင့် ဘဏ်နှင့် ချိတ်ဆက်မေးမြန်းခဲ့ရာ သေဆုံးသူလိပ်စာကို သိရှိခဲ့သည်။

ဆက်လက်၍ သေဆုံးသူ၏ ဇနီးနှင့်အလုပ်သမားထံ စုံစမ်းစစ်ဆေးရာ သေဆုံးသူသည် ၎င်း၏ မိတ်ဆွေဖြစ်သူ ကိုခိုင်(ခ) ကျော်မင်းခိုင်၏ ပြိုင်ကား ၇ဂ/၄၃၁၆ ဖြင့် ထွက်သွားခဲ့ရာမှ တရားခံဟု သံသယရှိသူ ကိုကျော်မင်းခိုင် ပျောက်ဆုံးနေကြောင်းသိရ၍ လိုက်လံစုံစမ်းဖမ်းဆီးရန် ဆောင်ရွက်နေကြောင်း ရန်ကုန်တိုင်းဒေသကြီးရဲတပ်ဖွဲ့မှူးရုံးမှ သတင်းရရှိသည်။
အေးမြတ်သူ
7Day News Journal