နေပြည်တော်၊ မတ် ၂ရ
၂၆-၃-၂၀၁၃ရက်နေ့ ၁၁၀၀ အချိန် ပဲခူးတိုင်းဒေသကြီး၊ ပေါက်ခေါင်းမြို့နယ်၊ အမှတ်(၂) ရပ်ကွက်နေ ဒေါ်ခင်ဆွေ(၆၇)နှစ်၏ နေအိမ်အနောက်ဖက်ပေ(၅၀)ခန့်အကွာရှိ အနက် ၂၄ ပေ၊ တွင်းအကျယ် ၅ ပေ၊ ဘောင်အမြင့် ၃ ပေ၊ ရေအနက် ၁၃ ပေရှိ ရေတွင်းတွင် အိမ်ချင်းကပ်နေထိုင်သူ ဒေါ်တင်နွယ်(၆၃)နှစ်မှ ရေခပ်သွားစဉ် ရေတွင်းထဲ၌ အလောင်း(၁)လောင်းပေါ်နေသည်ကို တွေ့ရှိသဖြင့် ပေါက်ခေါင်းရဲစခန်းသို့ အကြောင်းကြားခဲ့သည်။
အခင်းဖြစ်ပွားနေသည့်နေရာသို့ ပေါက်ခေါင်းမြို့နယ်ရဲတပ်ဖွဲ့မှ တပ်ဖွဲ့ဝင်များ သွားရောက် စစ်ဆေးခဲ့ရာ သေဆုံးသူမှာ ပေါက်ခေါင်းမြို့နယ် မီးသတ်ဦးစီး ဌာနမှ ဒုတက အောင်ကျော်မိုး(ခ) မန်းနီ(ခ)ဖြူဖွေး(၃၉)နှစ် ဖြစ်ပြီး ပြင်ပဒဏ်ရာ တစ်စုံတစ်ရာမရှိဘဲသေဆုံးနေကြောင်း စစ်ဆေးတွေ့ရှိ ရသဖြင့် ပေါက်ခေါင်းပြည်သူ့ဆေးရုံသို့ ပို့အပ်ခဲ့သည်။
စုံစမ်းစစ်ဆေးချက်အရ အောင်ကျော်မိုးမှာ အရက်အလွန်အကျွံသောက်စားမှုကြောင့် ကျန်းမာရေးချို့ယွင်းနေသူဖြစ်ကြောင်း၊ ၂၃-၃-၂၀၁၃ ရက်နေ့ ညပိုင်းမှစတင်၍ စိတ်မူမမှန်ဘဲ ထင်ယောင်ထင်မှားဖြစ်ကာ အော်ဟစ်ခြင်းများပြုလုပ်ပြီး ၂၄-၃-၂၀၁၃ရက်နေ့ ၀၆၁၅ အချိန်မှစ၍ ဌာနမှပျက်ကွက်နေသူဖြစ်ကြောင်း စုံစမ်းသိရှိခဲ့ရသောကြောင့် ပေါက်ခေါင်းရဲစခန်း သေမှုသေခင်း အမှတ်စဉ်(၃/၂၀၁၃)ဖြင့် စစ်ဆေးလျက်ရှိကြောင်း သတင်းရရှိသည်။
ရဲဇာနည်
