02 June 2013
မေ ၂၉ ရက်ညက RFA သတင်းဌာနမှ ည ၈ နာရီတွင် ထုတ်လွှင့်သည့် သတင်းတစ်ပုဒ်မှာ မှားယွင်းသည်ဟု ဇွန် ၁ ရက်တွင် လားရှိုးမြို့ရှိ စိတ္တသုခ ကျောင်းတိုက်မှ ဆရာတော် ဦးအကုင်္ရက မိန့်ကြားသည်။
RFA သတင်းဌာနမှ ည ၈ နာရီတွင် ထုတ်လွှင့်ခဲ့သော သတင်းတွင် ဦးခွန်ဆိုင်းဆိုသူက "ဒီမနက် ၁၁ နာရီလောက်ကနေ ပြန်စလာတယ်ခင်ဗျ။ ရန်ကင်းလမ်းကနေ စလာတယ်။ အဲဒီ့နားလောက်မှာ မွတ်စလင် တစ်ယောက်က မြန်မာအိမ် တစ်အိမ်ကို မီးသွားရှို့လိုက်တာ အဲဒီကနေ စလာတယ်။ စိတ္တသုခကျောင်းက ဘုန်းကြီးတွေရော အကုန်လုံး စုပြီးသွားပြီ။ အခုတောင် ကျွန်တော့်ဘေးက တုတ်တွေ၊ ဓားတွေ၊ ပုဆိန်တွေနဲ့ ဖြတ်သွားနေတာ" ဟူသော ပြောကြားချက်မှာ မှန်ကန်မှု မရှိဟု ဆရာတော်က ပြန်လည်ဖြေရှင်းခြင်း ဖြစ်သည်။
ထို့ပြင် စိတ္တသုခကျောင်းမှ ထုတ်ပြန်သော ကြေညာချက်တွင် RFA သတင်းဌာနမှ ပြောဆိုရေးသားသော သတင်းသည် လုံးဝ မမှန်ကန်ကြောင်းနှင့် ထိုသတင်းကြောင့် စကားလုံး တစ်လုံးစီ၏ သက်ရောက်မှုသည် စိတ္တသုခ ကျောင်းတိုက်၏ သိက္ခာကို ထိခိုက်ညှိုးနွမ်း စေသည်ဟု ရေးသားဖော်ပြ ထားသည်။ ထို့အပြင် ဘာသာ သာသနာကိုပါ ညှိုးနွမ်းစေသည့်အပြင် နိုင်ငံတကာနှင့်ပါ ရန်တိုက်ပေးနေခြင်းလည်း ဖြစ်သောကြောင့် ပြင်းပြင်းထန်ထန် ရှုတ်ချသည်ဟုလည်း ဖော်ပြခဲ့သည်။
ထိုကြေညာချက်ကို ထုတ်ပြန်ကြေညာခဲ့သည့် ဆရာတော် ဦးအကုင်္ရက "စိတ္တသုခ ကျောင်းတိုက်ရဲ့ နာမည်နဲ့ သံဃာတော်တွေက ကုလားတွေရဲ့ နေအိမ်ကို ဖျက်ဆီးတယ်လို့ ပြောတယ်။ ဦးဇင်းတို့က ဘယ်သူ့ဘက်ကမှ ပါဝင်တာ မဟုတ်ဘူး။ မှန်မှန်ကန်ကန်ပဲ နေတာပါ။ ဦးဇင်းမှာ အထောက်အထားတွေ အားလုံးရှိတယ်။ ကမ္ဘာက လူတွေအားလုံး သံဃာတော်တွေကို အထင်မှားအောင် လုပ်နေတာနဲ့ အတူတူပဲ။ တာဝန်ရှိတာက သတင်းဌာနရော၊ ပြောတဲ့ လူရောပဲလေ။ ဦးခွန်ဆိုင်းမှာလဲ တာဝန်ရှိတယ်" ဟု မိန့်ကြားသည်။
စိတ္တသုခကျောင်းသည် လားရှိုးမြို့တွင်ရှိပြီး သံဃာတော် ၂၀၀ နီးပါး သီတင်းသုံး နေထိုင်သော ကျောင်းတစ်ကျောင်းဖြစ်ကာ ဘုန်းတော်ကြီး ပညာသင်ကျောင်း ဖွင့်လှစ်ခြင်း၊ သံဃာတော်များအား စာသင်စာချ ပြုလုပ်ခြင်းနှင့် တိုင်းရင်းသား သံဃာတော်များအား မြန်မာစာပေ သင်ကြားပေးခြင်းတို့ကို ပြုလုပ်လျက် ရှိသည်ဟု သိရသည်။
လားရှိုးမြို့တွင် မေ ၂၈ ရက် ညပိုင်းမှစ၍ အကြမ်းဖက်မှုများ ဖြစ်ပွားခဲ့သောကြောင့် မေ ၃၀ ရက် နံနက်ပိုင်းမှစ၍ သီရိမင်္ဂလာ မန်ဆူရှမ်း ဘုန်းကြီးကျောင်းအတွင်း ကယ်ဆယ်ရေးစခန်း ဖွင့်လှစ်ထားပြီး နေအိမ်ဖျက်ဆီး ခံရသူများကို လက်ခံစောင့်ရှောက်ထားရာ ယခုအခါ လာရောက်ခိုလှုံသူ ၁၅၀၀ ကျော်ရှိလာကာ အများစုမှာ အစ္စလာမ် ဘာသာဝင်များဖြစ်ကြောင်း သိရသည်။
EMG
RFA သတင်း မှားယွင်းကြောင်း စိတ္တသုခကျောင်းတိုက် တုံ့ပြန်
Labels:
ပြည်တွင်းသတင်း
