ရဲတိုက်တောင်းပန်၍ စိန့်မေရီ ဘုရားကျောင်းကအမှု ကျေအေးပေး

ရန်ကုန်၊ မေ ၃၁
ဗိုလ်တထောင် မြို့နယ်ရှိ စိန့်မေရီခရစ်ယာန် ဘုရားကျောင်းဝင်းအတွင်း ဝင်ရောက်ကာ ဆန္ဒထုတ်ဖော်မှုကြောင့် ပုဒ်မ- ၂၉၅ (က)ဖြင့် အရေးယူခံထားရသူ သရုပ်ဆောင်ရဲတိုက်က တောင်းပန်သောကြောင့် ၎င်းအား စွဲဆိုထားသောအမှုကို ကျေအေးပေးခဲ့ကြောင်း အဆိုပါအမှုကို တရားလို ပြုလုပ်၍ တိုင်ကြားခဲ့သူ စိန့်မေရီကာသီဒြယ် ဘုရားကျောင်း ဂေါပကအဖွဲ့ ဥက္ကဌ ဦးခင်မောင်ဦးက ပြောကြားသည်။

“သူ့ဘက်က တောင်းပန်တော့လည်း အမှုမြန်မြန်ပြီးတာပေါ့ဗျာ။ သူ ဘုရားကျောင်းကို လာမယ်ဆိုရင်လည်း ကျွန်တော်တို့ဘက်က ခွင့်ပြုပါတယ်” ဟု သရုပ်ဆောင်ရဲတိုက်၏ တောင်းပန်မှုအပေါ် ၎င်း၏သဘောထားကို ဆက်လက်ပြောကြားသည်။

သရုပ်ဆောင်ရဲတိုက်၏ လက်မှတ်ရေးထိုး တောင်းပန်သောစာတွင် ၎င်း၏မှားယွင်းသော လုပ်ဆောင်မှုကြောင့် ယခုကဲ့သို့ ပြဿနာဖြစ်ပွားခဲ့ရမှု အတွက် စိန့်မေရီကာသီဒြယ် ဘုရားကျောင်းမှ ကျောင်းထိုင်ဘုန်းတော်ကြီး သာသနာ့အကျိုးတော်ဆောင် အဖွဲ့နှင့် ဘာသာဝင်များအားလုံးကို အနူးအညွတ် တောင်းပန်ပါကြောင်းနှင့် နောက်နောင်တွင် အလားတူ ကိစ္စရပ်များ မဖြစ်ပွားစေရန် တာဝန်ယူပါကြောင်း ဖော်ပြထားသည်။

သရုပ်ဆောင်ရဲတိုက်က “ ဒီကိစ္စနဲ့ ပတ်သက်ပြီး ကျွန်တော့်မှာ တောင်းပန်ချင်တဲ့စိတ် အပြည့်အ၀ရှိပါတယ်။ နောက်တစ်ခုက ကျွန်တော်အထဲမှာ ရှိနေစဉ်မှာ အစားအသောက်တွေ ပို့ပေး၊ ကိုယ်တိုင်လိုက်လာပြီး စိုးရိမ်ပူပန်ပေးကြတဲ့ ပရိသတ်တွေကို ကျေးဖူးတင်ပါတယ်“ ဟု ပြောကြားသည်။

သရုပ်ဆောင်ရဲတိုက်ကို ဗိုလ်တထောင်မြို့နယ် တရားရုံးက ငွေကျပ်ငါးသိန်းဖြင့် ခံဝန် ကတိထိုးပြီး အာမခံပေးခဲ့သည်။

ကိုယ်ပိုင်ဖောင်ဒေးရှင်း ထူထောင်၍ လူမှုရေးလုပ်ငန်းများ ဆောင်ရွက်နေသော သရုပ်ဆောင်ရဲတိုက်သည် မေလ ၂၈ ရက်နေ့ မွန်းလွဲပိုင်းက ဗိုလ်တထောင် မြို့နယ်ရှိ စိန့်မေရီ ခရစ်ယာန်ဘုရား ကျောင်းဝင်းအတွင်း ဆိုင်းဘုတ်ကိုင်ဆောင် ဆန္ဒဖော်ထုတ်ခဲ့သောကြောင့် သာသနာညှိုးနွမ်းစေမှု (ပုဒ်မ -၂၉၅-က) ဖြင့် ဗိုလ်တထောင်ရဲစခန်းက အမှုဖွင့်အရေးယူခဲ့ခြင်း ဖြစ်သည်။

စိန့်မေရီကာသီဒြယ် ဘုရားကျောင်း သို့ လာရောက်လေ့လာသူများနှင့် ဝတ်ပြု ဆုတောင်းသူများအတွက် နေ့စဉ် နံနက် ၈ နာရီ ၃၀ မိနစ်မှ နေ့လယ် ၁၂ နာရီအထိ တစ်ကြိမ်၊ မွန်းလွဲ ၂ နာရီမှ ညနေ ၆ နာရီ အထိတစ်ကြိမ် လာရောက်လေ့လာသူများနှင့် ဝတ်ပြု ဆုတောင်းသူများအတွက် ဖွင့်လှစ်ပေးထားပါကြောင်း ယနေ့ဖြစ်စဉ်မှာ သူတော်စင်များသာ ဝင်ရောက်ရသည့် ဓာတ်တော်မွေတော်များထားရှိရာ သန့်ရှင်းသည့်နေရာ၊ အထွတ်အမြတ်ထားရာ (Sanctuary) အတွင်းသို့ ၊ မြန်မာ့ယဉ်ကျေးမှု ဓလေ့စရိုက်နှင့် ဆန့်ကျင်သည့် မတင့်တယ်သော အဝတ်အစား (စွပ်ကျယ်လက်ပြတ်) နှင့် ဝင်ရောက်ကာ အထွတ် အမြတ်ထားရာ ဗိမာန်တော်ကို ကျောပေးလျက်၊ မသင့်တင့် မလျောက်ပတ် မလျော်ကန်သော အပြုအမူမျိုးပြုလုပ်ခြင်းကို တွေ့ရှိရသဖြင့် သက်ဆိုင်ရာမှ သတိပေး ပြောကြားခဲ့ခြင်းကို မကျေမနပ်ဖြစ်သွားပြီး ထိုမှတစ်ဖန်၊ တတိယအကြိမ်ပြန်လည် ရောက်ရှိလာရာတွင်၊ သတင်းထောက်များ၊ မီဒီယာအဖွဲ့ဝင်များခေါ်လာပြီး အသင့်ရေးလာ သော ဆိုင်းဘုတ် ကိုင်ဆောင်ကာ၊ ဘုရားကျောင်းသာသနာ့ ပုရဝဏ်အတွင်း ဝင်ရောက်ကာ၊ မည်သည့် အာဏာပိုင်အဖွဲ့အစည်း၏ ခွင့်ပြုချက်မျှ ရယူခြင်းမရှိဘဲ တစ်ကိုယ်တော် ဆန္ဒပြခဲ့ကြောင်း၊ သာသနာ့ အကျိုးဆောင်အဖွဲ့က အကြိမ်ကြိမ် မေတ္တာရပ်ခံနေသည့်ကြားမှပင် ကာယကံရှင်မှ ကိုယ်ထိလက်ရောက် စတင်ကျူးလွန်ခဲ့ကြောင်း စိန့်မေရီကာသီဒြယ် ဘုရားကျောင်း သာသနာ့ အကျိုးဆောင်အဖွဲ့က သတင်းထုတ်ပြန်သည်။
The Voice Weekly