ရွှေ ၃၀ ကျပ်သား ပျောက်ဆုံးမှုဖြင့် ဖမ်းဆီးခံရသူ အမျိုးသမီးတစ်ဦး ဧရာဝတီတိုင်းဒေသကြီး ပုသိမ်မြို့ ငဝန်မြစ်အတွင်း ပြုတ်ကျ သေဆုံး မှုကြောင့် တာဝန်ကျ ရဲတပ်ဖွဲ့ဝင်များကို အကျယ်ချုပ်ဖြင့် ဖမ်းဆီးကာ စုံစမ်းရေး ခုံရုံးဖွဲ့ စစ်ဆေးနေကြောင်း ဧရာဝတီတိုင်းဒေသကြီး ရဲတပ်ဖွဲ့မှူးရုံးထံမှ စုံစမ်းသိရှိရသည်။
ပုသိမ်မြို့ ငဝန်မြစ် တစ်ဖက်ကမ်း သပြေပင် ကျေးရွာရှိ ဦးအုန်းသန်း နေအိမ်တွင် ရွှေ ၃၀ ကျပ်သားခန့် ပျောက်ဆုံးမှုကြောင့် မသင်္ကာ၍ ဖမ်းဆီးထားသူ ဒေါ်သန်းသန်းအေး၏ ထွက်ဆိုချက်ဖြင့် သက်သေခံပစ္စည်း ရရှိမည် ဆိုသည့်အတွက် ဇွန်လ ၁၈ ရက်နေ့ ညပိုင်းက ဒေါ်သန်းသန်းအေးနှင့် ရဲတပ်ဖွဲ့ဝင်များ ငဝန်မြစ်အတွင်း သွားရောက် စစ်ဆေးရာမှအပြန် မြစ်အတွင်း ခုန်ချခြင်း ဖြစ်ကြောင်း ယင်းအမျိုးသမီးကို ဖမ်းဆီးထားသည့် သင်္ဘောကျင်း ရဲတပ်ဖွဲ့ စခန်းမှ စခန်းမှူး ရဲအုပ်ကြည်လင်းက ပြောကြားသည်။
ယင်းခိုးမှု စွပ်စွဲချက်ဖြင့် ဒေါ်သန်းသန်းအေးနှင့် ခင်ပွန်းဖြစ်သူ ဦးနန်းဝင်းကို သင်္ဘောကျင်း ရဲစခန်းက ဖမ်းဆီးထားခြင်း ဖြစ်ကြောင်း ယင်းရဲစခန်းထံမှ သိရသည်။
ပုသိမ်မြို့ ဈေးချောင်းလမ်း တံတားအနီးတွင် ဇွန်လ ၁၉ ရက်နေ့နံနက်ပိုင်းက အဆိုပါ အမျိုးသမီး အလောင်း ပေါ်လာပြီး လက်ထိတ်နောက်ပြန် ခတ်ထားကာ ခြေထောက်နှစ်ဖက်ပူး၍ ကြိုးချည်ထားကြောင်း မျက်မြင်တစ်ဦးက ပြောဆိုသည်။
ဒေါ်သန်းသန်းအေးနှင့် ခင်ပွန်းဖြစ်သူ ဖမ်းဆီးခံရမှုနှင့် ပတ်သက်၍ ဒေါ်သန်းသန်းအေး မသေဆုံးမီ အချိန်ကတည်းက မိသားစုဝင်များက အမှတ်(၁) ရဲစခန်း (အသည်ကြီး)၊ အမှတ်(၂)ရဲစခန်း (ကိုးသိန်း) နှင့်သင်္ဘောကျင်း ရဲစခန်းတို့သို့ ဆက်သွယ် စုံစမ်းသော်လည်း အဖြစ်မှန်ကို ပြောကြားခြင်း မရှိကြောင်း မိသားစုဝင်များက ဆိုသည်။
အဆိုပါ အမျိုးသမီး သေဆုံးမှုကို ငပုတောမြို့နယ် ရဲတပ်ဖွဲ့မှူး ရဲမှူးသန်းဆွေ ခေါင်းဆောင်သည့် စုံစမ်းရေးအဖွဲ့က ဒေါ်သန်းသန်းအေး သေဆုံးချိန်က လှေပေါ်တွင် အတူလိုက်ပါလာသည့် ဒုရဲအုပ် နိုင်အောင်ကျော် အပါအဝင် ရဲတပ်ဖွဲ့ဝင် ငါးဦးနှင့် ရဲတပ်ဖွဲ့ဝင်တစ်ဦး၏ ဇနီးတို့ကို စုံစမ်း စစ်ဆေးနေကြောင်း ဧရာဝတီတိုင်းဒေသကြီး ရဲတပ်ဖွဲ့မှူးရုံးထံမှ စုံစမ်းသိရှိရသည်။
The Voice Weekly
