ရန်ကုန်၊ ဇွန် ၁၁
မြန်မာနိုင်ငံသားများ ဒုတိယ အများဆုံး သွားရောက် အလုပ် လုပ်ကိုင်နေ သည့် မလေးရှားနိုင်ငံတွင် မြန်မာလုပ်သားများအပေါ် အကြမ်းဖက် တိုက်ခိုက်မှုများ ဆက်တိုက် ကြုံတွေ့လာရပြီးနောက် ဆက်လက်နေထိုင် လုပ်ကိုင်လိုသည့် ဆန္ဒမရှိသူ မြန်မာအလုပ်သမားများ ပြန်ရန် အခက်အခဲ ရှိပါက အပြည်ပြည်ဆိုင်ရာ မြန်မာ့လေကြောင်း MAI က ၅၀ ရာခိုင်နှုန်း လျှော့၍ ထပ်မံတိုးချဲ့ ပျံသန်းပြေးဆွဲသွားရန် အစီအစဉ် ရှိကြောင်း အဆိုပါ လေကြောင်းလိုင်းမှ ဈေးကွက် မန်နေဂျာ ဒေါ်အေးမရသာက The Voice သို့ ပြောကြားသည်။
လက်ရှိတွင် ငွေကြေး အခက်အခဲရှိသော မလေးရှားရောက် မြန်မာ အလုပ် သမားများ ပြန်လာနိုင်ရန် MAI က ဇွန်လ ၁၂ ရက်မှစ၍ ဇူလိုင်လ ၁၂ ရက်နေ့ထိ လေယာဉ်လက်မှတ်ခ ၅၀ ရာခိုင်နှုန်း လျှော့ချရောင်းပေးသွား မည်ဖြစ်ပြီး တစ်ပတ်လျှင် သုံးရက် (တနင်္လာ၊ ဗုဒ္ဓဟူး၊ စနေ) ပျံသန်းပြေးဆွဲ ၍ မလေးရှားဒေသ စံတော်ချိန် ၁၂ နာရီ ၅၀ မိနစ်၊ မြန်မာဒေသစံတော်ချိန် မွန်းလွဲ ၁ နာရီ ၅၀ မိနစ်တွင် ဆိုက်ရောက်မည်ဖြစ်ကြောင်း အဆိုပါလေကြောင်းလိုင်းက သတင်း ထုတ်ပြန်သည်။
MAI လေကြောင်းလိုင်းမှ စင်းလုံးငှားလေယာဉ်ဖြင့် မလေးရှားရှိ မြန်မာ သံရုံးနှင့် ညှိနှိုင်း၍ ပျံသန်းပြေးဆွဲမည်ဖြစ်ပြီး လေယာဉ်လက်မှတ် ဝယ်ယူလိုသူများသည် MAI ကွာလာလမ်ပူရုံး ဖုန်းနံပါတ် +၆၀၃၂၀၇၂၁၂၆၁ နှင့် MAI ရန်ကုန် ရုံးချုပ် ဖုန်းနံပါတ် +၉၅၁၂၅၅၂၆၀ တို့တွင် မည်သူမဆို ဆက်သွယ် ဝယ်ယူနိုင်ကြောင်း ဒေါ်အေးမရသာက ဆိုသည်။
မလေးရှား-ရန်ကုန် MAI လေကြောင်း ခရီးစဉ် လေယာဉ်လက်မှတ်ခမှာ ပုံမှန် ဒေါ်လာ ၂၀၀ ဝန်းကျင် ရှိကြောင်း ပြည်တွင်း ပြည်ပ လေယာဉ် လက်မှတ် အရောင်းဌာနများထံမှ သိရသည်။
The Voice Weekly
မလေးရောက်မြန်မာများအတွက် MAI ထပ်မံတိုးချဲ့ ပြေးဆွဲမည်
Labels:
ပြည်တွင်းသတင်း