မြန်မာ့လေကြောင်းပိုင် MA 60 အမျိုးအစား လေယာဉ်သည် ပြေးလမ်းသို့ ဆင်းသက်စဉ် လမ်းချော်ခဲ့ရာ ယင်းသည် တစ်လအတွင်း ဒုတိယအကြိမ်မြောက် လမ်းချော်မှု ဖြစ်ကြောင်း မြန်မာ့လေကြောင်းထံမှ သိရသည်။
မော်လမြိုင်-ကော့သောင်း ပြေးဆွဲနေသော မြန်မာ့လေကြောင်းပိုင် MA 60 လေယာဉ်အမှတ် XY_AIP သည် ဇွန်လ ၁၀ ရက် မွန်းလွဲ ၁ နာရီ ဝန်းကျင်တွင် ကော့သောင်းမြို့ လေဆိပ်သို့ ဆင်းသက်စဉ် မိုးရေကြောင့် ဘီးချော်ခဲ့ပြီး လူထိခိုက်မှု မရှိကြောင်း မြန်မာ့လေကြောင်း (မော်လမြိုင်) ရုံးထံမှ စုံစမ်းသိရှိရသည်။
သို့ရာတွင် ကော့သောင်းမြို့နယ် ရဲတပ်ဖွဲ့ စခန်းထံ မှတ်တမ်းများ အရမူ ခရီးသည် ၅၃ ဦး၊ လေယာဉ်မှူး၊ လေယာဉ် မောင်မယ်လေးဦးနှင့် လေယာဉ် တာဝန်ကျ ရဲတပ်ဖွဲ့ဝင် နှစ်ဦးပါသော လေယာဉ်သည် ကော့သောင်း လေယာဉ်ကွင်းသို့ ဆင်းသက်စဉ် ရှေ့ဘီး အတင်အချ ဟိုက်ဒရောလစ်စက် မကောင်းသဖြင့် ပြေးလမ်း အပြင်ဘက် ပေ၂၀၀ ခန့် ချော်ကာ လေယာဉ် ခြံစည်းရိုး အပြင်ဘက် ခြုံတောသို့ တိုးဝင်းခဲ့ တောင်ပံ နှစ်ဖက်ရှိ ပန်ကာနှစ်လုံး၏ ဒလက်များ ပျက်စီးခဲ့ကြောင်း သိရသည်။
“လေယာဉ်ရှေ့ပိုင်း အထိတောင် သွားလို့မရဘူး။ ခရီးသည်တွေ အကုန်လုံး နောက်ပေါက်က ထွက်ရတယ်။ အခုထက်ထိ ဒီအတိုင်းဘဲ မရွှေ့ရသေးဘူး” ဟု အဆိုပါ စခန်းတာဝန်ရှိသူ တစ်ဦးက ယနေ့မွန်းလွဲ ၃ နာရီ မိနစ် ၅၀ က ဆိုသည်။
မေလ ၁၆ ရက်နေ့ကလည်း မြန်မာ့လေကြောင်းပိုင် ခရီးသည် ၅၅ ဦးပါသော ဖော်ကာ လေယာဉ်သည် မိုင်းဆတ်လေဆိပ်သို့ ဆင်းရာတွင် ဘရိတ်ပိုင်း ဆိုင်ရာ ချွတ်ယွင်းခဲ့သဖြင့် အရှိန်လွန်ပြီး လေယာဉ်ပြေးလမ်းကို ကျော်ကာကိုက် ၂၀၀ အကွာရှိ ခြံစည်းရိုးတွင် ရပ်တန့်ခဲ့သောကြောင့် လေယာဉ်ဝဲဘက် တောင်ပံနှင့် ဘီးများ ပျက်စီးခဲ့သည့်အပြင် ခရီးသည် အမျိုးသမီးနှစ်ဦးလည်း ထိခိုက် ဒဏ်ရာရခဲ့သည့် ဖြစ်စဉ် ဖြစ်ပွားခဲ့သေးသည်။
၂၀၁၀ ပြည့်နှစ်က မြန်မာနိုင်ငံ၏ လေယာဉ်ပျံတက်ချိန် နာရီပေါင်း ၃၈၉၁၈ တွင် လေယာဉ် မတော်တဆမှု ၃၃ ခု၊ ၂၀၁၁ ခုနှစ်က လေယာဉ်ပျံတက်ချိန် နာရီပေါင်း ၄၄၀၃၀ တွင် လေယာဉ် မတော်တဆမှု ၄၆ ခု၊ ၂၀၁၂ ခုနှစ်က လေယာဉ်ပျံတက်ချိန် နာရီ ပေါင်း ၅၁၆၄၃ တွင် လေယာဉ် မတော်တဆမှု ၅၇ ခု ဖြစ်ပွားခဲ့ကြောင်း လေကြောင်း ညွှန်ကြားမှု ဦးစီးဌာန၏ တရားဝင် စာရင်းများ အရသိရသည်။
