ဗိုလ်ချုပ်ဈေးသစ် ဆိုင်ခန်းများ ယာယီဈေးသို့ ယခုလကုန် ရွှေ့မည်

ရန်ကုန်၊ ဇွန် ၁၉
မြန်မာနိုင်ငံ၏ ဒုတိယမြောက် ဆေးပစ္စည်း လက်ကားဆိုင်ကြီးများ အများဆုံး ဖွင့်လှစ်ထားသည့် ဗိုလ်ချုပ်ဈေးသစ် နေရာတွင် အထပ်မြင့် အဆောက်အအုံ များ တည်ဆောက်မည်ဖြစ်သောကြောင့် လက်ရှိ ဆိုင်ခန်းများကို ယာယီဈေးနေရာသို့ ယခုလ (ဇွန်လ) ကုန်တွင် ပြောင်းရွှေ့ရမည်ဖြစ်ကြောင်း ဗိုလ်ချုပ်ဈေးသစ်ရှိ ဈေးသာယာရေး ကော်မတီ ဥက္ကဋ္ဌ ဦးစိုးဝင်းက ပြောကြား သည်။

ရန်ကုန်မြို့ ရွှေတိဂုံဘုရားလမ်းနှင့် အနော်ရထာ လမ်းထောင့် ရှိ လေဟာပြင်ဈေးဝင်းတွင် ရှစ်ပေပတ်လည် ဆိုင်ခန်းပေါင်း ၄၃၆ ခန်းပါသော ယာယီဈေး တည်ဆောက်လျက်ရှိရာ ၉၅ ရာခိုင်နှုန်းခန့် ပြီးစီးနေ ပြီဖြစ်ကြောင်း၊ ဇွန်လကုန်တွင် ဈေးသူ ဈေးသားများကို ယာယီဈေး တွင် နေရာချထားပြီး ၂ နှစ်ခန့် ဈေးရောင်းချရမည်ဖြစ်ကြောင်း အဆိုပါ ဈေးသာယာရေး ကော်မတီထံမှ သိရှိရသည်။

အဆိုပါ ဈေးနေရာတွင် အဆင့်မြင့် အဆောက်အအုံ တည်ဆောက်ပြီးပါက မူလဆိုင် အကျယ်အဝန်းအတိုင်း နေရာ ပြန်လည်ချထားပေးမည်ဖြစ်ကြောင်း အဆိုပါ ကော်မတီထံမှ သိရှိရသည်။

"အရင်ဈေးနဲ့လည်း မဝေးဘူး။ လက်လီရော လက်ကားပါ ရောင်းတာဖြစ်လို့ ကိုယ့်ဖောက်သည်နဲ့ ကိုယ်ဆိုတော့ အရောင်းပါးဖို့လည်း မရှိပါဘူး" ဟု ဗိုလ်ချုပ်ဈေးသစ်ရှိ နိုင်ငံခြား ဆေးရောင်းချသူ တစ်ဦးက ပြောကြားသည်။

ဗိုလ်ချုပ်ဈေးသစ်နှင့် လေဟာပြင်ဈေး နေရာတွင် ဟိုတယ်၊ ကွန်ဒိုမီနီယံ၊ ရုံးခန်းများ ပါဝင်သော ၃၂ ထပ် အဆောက်အအုံ တစ်လုံး၊ ရုံးခန်းများ ပါဝင်သော၂၈ ထပ်အဆောက်အအုံတစ်လုံး၊ Residential Twin Tower နှစ် လုံး၊ ဗိုလ်ချုပ်ဈေးသစ် ဆိုင်ခန်းများ အစားထိုးရန် အဆောက်အအုံ တစ်လုံး တို့ကို ရွှေတောင် ဖွံ့ဖြိုးရေး ကုမ္ပဏီက တည်ဆောက်ရန် စီစဉ်လျက် ရှိကြောင်း ရန်ကုန်မြို့တော် စည်ပင်သာယာရေးကော်မတီ ဈေးများဌာနထံမှ သိရသည်။
The Voice Weekly