အမေရိကန် ပြည်ထောင်စုကိုရောက်နေတဲ့ ကိုမင်းကိုနိုင်နဲ့ ကိုကိုကြီးတို့နှစ်ဦးဟာ ဝါရှင်တန်ဒီစီမြို့အခြေစိုက် RFA ရုံးချုပ်ကို မနေ့က လာရောက်လည်ပတ်စဉ် ကိုမင်းကိုနိုင်က ပြောလိုက်တာပါ။
"နောက်မျိုးဆက်အတွက်လည်း စိုးရိမ်ပူပန်တယ်၊ ဒီအမေရိကရောက်လာတဲ့အခါမှာ ကလေးတွေက စဉ်းစားပုံစဉ်းစားနည်းအမျိုးမျိုးကိုလည်း သူတို့ရတယ်၊ နောက်တစ်ခုက မတူကွဲပြားမှုတွေကို ဆွေးနွေးငြင်းခုန်တတ်တဲ့ အလေ့အထသူတို့မှာရှိပြီးသား ကျွန်တော်တို့ဆီမှာရှိတဲ့ ကလေးတွေကကျတော့ ခေတ်စနစ်ကြီးတစ်ခုက ပုံသွင်းထားတာက ကျိုးနွံမှုပဲဗျ၊ ကလေးတစ်ယောက်ကို လိမ္မာတယ်လို့ပြောရင် ကျိုးနွံတာကိုဆိုလိုတာ၊ ဒီမှာတွေ့တာကျတော့ ဒီကလေးဟာ ထက်မြတ်တယ်၊ ရဲဝင့်တယ်၊ ဖောက်ထွက်စဉ်းစားတတ်တာရှိတယ်၊ ဖြန့်ပြီးစဉ်းစားတတ်တာရှိတယ်၊ စဉ်းစားပုံ စဉ်းစားနည်းကအစ အင်မတန်ကွာနေတယ်၊ ကျွန်တော်တို့ အများကြီးပြင်ရအုံးမယ်လို့ ယူဆတယ်"
ဒါ့အပြင် မြန်မာနိုင်ငံမှာ ဒီမိုကရေစီစနစ်ဖွံ့ဖြိုးဖို့အတွက် အရင်ခေတ်ကရှိခဲ့တဲ့ အမိန့်ပေးစေခိုင်းတဲ့ အကျင့်စရိုက်ကို ဖျောက်ဖို့လိုအပ်တယ်လို့လည်း ကိုမင်းကိုနိုင်က ပြောပါတယ်။
၈၈မျိုးဆက်ကျောင်းသားခေါင်းဆောင် ကိုကိုကြီးကလည်း အင်အားကြီးနိုင်ငံတွေကြားက မြန်မာနိုင်ငံကို စစ်အင်အားတည်ဆောက်ပြီး ကာကွယ်တာထက် ကျွမ်းကျင်တဲ့သံတမန် နည်းလမ်းနဲ့ ကာကွယ်တာက အကောင်းဆုံးဖြစ်တယ်လို့ အခုလိုပြောပါတယ်။
"ဒေသတွင်းမှာ အားပြိုင်မှုရှိတယ်၊ အဲ့ကြားထဲမှာ ကျွန်တော်တို့က ကျွန်တော်တို့နိုင်ငံကို ကာကွယ်ဖို့ဆိုတာက စစ်ရေးအင်အား လက်နက်အင်အားနဲ့ ကာကွယ်တာထက်ကို သံတမန်ဆက်ဆံရေးနဲ့ ဘယ်လိုအကျိုးရှိအောင် ဆက်ဆံနိုင်မလဲဆိုတာက အရေးကြီးတယ်"
ဒါ့အပြင် ပြည်တွင်းငြိမ်းချမ်းရေးရပြီး ဖွံ့ဖြိုးတိုးတက်လာအောင် တိုင်းရင်းသားတွေရဲ့ တန်းတူညီမျှရေးကို ချန်လှပ်ထားလို့မရသလို မြန်မာအပါအဝင် တိုင်းရင်းသားအားလုံး လူမျိုးမရွေး၊ ဘာသာမရွေး နိုင်ငံသားအခွင့်အရေး အပြည့်အဝရပြီး၊ တာဝန်ယူတတ်သူတွေဖြစ်လာဖို့ လိုအပ်တယ်လို့ ၈၈ မျိုးဆက်ခေါင်းဆောင်နှစ်ဦးလုံးက ပြောပါတယ်။
RFA Burmese
