ရန်ကုန်၊ ဇွန် ၂၀
တိုင်းရင်းသား ခေါင်းဆောင်များက (၆၅) နှစ်ကြာ တောင်းဆိုခဲ့သော ဖက်ဒရယ် ပြည်ထောင်စုစနစ် ကျင့်သုံးရေးကို တပ်မတော်က လက်ခံလာအောင် ဆောင်ရွက်သွားမည်ဖြစ်ကြောင်း အမျိုးသား ဒီမိုကရေစီ အဖွဲ့ချုပ် (NLD) ဥက္ကဋ္ဌ ဒေါ်အောင်ဆန်းစုကြည်က ပြောကြားသည်။
ညီညွတ်သော တိုင်းရင်းသား လူမျိုးများ မဟာမိတ်အဖွဲ့ (UNA)မှ တိုင်းရင်းသား ပါတီ ငါးခု၏ ထိပ်ပိုင်း ခေါင်းဆောင်များနှင့် ဇွန်လ ၁၈ ရက်နေ့က တက္ကသိုလ်ရိပ်သာလမ်းရှိ ဒေါ်အောင်ဆန်းစုကြည် နေအိမ်၌ တွေ့ဆုံစဉ် ၎င်းက ယင်းသို့ ပြောကြားခြင်းဖြစ်သည်။
တိုင်းပြည် အနာဂတ်အတွက် ဖက်ဒရယ် ပြည်ထောင်စုကို မဖြစ်မနေ ထူထောင်ရမည် ဖြစ်ပြီး ယင်းအတွက် အခြေခံဥပဒေ ပြင်ဆင်ရာတွင် တစ်ဆင့်ပြီး တစ်ဆင့် အချိန်ယူ လုပ်ဆောင်သွားမည် ဖြစ်ကြောင်း တပ်မတော်မှ ဖက်ဒရယ်ကို လက်ခံလာအောင် ရှင်းပြ ပြောဆိုမည်ဖြစ်ကြောင်း ဒေါ်အောင်ဆန်းစုကြည်က ပြောကြားသည်။
တိုင်းရင်းသားပါတီ ခေါင်းဆောင်များနှင့် ဒေါ်အောင်ဆန်းစုကြည်တို့ တွေ့ဆုံစဉ် ဖက်ဒရယ် ပြည်ထောင်စု ထူထောင်ရေး၊ အခြေခံဥပဒေ ပြင်ဆင်ရေးနှင့် ရွေးကောက်ပွဲစနစ်များနှင့် ပတ်သက်၍ အဓိက ဆွေးနွေးခဲ့ကြောင်း ရှမ်းတိုင်းရင်းသားများ ဒီမိုကရေစီ အဖွဲ့ချုပ် အထွေထွေအတွင်းရေးမှူး ဦးစိုင်းညွန့်လွင်က ရှင်းပြသည်။
“ကျွန်တော်တို့က ဖက်ဒရယ်စနစ်နဲ့ ပတ်သက်ရင် တောက်လျှောက်ဒါပဲ ပြောလာတာပဲ။ လုပ်ပုံလုပ်နည်း အနည်းငယ် ကွဲနိုင်တာကလွဲလို့ ဖက်ဒရယ်ရဲ့ အခြေခံသဘောတော့ အတူတူပါပဲ” ဟု ၎င်းက ဆိုသည်။
ထို့ပြင် အခြေခံဥပဒေ ပြင်ဆင်ရေးနှင့် ပတ်သက်၍ အာဏာရ ပြည်ထောင်စုကြံ့ခိုင်ရေးနှင့် ဖွံ့ဖြိုးရေး ပါတီ ကိုယ်တိုင် သဘောတူ လက်ခံလာကြောင်း ဦးစိုင်းညွန့်လွင်က သုံးသပ် ပြောကြားသည်။
၂၀၀၈ ဖွဲ့စည်းပုံ အခြေခံဥပဒေ၌ ရှေ့နောက် မညီသည့် အချက်များစွာရှိပြီး တရားရေး ကဏ္ဍအပေါ် အုပ်ချုပ်ရေးမှ လွှမ်းမိုးမှုများကို အဓိက ပြင်ဆင်ရမည်ဖြစ်ကြောင်း၊ တရားသူကြီးချုပ်ကို နိုင်ငံတော် သမ္မတက တိုက်ရိုက် ခန့်အပ်ခြင်းမှာ ဖွဲ့စည်းပုံပါ အာဏာ သုံးရပ် ခွဲဝေရေးနှင့် ကွဲလွဲနေကြောင်း ရခိုင် ဒီမိုကရေစီ အဖွဲ့ချုပ် ဥက္ကဋ္ဌ ဦးအေးသာအောင်က ပြောကြားသည်။
အဆိုပါ ညီညွတ်သော တိုင်းရင်းသားလူမျိုးများ မဟာမိတ်အဖွဲ့ UNA နှင့် ဒေါ်အောင်ဆန်းစုကြည်တို့ ဆွေးနွေးပွဲတွင် ပြည်ထောင်စု ရွေးကောက်ပွဲ ကော်မရှင်က လွှတ်တော်သို့ တင်သွင်းထားသည့် အချိုး ကျ ကိုယ်စားပြုစနစ် (PR) ကို လက်မခံရန် ဆွေးနွေးခဲ့ကြောင်း ဦးအေးသာအောင်က ဆက်လက် ပြောကြားသည်။
ပြည်သူ့လွှတ်တော် ဥက္ကဋ္ဌ သူရဦးရွှေမန်း သည် ၎င်း၏ အမေရိကန်ပြည်ထောင်စု ခရီးစဉ်အတွင်း ဇွန်လ ၁၆ ရက်နေ့က အမေရိကရောက် မြန်မာမိသားစုများနှင့် တွေ့ဆုံစဉ် ဖက်ဒရယ်ပြည်ထောင်စု ထူထောင်ရန် အခြေခံဥပဒေကို ပြင်ဆင်မည်ဟု ပြောကြားထားပြီး အခြား တိုင်းရင်းသားပါတီ အသီးသီးနှင့် လက်နက်ကိုင် အဖွဲ့အစည်းများက ဖက်ဒရယ်ပြည်ထောင်စု ထူထောင်ရန် ကြေညာ ထားသည်။
The Voice Weekly
ဖက်ဒရယ် ပြည်ထောင်စုစနစ် တပ်မတော်လက်ခံအောင် ဆောင်ရွက်မည်ဟု ဒေါ်အောင်ဆန်းစုကြည် ပြောကြား
Labels:
ပြည်တွင်းသတင်း