လယ်သမားတွေရဲ့အမြင်တွေ မြှင့် တင်ပေးဖို့ လိုအပ်နေပြီ လို့ ဒေါ်အောင်ဆန်းစုကြည်ပြော

2013-03-02
လယ်ယာစိုက်ပျိုးရေးကို အခြေခံတဲ့ မြန်မာနိုင်ငံမှာ တောင်သူလယ်သမားတွေရဲ့ စိုက်ပျိုးရေးအမြင်တွေကို ခေတ်သစ်အမြင်တွေဖြစ်လာအောင် မြှင့်တင်ပေးဖို့ လိုအပ်နေပြီလို့ အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်က တိုက်တွန်းပြောကြားခဲ့ပါတယ်။

ဒီကနေ့ မနက်ပိုင်းက နေပြည်တော်၊ ပုဗ္ဗသီရိမြို့နယ်မှာရှိတဲ့ ကျောင်းစုကျေးရွာ ဘုန်းတော်ကြီးကျောင်းမှာ ဒေသခံပြည်သူလူထုနဲ့ တွေဆုံစဉ် ဒေါ်အောင်ဆန်းစုကြည်က အခုလိုပြောလိုက်တာပါ။

ဒီကနေ့ ဒေသခံပြည်သူလူထုနဲ့ တွေ့ဆုံပွဲမှာ ဒေါ်အောင်ဆန်းစုကြည်က ပြည်သူတွေရဲ့ လိုအပ်ချက်တွေဖြစ်တဲ့ လူငယ်တွေနဲ့ ပညာရေး ၊ အလုပ်အကိုင်ရရှိရေး၊ ကျန်းမာရေး၊ တောင်သူတွေ လယ်ယာမြေသိမ်းဆည်းခံရမှု အခြေအနေတွေနဲ့ တိုင်းပြည်တိုးတက်ဖို့ဆိုရင် အစိုးရနဲ့ အဖွဲ့အစည်းတွေကိုပဲ အားမကိုးဖို့ ပြည်သူတွေကလည်း ပါဝင်ဆောင်ရွက်ဖို့ လိုတယ်လို့လည်း ပြောကြားခဲ့ပါတယ်။

ပုဗ္ဗသီရိမဲဆန္ဒနယ်က ဦးဖြိုးဇေယျာသော်က ကျန်းမာရေး အခြေအနေအတွက် သုံးလနားမှာ ဖြစ်တာကြောင့် ကော့မှူးမဲဆန္ဒနယ်က ပြည်သူ့လွှတ်တော် ကိုယ်စားလှယ် ဒေါ်အောင်ဆန်းစုကြည်က မြို့နယ်ရဲ့လိုအပ်ချက်တွေကို ကိုယ်စားခဏ တာဝန်ယူဆောင်ရွက်ပေးမှာဖြစ်ပါတယ်။ ဒီကနေ့တွေ့ဆုံပွဲကို ဒေသခံပြည်သူလူထု သုံးထောင်နီးပါး တက်ရောက်ပါတယ်။RFA Burmese