လက်ပံတောင်းတောင် ကြေးနီစီမံကိန်းနှင့် ပတ်သက်၍ ပထမအကြိမ်ဆန္ဒထုတ်ဖော်ခွင့်တောင်းခံကာ ဒေသခံ(၅၀၀)ခန့် တရားဝင်အနေဖြင့်မတ်လ(၂၈)ရက်နေ့ နေ့လည် ၁နာရီမှ ညနေ၄နာရီအထိဆန္ဒထုတ်ဖော်ခဲ့ကြသည်။
အဆိုပါဆန္ဒထုတ်ဖော်မှုကို ဆားလင်းကြီးမြို့နယ် ရဲတပ်ဖွဲ့မှူးရုံးမှငြိမ်းချမ်းစွာစုဝေးခွင့် စီတန်းလှည့်လည်ခွင့်အတွက် ဥပဒေပုဒ်မ(၅)အရမတ်လ ၂၆ ရက်နေ့ ရက်စွဲဖြင့် ခွင့်ပြုမိန့်တရားဝင်ခွင့်ပြု ပေးခဲ့ခြင်းဖြစ်ကြောင်း ဒေသခံများထံက သိရသည်။
ဒေသခံများမှာ တုံကျေးရွာထိပ်မှ ပုသိမ်- မုံရွာလမ်းဆုံထိ စီတန်းလှည့်လည်ဆန္ဒထုတ်ဖော်ခဲ့ခြင်းဖြစ်ပြီး လက်ပံတောင်းတောင်ကြေး နီစီမံကိန်း (လုံးဝ) ဖျက်သိမ်းရေး ၂၀၁၂ခုနှစ် နိုဝင်ဘာ(၂၉) ရက်နေ့ကသပိတ်စခန်းများအား အကြမ်းဖက်ခဲ့သူများ မီးလောင်ဗုံး တရားခံများဖော်ထုတ်အရေးယူရေး၊ ကြေးနီစီမံကိန်းအတွက် အသစ်ပြင်ဆင်ချုပ်ဆိုမည့် စာချုပ်(အလိုမရှိ) စသည့် တောင်းဆိုအချက်(၅)ချက်ကို ကြွေးကြော်ခဲ့ခြင်းဖြစ်သည်။
“လက်ပံတောင်းတောင် ကြေးနီစီမံကိန်းနဲ့ ပတ်သက်လို့ လက်ပံတောင်းတောင်ပတ်ဝန်းကျင်ရွာတွေဖြစ်တဲ့ တုံရွာ၊ ၀က်မှေး ၊ဆည်တည်း နဲ့ကံကုန်းရွာကလူတွေပါမယ်။ အဓိက ကတော့လက်ပန်တောင်းတောင်ကြေးနီစီမံကိန်း လုံးဝရပ်ဆိုင်းရေးကို တောင်းဆိုသွားမှာပါဟု”လက်ပံတောင်းတောင်ခြေမှ ဆည်တည်းကျေးရွာခံတစ်ဦးက ပြောသည်။
အဆိုပါဆန္ဒထုတ်ဖော်ခွင့်ကို လက်ပံတောင်းတောင်ဒေသခံတစ်ဦးဖြစ်သူဒေါ်မြင့်မြင့်အေးမှ ဦးဆောင်၍ ခွင့်ပြုမိန့်တောင်းခဲ့ခြင်းဖြစ်သည်။
“ကျမတို့ အနေနဲ့ က ဘာမှပြောစရာမရှိပါဘူး။ ဒေသခံတွေက ကိုယ့်ရဲ့ဆန္ဒကိုတရားဝင်ဖော်ထုတ်ခွင့်ရတာ စည်းကမ်းရှိရှိ နဲ့ နားလည်အောင်လုပ်စေချင်ပါတယ်။လက်ပံတောင်းတောင်နဲ့ ပတ်သက်လို့ အဆိုတင်သွင်း ထားပါတယ်။ အတက်နိုင်ဆုံးပြည်သူမနစ်နာအောင် ပြည်သူဘက်ကပဲ ရပ်တည်သွားမှာပါ။
နားလည်လို့ပဲ ဖြစ်ဖြစ်နားမလည်လို့ပဲဖြစ်ဖြစ် အားလုံးစည်းကမ်း ရှိရှိနဲ့လုပ်ဆောင်သွားစေချင်ပါတယ်။” ဟု လက်ပံတောင်းတောင်စုံစမ်းစစ်ဆေးရေးကော်မရှင်တွင် ပါဝင်သည့် ပုလဲမြို့နယ်မှ ပြည်သူ့လွှတ်တော်ကိုယ်စားလှယ် ဒေါ်ခင်စန်းလှိုင်က ၎င်း၏ အမြင်ကိုပြောသည်။
မောင်ယဉ်ကျော်-မန္တလေး(မြစ်မခ)
