နေပြည်တော် ဝဏ္ဏသိဒ္ဓိအားကစားကွင်းတွင် ပြုလုပ်သည့် ပြည်ထောင်စု အားကစားပြိုင်ပွဲ၏ ဖွင့်ပွဲပိတ်ပွဲမှာ တစ်နိုင်ငံလုံးအတိုင်းအတာ အမျိုးသားအဆင့်ထိ ခမ်းနားမှုမရှိကြောင်း မြန်မာနိုင်ငံ အားကစား ကလောင်ရှင်များ အဖွဲ့ချုပ်မှ ဝါရင့်ကလောင်ရှင် များက ဝေဖန်ပြောကြားသည်။
SEA Games အကြို ပြုလုပ်သည့် ပွဲဖြစ်၍ ဖွင့်ပွဲတွင် တိုင်းဒေသကြီး များ နှင့် ပြည်နယ်များက အားကစားသမား များ ကွင်းအတွင်း ဝင်ရောက် လာပုံ၊ နိုင်ငံတော်အလံတင်ပုံ၊ မီးရှူးမီးပန်းများ ပစ် ဖောက်ခြင်း၊ မီးရှူးတိုင် ထွန်းညှိခြင်းတို့ ပြုလုပ်ရမည်ဖြစ်ပြီး ပိတ်ပွဲ၌ မီးရှူးတိုင် ငြှိမ်းသတ်ခြင်းနှင့် နိုင်ငံတော်အလံ ပြန်ချခြင်းတို့ ပြုလုပ်ရမည်ဖြစ်သော်လည်း ဖွင့်ပွဲ၌ပင် မီးရှူးတိုင် ငြှိမ်းသတ်ခဲ့ပြီး ပိတ်ပွဲ မပြုလုပ် ခဲ့ခြင်းတို့နှင့် ပတ်သက်၍ အားကစားဆောင်းပါးများကို နှစ်ပေါင်း ၄၀ ကျော် ရေးသား လျက်ရှိသည့် ဦးခင်မောင်ထွေး (ပျဉ်းမနား)က ပြောဆို သည်။
ယင်းအားကစားပြိုင်ပွဲ၏ ဖွင့်ပွဲ တွင် လာရောက်ကြည့်ရှုသည့် ပရိသတ်များကို ဂီတပညာရှင်များ ဖျော်ဖြေတင်ဆက် ပုံမှာ တပ်မတော်အစိုးရ လက်ထက်က ကျင်းပခဲ့သည့် အမျိုးသားအားကစား ပွဲတော် အဆင့်ပင် မရှိကြောင်းလည်း ၄င်းက ထပ်လောင်း ဝေဖန်ပြောဆိုသည်။
“အားကစားနဲ့မဆိုင်တဲ့ မြေဝိုင်းအက ဖျော်ဖြေပွဲ ကြည့်နေရသလိုပဲ” ဟု ပရိသတ်များကို ဂီတပညာရှင်များ ဖျော်ဖြေတင်ဆက်ပုံနှင့် ပတ်သက်၍ ၄င်းကဆိုသည်။
"အားကစားကွင်းက ခမ်းနားသလောက် အနုပညာရှင်တွေရဲ့တင်ဆက်ပုံက အရင်ပြည်ထောင်စု အားကစားပွဲ လုပ်သလောက်တောင် မရှိဘူးဟု" အဆိုပါ ဖွင့်ပွဲအခမ်းအနားကို လာရောက်သတင်း ယူသည့် တက်လမ်း အားကစား ဂျာနယ် အယ်ဒီတာချုပ် ဦးချစ်ဝင်းမောင်က မှတ်ချက်ပြု ပြောဆိုသည်။
အဆိုပါဖွင့်ပွဲသို့ ဒုတိယသမ္မတ ဦးဉာဏ်ထွန်း ရောက်ရှိလာချိန်တွင် ရန်ကုန်မြို့က လာရောက် သတင်းယူသူများ ဝဏ္ဏသိဒ္ဓိအားကစား အတွင်း ဝင်ရောက် ဓာတ်ပုံရိုက်ကူးခြင်း မလုပ်ရန် ရဲတပ်ဖွဲ့ က တားဆီးမှုများ ရှိခဲ့သည်။
"အားကစားဝန်ကြီးဌာနက လုပ်တဲ့ပွဲမှာ အား/ကာကဝန်ထမ်းတွေ သတင်းဓာတ်ပုံ မရိုက်ရဘူး ဆိုတာတော့ မဖြစ်သင့်ဘူး" ဟု မြန်မာ့ ရုပ်မြင်သံကြား၊ မြဝတီရုပ်သံ၊ SKY NET နှင့် MRTV-4-ရုပ်သံတို့ကိုသာ သတင်းရိုက်ကူး ခွင့်ပြုခဲ့ခြင်းနှင့် ပတ်သက်၍ အားကစား ဝန်ကြီးဌာန ဓာတ်ပုံဆရာ တစ်ဦးက လုံခြုံရေး တင်းကျပ်မှုနှင့် ပတ်သက်၍ ညည်းတွား ပြောဆိုသည်။
အဆိုပါ ပြည်ထောင်စုဖလား အားကစားပြိုင်ပွဲမှာ (၂၇) ကြိမ်မြောက် SEA Games ပြိုင်ပွဲအတွက် စခန်းဝင် လေ့ကျင့်နေသည့် ကစားသမားများ၏ စံချိန်ကို အကဲဖြတ်နိုင်ရန် ရည်ရွယ်၍ ဖေဖော်ဝါရီ လ ၂၈ရက်နေ့မှ မတ်လ ၇ ရက်နေ့ ထိ အားကစားနည်း ၂၂ မျိုးကို ကျင်းပခဲ့ခြင်း ဖြစ်သည်။The Voice Weekly
ပြည်ထောင်စုဖလား အားကစားပြိုင်ပွဲ ဖွင့်ပွဲပိတ်ပွဲ အမျိုးသားအဆင့် မမီဟု အားကစားကလောင်ရှင်များ ဝေဖန်
Labels:
အားကစား