ပြဿနာများ ဖြေရှင်းရာတွင် နှစ်ဦးနှစ်ဖက် ညှိနှိုင်းကာ ငြိမ်းချမ်းစွာ ဖြေရှင်းခြင်းကသာ အကောင်းဆုံး နည်းလမ်းဖြစ်ကြောင်း (၈၈)မျိုးဆက်ကျောင်းသား ကိုမင်းကိုနိုင်က မအူပင်မြို့နယ်ရှိ ပလောင်ရွာသားများနှင့် တွေ့ဆုံစဉ် တိုက်တွန်း ပြောကြားခဲ့သည်။
ယနေ့နေ့လည် (၁၂)နာရီခန့်က ပလောင်ရွာသို့ ရောက်ရှိစဉ်ဒေသခံများအား ယခုကဲ့သို့ ပြောသွားခဲ့ခြင်းဖြစ်ပြီး အဆိုပါရွာသို့ (၈၈)မျိုးဆက် ကျောင်းသားများအဖွဲ့မှ ကိုမင်းကိုနိုင်၊
ကိုဂျင်မီ၊ ကိုကိုကြီး(စမ်းချောင်း)နှင့် ရွှေညဝါဆရာတော်လည်းကြွရောက်ခဲ့သည်။
ကိုမင်းကိုနိုင်က “နောက်နောင်ကို ပြဿနာ အမြဲရှိတဲ့ လောကကြီးမှာ ပြဿနာရှင်းတိုင်း နံပါတ်(၁) နှစ်ဖက်ညှိနှိုင်းပြီး အဖြေရှာတဲ့ ယဉ်ကျေးမှုကို ရအောင်ယူပါ။ နည်းနည်းရရင်ရမယ်။ များများရရင်ရမယ်။ ပြဿနာကတော့ ငြိမ်းသွားပြီးတော့ သဘောတူညီမှု တစ်ခုတော့ ရလာလိမ့်မယ် ”ဟု ပြောကြားသည်။
လက်ရှိအခြေအနေတွင် မလက်တို ကျေးရွာအုပ်စု၌ ဖြစ်ပွားခဲ့သော ကိစ္စများကို အစိုးရဘက်မှ လိုက်လျောညီထွေစွာ ဖြေရှင်းပေးနေသည်ကို တွေ့ရကြောင်း၊ ၎င်းအနေအထားများအရ ရွာ သူရွာသားများနေဖြင့် အရာရာကို ငုံ့ခံမနေဘဲ လိုအပ်သည့် အားစိုက်မှု လုပ်လျှင် အောင်မြင်မှု ရနိုင်ကြောင်းကို ပြသနေခြင်းဖြစ်ကြောင်း ပြောကြားသည်။
“ကျွန်တော်တို့ လိုချင်တာ ဘာလဲဆိုတော့ နောက်နောင်ကို ပြဿနာဆိုတာ တစ်ခုပြီးတစ်ခု ရှိနေမှာပဲ။ ရှိတိုင်းရှိတိုင်းမှာ အုပ်ချုပ်တဲ့သူတွေနဲ့ အုပ်ချုပ်ခံရတဲ့ သူတွေနဲ့ဟာ အမြဲတမ်း ညှိပြီးတော့ အဖြေရှာတတ်တဲ့ အခြေအနေ ရောက်သွားတာ လိုချင်တယ်။ တစ်ဖက်နဲ့တစ်ဖက် တိုက်ခိုက်ကြရင် သူနာကိုယ်နာဖြစ်တာပေါ့ ”ဟု ၎င်းက ဆက်လက်ပြောကြားသည်။
ထို့အပြင် မတရား ခံရမှုများကို ပြန်လည်တုန့်ပြန်ရာတွင်လည်းထောင်ချောက်များကို သတိထားသင့်ကြောင်းနှင့် ယင်းထောင်ချောက် များတွင်း ဝင်မိသွားပါက တည်ဆဲဥပဒေဆိုသည့် အရာနှင့် တွေ့မည်ဖြစ်ကြောင်း ပြောပြီး “ကျွန်တော်တို့ ပြည်သူတွေက စိတ်စေတနာကောင်းရှိတာ မှန်တယ်။ သတ္တိရှိတယ်ဆိုတာလည်း မှန်တယ်။ နောက်ဆုံးတစ်ခု ဥာဏ်ပညာ ရှိတာကို လိုချင်တယ်။ ဥာဏ်ပညာရှိတဲ့ သူတွေကိုမှ မတရားလုပ်လို့ မရဘူးဆိုပြီး တစ်ဖက်က လေးစားမယ်” ဟု ဆက်လက်ပြောသည်။
ယခုနှစ် ဖေဖော်ဝါရီလ(၂၆)ရက်နေ့က ဧရာဝတီတိုင်း ဒေသကြီး၊ မအူပင်မြို့နယ်၊ မလက်တို ကျေးရွာအုပ်စုရှိ ပလောင်ရွာတွင် အော့ချက် ကုမ္ပဏီဘက်မှ ၎င်းတို့ပိုင်ဆိုင်သည်ဟု ဆိုသော မြေဧက(၅၅ဝ) ကျယ်ဝန်းသော ကန်ဘောင်ကို ရွာသားများက လယ်မြေအဖြစ် ပြန်လည်လုပ်ကိုင်လိုသည်ဆိုကာ ဝင်ရောက်ရှင်းလင်းရာမှ ရွာသားများနှင့် ရဲများအကြား ပဋိပက္ခများ ဖြစ်ပွားခဲ့ရာ ရွာသား(၂၆)ဦး ထိခိုက်ဒါဏ်ရာ ရရှိခဲ့ပြီး ရဲတပ်သားတစ်ဦး သေဆုံးခဲ့သည်။
ထက်နောင်နောင်
The Myanma Age
