မိတ္ထီလာ၊ မတ် ၂၀
မန္တလေးတိုင်းဒေသကြီး မိတ္ထီလာမြို့ရှိ မြို့မဈေးကြီးတွင် ယနေ့နံနက် ၉နာရီ ခန့်က ရွှေဆံကုပ် လာရောင်းသော ဇနီးမောင်နှံ နှင့် ရွှေဆိုင်ပိုင်ရှင်တို့ ခိုက်ရန်ဖြစ်ပွားရာ ဒေသခံလူထုအကြား ရုန်းရင်းဆန်ခတ် ဖြစ်ပွားခဲ့ကြောင်း ယင်းဒေသခံများ ထံမှ စုံစမ်းသိရှိရသည်။
မိတ္ထီလာမြို့ ကွက်ငယ်အုပ်စု ပြန်ကောက်ရွာတွင် ခေတ္တ လာရောက်နေထိုင်သူ ဦးခင်မောင်ဝင်း (၄၅နှစ်) နှင့် ဇနီးဖြစ်သူ ဒေါ်အေးနိုင်(၄၆နှစ်) တို့သည် မိတ္ထီလာမြို့မဈေး အရှေ့ဘက်တန်းရှိ ဝိန့်စိန်ရွှေဆိုင်သို့ ရွှေဆံကုပ်တစ်ခုကို မတ်လ ၂၀ရက်နေ့ နံနက် ၉နာရီခွဲခန့်တွင် လာရောက် ရောင်းချ၍ ရွှေမှတ်ကျောက်တိုက်ရာမှ ရွှေဆံကုပ် ကျိုးသွားခဲကြောင်း၊ ယင်း ဆံကုပ်ကိုလည်း မူလပြောထားသည့် ကျပ်တစ်သိန်းနှစ်သောင်း မပေးဘဲ ကျပ်ငါးသောင်းရှစ်ထောင်ခန့်ဖြင့်သာ ဈေးဖြတ်ခဲ့သည့်အတွက် ရွှေရောင်းချသူ ဦးခင်မောင်ဝင်းနှင့် ရွှေဆိုင်ပိုင်ရှင် ဦးထွန်းထွန်းဦးတို့အကြား စကားများရာမှ ဦးထွန်းထွန်းဦးက ဦးခင်မောင်ဝင်းကို လက်သီးဖြင့် စတင်ထိုးခဲ့သည်ဟု ဦးခင်မောင်ဝင်းက ပြောကြားသည်။
“ကျွန်တော့်ကို လက်သီးနဲ့ထိုးတယ်။ နောက် ဆိုင်ထဲက လူနှစ်ယောက်နဲ့ ဆိုင်ရှင်ရဲ့ အမျိုးသမီး ထွက်လာပြီး ဝိုင်းရိုက်ကြတယ်။ ဘေးဆိုင်က လူရှစ်ယောက်လောက်ကပါ ဝိုင်းရိုက်မလို့ လာကြတာ။ ကျွန်တော်လည်း လမ်းမပေါ် ထွက်ပြေးပြီး အကူအညီ တောင်းခဲ့ရတယ်” ဟု ၎င်းကဆိုသည်။ ယင်းသို့ ဝိုင်းဝန်းရိုက်နှက်ရာ ဦးခင်မောင်ဝင်းကို လေးချက်ခန့် ရိုက်မိခဲ့ပြီး ရိုက်နှက်သည့် တုတ်တွင် သံပါသည့်အတွက် ဦးခေါင်း ပေါက်ပြဲခဲ့သည်ဟု ဦးခင်မောင်ဝင်းက ပြောကြားသည်။
အဆိုပါ ရွှေရောင်းချသူကို ရိုက်နှက်ခဲ့သည့် လူတစ်စုသည် ပတ်ဝန်းကျင်ရှိ လူများရောက်လာချိန်တွင် အနီးနားရှိ ရွှေဆိုင်များအတွင်း သို့ ဝင်ရောက် ထွက်ပြေးသွားခဲ့ရာမှ လူထုက မကျေမနပ်ဖြစ်ကာ ယင်းရွှေဆိုင်များ ကို ဝိုင်းထားခဲ့ကြောင်း ယင်းဈေးရှိ ဈေးသူဈေးသားများက ပြောကြားသည်။
“ကျွန်မ အမျိုးသားကို အသေသတ်ဆိုပြီး ဝိုင်းရိုက်တယ်။ ကျွန်မအကူအညီတောင်းမှ ဘေးကလူတွေက ဝိုင်းဖျန်ဖြေပေးကြတယ်” ဟု အရိုက်ခံရသူ၏ ဇနီးဖြစ်သူ ဒေါ်အေးအေးနိုင်က ဆိုသည်။
ယင်းသို့ ရွှေဆိုင်များအတွင်း ရွှေဆိုင်ရှင် ဦးထွန်းထွန်းဦးနှင့် အပေါင်းအပါများဝင်ရောက် ပုန်းခိုနေသည်ဟုယူဆ၍ ရွှေဆိုင်များကို ဖျက်ဆီးနေသော ဒေသခံလူစုကို မိတ္တီလာခရိုင် ရဲတပ်ဖွဲ့ မှူး ဒုတိယရဲမှူးကြီး မောင်မောင်မြင့် ဦးဆောင်၍ မိတ္ထီလာမြို့နယ် ရဲတပ်ဖွဲ့၊ မီးသတ်တပ်ဖွဲ့ နှင့် လူမှုရေးအသင်းအဖွဲ့များ ဝိုင်းဝန်းဖျန်ဖြေခဲ့သော်လည်း လူစုမကွဲသေးသည့် အတွက် သက်ဆိုင်ရာ မြို့နယ် သံဃာတော်များ လာရောက်ဖျန်ဖြေပေးခဲ့ရာ ညနေသုံးနာရီခွဲခန့်တွင် လူစုကွဲသွားခဲ့ကြောင်း ဒေသခံ မျက်မြင်သက်သေများက ပြောကြားသည်။
ယင်း ရွှေဆိုင်ရှင် ဦးထွန်းထွန်းဦးနှင့် အပေါင်းပါနှစ်ဦးကို ဖမ်းဆီးစစ်ဆေးလျက်ရှိကြောင်း၊ ယင်းပုဂ္ဂိုလ်များ၏ ဓါတ်ပုံများကိုပြ၍ လူစုကွဲရန် မေတ္တာရပ်ခဲ့ရသည်ဟု မိတ္ထီလာခရိုင် အထွေထွေ အုပ်ချုပ်ရေးမှူး ဦးတင်မောင်စိုးက ပြောကြားသည်။
ယင်း ရွှေဆိုင်ပိုင်ရှင် ဦးထွန်းထွန်းဦး (၂၃)နှစ် ၊ ဒေါ်မြင့်မြင့်အေး (၂၅)နှစ် နှင့် ညီညီ ( ၁၈)နှစ်တို့ကို (ပ) ၇၄ ၊ ၂၀၁၃ ပုဒ်မ ၂၉၄ ၊ ၃၂၆ ၊ ၄၂၇ ၊ ၁၁၄ ဖြင့် ဖမ်းဆီး အရေးယူလျက်ရှိကြောင်း မိတ္ထီလာမြို့နယ် ရဲတပ်ဖွဲ့စခန်း ထံမှ စုံစမ်းသိရှိရသည်။
အဆိုပါ အခြေအနေများကြောင့် လတ်တလောတွင် မိတ္ထီလာမြို့မဈေးကြီးကို ခေတ္တ ပိတ်ထားလျက်ရှိပြီး လုံခြုံရေးများ စောင့်ကြပ်ကြည့်ရှုလျက်ရှိသည်။
The Voice Weekly
မိတ္ထီလာတွင် ရွှေဆံကုပ် ရောင်းချရာမှု ပဋိပက္ခဖြစ်
Labels:
ပြည်တွင်းသတင်း