ဥက္ကံ၊ ဇူလိုင် ၄
တိုက်ကြီးမြို့နယ် ဥက္ကံမြို့ရှိ ချောင်းစောက်ကျေးရွာ အုပ်စု၊ ရေအိုးစင်ကျေးရွာ အုပ်စုရှိ ရွာရှစ်ရွာတွင် ဆင်ရိုင်းများ ဝင်ရောက်သဖြင့် စပါးခင်း ဧက ၅၀ကျော် ပျက်စီးသွားကြောင်း ရေအိုးစင်ကျေးရွာမှ ဦးစန်းဦးက ပြောကြားသည်။
တောဆင်ရိုင်းများ ဝင်ရောက်မှုများကြောင့် ရွာသူရွာသားများ ညစဉ် အိပ်ပျက်ရပြီး ဆင်ရိုင်းများ ဝင်လာပါက ရွာသူရွာသားများ စုပေါင်းကာ အိုးခွက်များ တီးခြင်း၊ သံပုံးတီးခြင်း၊ မီးတုတ်များ ထွန်းညှိကာ ခြောက်လှန့်ခြင်းတို့ ပြုလုပ်ရကြောင်း၊ ကျေးရွာနေသူများက ညဘက်များတွင် တစ်ရွာလျှင် ရွာသားရှစ်ဦးမှ ၁၅ ဦးအထိ ကင်းစောင့်နေရကြောင်း ရေအိုးစင်ကျေးရွာ နေထိုင်သူ ဦးစန်းဦးက ပြောကြားသည်။
"ဆင်တွေဝင်လာလို့ ခြောက်လှန့် ထုတ်ရတယ်၊ ဆင်တွေကလည်း စပါးခင်း တွေကို ဖြတ်ပြီးပြေးတာကြောင့် ဒီရွာတွေ မှာ ဧက ၅၀ လောက် ပျက်စီးကုန်တယ်" ဟု ၄င်းကဆိုသည်။
လွန်ခဲ့သည့် လေးရက် (ဇွန်လ ၂၉)က ချောင်းစောက်ကျေးရွာအုပ်စု၊ ကုန်းပေါ်တန်းရွာ တွင် တောဆင်ရိုင်းများ ဝင်ရောက်၍ လူတစ်ဦး ဆင်နင်းသေဆုံးမှု ဖြစ်ပွားခဲ့ပြီး နောက်ပိုင်း ချောင်းစောက်၊ ကုန်းပေါ်တန်း၊ ရေအိုးစင်၊ မျှော့ချောင်း၊ ရေတွင်းဖြူ၊ သောင်ပြင်ကုန်း၊ လျှော်ပုံ၊ ကျောက်ပြင်သာ ၊ မအူကုန်းကျေးရွာတို့တွင် နေ့စဉ် တောဆင်ရိုင်း ဝင်ရောက်မှုများ ရှိကြောင်း အဆိုပါကျေးရွာများတွင် နေထိုင် သူများထံမှ သိရှိရသည်။
တောဆင်ရိုင်း များသည် အကောင် ရေ ၂၀ ကျော်ထက်မနည်း ကျေးရွာသို့ ဝင်ရောက်မှုများ ရှိကြောင်း ညပိုင်းမျက်မြင် တွေ့ရှိသူ၊ မျှော့ချောင်းကျေးရွာတွင် နေထိုင် သူ ဒေါ်အေးဘုံက ပြောကြားသည်။
"မှောင်တာနဲ့ အပြင်ကို မထွက်ရဲဘူး။ အခု ရွာတိုင်းမှာ ဆင်ရိုင်းအန္တရာယ်လုံခြုံဖို့ လူငယ်တွေက အနည်းဆုံး ရှစ်ယောက်ကနေ ၁၅ ယောက် အလှည့်ကျ ကင်းစောင့် နေရတယ်" ဟု ချောင်းစောက်ကျေးရွာမှ ရပ်မိရပ်ဖတစ်ဦးက ပြောကြားသည်။
လတ်တလောတွင် တောဆင်ရိုင်းများ ဆက်တိုက် ဝင်ရောက်မှုများကို မြို့နယ် အုပ်ချုပ်ရေးမှူးထံ တင်ပြကာ အကူအညီ တောင်းခံမည်ဖြစ်ကြောင်း ချောင်းစောက် ကျေးရွာအုပ်စု အုပ်ချုပ်ရေးမှူးက ပြောကြားသည်။
ချောင်းစောက်ကျေးရွာတွင် ဇွန်လ ၂၉ ရက် နံနက် ၂နာရီတွင် ဆင်ရိုင်းများ ဝင်ရောက်ကာ အိမ်နှစ်လုံး ဖျက်ဆီးခံရလျှက် လူနှစ်ဦးကို ဆင်နင်းသဖြင့် အမျိုးသားတစ်ဦး သေဆုံးခဲ့ပြီး အမျိုးသမီးတွင် အောက်ပိုင်းကျိုးကြေ ဒဏ်ရာရရှိခဲ့ကြောင်း (သတင်းဖော်ပြပြီး The Voice Daily, July 2, 2013) အဆိုပါရွာတွင် နေထိုင်သူများထံမှ သိရသည်။
ယခင် တောဆင်ရိုင်းများ ကျက်စားရာ ချောင်း၊ မြောင်းများ တည်ရှိခဲ့သည့် နေရာများတွင် တဘူးလဆည် တည်ဆောက်ခဲ့မှုကြောင့် တောဆင်ရိုင်းများ သွားလာရန် နေရာ နည်းလာခြင်းနှင့် အစာရေစာ ရှားပါးလာခြင်း၊ ယခင်ဆင်များ သွားလာနေထိုင်သည့် မြေလွတ်မြေရိုင်း များကို ကုမ္ပဏီများက လုပ်ကွက်များ ဖော်ထုတ်၍ ခြံလုပ်ငန်း၊ စိုက်ပျိုးရေးလုပ်ငန်း များကြောင့် တောဆင်ရိုင်း များသည် လူများနေထိုင်ရာ နေရာများသို့ ဝင်ရောက်လာကာ အသက်အန္တရာယ် ကိုပါ ထိခိုက်မှုများ ရှိလာကြောင်း တိုက်ကြီးမြို့နယ် တိုင်းရင်းသားစည်းလုံးညီညွတ်ရေး ပါတီဥက္ကဋ္ဌ ဦးမြင့်သိန်းက ပြော ကြားသည်။
၂၀၁၁ ခုနှစ်တွင် ဥက္ကံမြို့တွင် တောဆင်ရိုင်း အနင်းခံရ၍ လူသုံးဦး သေဆုံးခဲ့ပြီး၊ ၂၀၁၂ ခုနှစ်တွင် သေဆုံးသူ လေးဦး၊ ယခု နှစ် ၂၀၁၃ ခုနှစ် ဇွန်လ ၂၉ ရက်နေ့တွင် သေဆုံးသူ တစ်ဦးရှိကြောင်း ဥက္ကံမြို့နယ် ရဲစခန်းထံမှ သိရှိရသည်။
The Voice Weekly
ဆင်ရိုင်းများ စပါး ဧက ၅၀ကျော် ဖျက်ဆီး
Labels:
ပြည်တွင်းသတင်း