တစ်လအတွင်း ကြွေးမဆပ်နိုင်သော လုပ်ငန်းရှင်များကို မွေး/ရေ တရားစွဲမည်

ရန်ကုန်၊ ဇူလိုင်၁၆
မွေးမြူရေးနှင့် ရေလုပ်ငန်း ဝန်ကြီးဌာနသို့ ကြွေးဆပ်ရန် ကျန်ရှိသော လုပ်ငန်းရှင်များ တစ်လအတွင်း ကြွေးမဆပ်နိုင်ပါက တရားစွဲဆိုမည် ဖြစ်ကြောင်း အဆိုပါ ဝန်ကြီးဌာန မွေးမြူရေးနှင့် ကုသရေးဦးစီးဌာန ညွန်ကြားရေးမှူး ဦးပြည့်စုံက ပြောကြားသည်။

မွေးမြူရေးနှင့် ရေလုပ်ငန်းဝန်ကြီး ဌာနသို့ ကြွေးဆပ်ရန် ကျန်ရှိသော လုပ်ငန်းရှင် ၄၃ဦး ရှိရာ အဆိုပါ လုပ်ငန်းရှင်များကို ဇူလိုင်လ၁၇ရက်နေ့တွင် သတိပေးစာများ ပေးပို့သွားမည်ဖြစ်ပြီး
ရက် ၃၀အတွင်း ပြန်လည် မဆပ်နိုင်ပါက တရားစွဲမည်ဟု ၄င်းကဆိုသည်။

မွေးမြူရေးနှင့် ရေလုပ်ငန်းဝန်ကြီး ဌာနသည် အစိုးရသို့ ပေးသွင်းရန်ကျန်ရှိ သည့်ကြွေးကျန်များကို ပြီးခဲ့သည့် ၂၀၁၂-၂၀၁၃ ဘဏ္ဍာနှစ်ကုန်တွင် ပြန်လည် ပေးဆပ်ရမည် ဖြစ်ခြင်းကြောင့် ယင်းသို့ကြွေး ပြန်မဆပ်သည့် လုပ်ငန်းရှင်များကို တရားစွဲဆိုရန် စီစဉ်ရခြင်းဖြစ်သည်ဟု ၄င်းက
ဆိုသည်။
"အကြွေးဆိုပေမယ့် ငွေချေးတာ မဟုတ်ဘူး။ မွေးမြူရေးအစာအကြွေးပါ။ ချေးထားတာက သန်းလေးသောင်း နှစ်ထောင်ကျော်။ ရဖို့ကျန်နေတာက သန်းနှစ်သောင်းကျော်" ဟု ၄င်းကဆိုသည်။

ရက်၃၀အတွင်း အကြွေးပြန်လည် ဆပ်ရန် သတိပေးစာ (Notice) ကိုဇူလိုင်၁၇ ရက်နေ့တွင် နေပြည်တော်ရှိ မွေးမြူရေးနှင့် ရေလုပ်ငန်းဝန်ကြီးရုံးတွင် လုပ်ငန်းရှင်များကို ပြည်ထောင်စုဝန်ကြီးက ပေးအပ်မည် ဖြစ်သည်။

မွေးမြူရေးနှင့် ရေလုပ်ငန်းဝန်ကြီး ဌာနသည်၂၀၀၇ ခုနှစ်ခန့်က စတင်၍ လုပ်ငန်းရှင်များကို မွေးမြူရေးအစာ ဝယ်ယူရန်အတွက် မွေးမြူရေးအစာများကို အကြွေး စနစ်ဖြင့် ချထားပေးခဲ့ကြောင်း၊ နာဂစ်မုန်တိုင်း တိုက်ခတ်ခဲ့သည့် ကာလအတွင်း ငါးမွေးမြူရေးကန်များ ပျက်စီးခြင်း အပါအဝင် ငွေလဲနှုန်းကျဆင်းမှု ဂယက်ပါ တွေ့ကြုံခဲ့ရသည့် အတွက် ယင်းသို့ ချေးယူထားသော အကြွေးများ ပြန်မဆပ်နိုင်ခြင်း ဖြစ်ကြောင်း မြန်မာနိုင်ငံ ငါးမွေးမြူရေး လုပ်ငန်းရှင်များအသင်း ဥက္ကဋ္ဌ ဦးသန်းလွင်ကပြော ကြားသည်။
"တရားစွဲလည်း ခံရမှာပဲ"ဟုအဆိုပါ ပုဂ္ဂိုလ်ကဆိုသည်။

မွေးမြူရေးဝန်ကြီးဌာန သည် ၂၀၁၃ခုနှစ် နှစ်ဦးပိုင်းတွင် မွေးမြူရေး အစားအစာ ထုတ်လုပ်ရောင်းချသူများ အသင်းသို့ အိန္ဒိယမှ ပဲပုပ်ဝယ်ယူရန် အတွက် ကျပ်သိန်း ၇၀၀၀ကျပ် ထုတ်ချေးခဲ့ကြောင်း အဆိုပါ အသင်း၏ ဥက္ကဋ္ဌ ဦးအုန်းလွင် က ပြောကြားသည်။

မွေးမြူရေးနှင့် ရေလုပ်ငန်းရှင်များ သည် ၂၀၁၂-၂၀၁၃ ဘဏ္ဍာနှစ် မကုန်မီ အကြွေးများကို ပြန်လည်ပေးဆပ်ရန် နှင့် ပေးဆပ်နိုင်ခြင်း မရှိပါက ဥပဒေကြောင်း အရ ထိရောက်စွာ အရေးယူဆောင်ရွက်မည် ဖြစ်ကြောင်း မွေးမြူရေးနှင့် ရေလုပ်ငန်း ဝန်ကြီးဌာန ဒုတိယဝန်ကြီး ဦးခင်မောင်အေးက ဖေဖော်ဝါရီလ အတွင်း၌ သက်ဆိုင်ရာ လုပ်ငန်းရှင်များကို မြန်မာနိုင်ငံ ငါးလုပ်ငန်း အဖွဲ့ချုပ်တွင် ကျင်းပသည့် အပတ်စဉ် အစည်းအဝေးများ၌ အသိပေး ပြောကြားခဲ့ပြီး ဖြစ်သည်။
The Voice Weekly