မာလာလာသည် ပါကစ္စတန် အနောက်မြောက်ပိုင်း ခီဘာပတ်တွန်ခဝါ ပြည်နယ်၊ ဆွပ်ဒေသအတွင်းရှိ မင်ဂိုရာ မြို့ငယ်လေးတစ်ခုတွင် မွေးဖွားခဲ့သော သာမန် မိန်းကလေး တစ်ဦးသာ ဖြစ်သည်။ ဆွပ်တောင်ကြား ဒေသတွင် တာလီဘန်တို့ စိုးမိုးလျက်ရှိပြီး အမျိုးသမီးများ ကျောင်းတက်ခွင့်ကို ပိတ်ပင်ထားရာ ဒေသတွင် သူမ လူဖြစ်လာရခြင်း ဖြစ်သည်။
၂၀၀၉ ခုနှစ် အစောပိုင်း၊ မာလာလာ အသက် ၁၂ နှစ်သမီး အရွယ်တွင် ဘီဘီစီ ဘလော့ဂ်သို့ တာလီဘန်တို့ အုပ်စိုးမှုအောက်တွင် နေထိုင်ရသော အမျိုးသမီးတို့ ဘဝအကြောင်း အမည်ဝှက်ဖြင့် ရေးသား ပေးပို့လိုက်သည်။ တာလီဘန်တို့ အုပ်စိုးမှုအောက်တွင် အမျိုးသမီးတို့သည် ပညာသင်ကြားခွင့် မရသဖြင့် အမျိုးသမီးများ ပညာသင်ကြားခွင့်ရရေးကို သူမ အမြင်ဖြင့် စာရေးကာ ပေးပို့လိုက်ခြင်း ဖြစ်သည်။
နောက်နှစ် နွေရာသီတွင် နယူးယော့ခ်တိုင်းမ် သတင်းစာကြီးက ဖြစ်ရပ်မှန် မှတ်တမ်းတင် ရုပ်ရှင် ဇာတ်လမ်းတိုလေး တစ်ခုကို သူမကို အခြေပြုပြီး လာရိုက်သွားသည်။ ထိုဒေသသို့ သတင်းအဖွဲ့က ခက်ခဲစွာ လာရောက်ပြီး စွန့်စား ရိုက်ကူးသွားသည့် သတင်းတိုလေးအား ကမ္ဘာသို့ ထုတ်လွှင့် ပြသ လိုက်ခြင်းကြောင့် မာလာလာနှင့် ပါကစ္စတန်နိုင်ငံ တာလီဘန်တို့ လက်အောက်တွင် နေထိုင်ရသည့် အမျိုးသမီးတို့ အခွင့်အရေးများ ဆုံးရှုံးနေခြင်းကို ကမ္ဘာက သိရှိသွားတော့သည်။ ထိုမှတ်တမ်း ရုပ်ရှင် လေးကြောင့် မာလာလာကို လူသိများသွားခဲ့သည်။ သတင်း မီဒီယာနှင့် ရုပ်သံ ဌာနများကလည်း လာရောက်ပြီး စုံစမ်း မေးမြန်းကာ သတင်း မီဒီယာများတွင် ရေးသား ဖော်ပြခဲ့ကြသည်။
အမျိုးသမီးများနှင့် ကလေးသူငယ်များဆိုင်ရာ ပညာသင်ခွင့်အတွက် သူမ လှုပ်ရှားမှုများကို ကမ္ဘာက အသိအမှတ်ပြုသည့်အနေဖြင့် ဒက်စ်မွန်တူးတူး ပေးအပ်သည့် နိုင်ငံတကာ ကလေးများ ငြိမ်းချမ်းရေးဆုအတွက် လျာထားခြင်း ခံရသလို၊ ငြိမ်းချမ်းရေး နိုဗယ်ဆုများလည်း ပေးရန် လျာထားခြင်း ခံရသည်။ ကမ္ဘာ့သမိုင်းတွင် အသက်အငယ်ဆုံး ထိုဆုများကို လျာထားခြင်းခံရသူ လည်း ဖြစ်သည်။ ပါကစ္စတန်နိုင်ငံ၏ အမျိုးသား လူငယ် ငြိမ်းချမ်းရေးဆုကိုလည်း ပထမဦးဆုံး ရရှိခဲ့သည်။
၂၀၁၂ ခုနှစ် အောက်တိုဘာ ၉ ရက်နေ့တွင် မာလာလာနှင့် သူငယ်ချင်းများ ကျောင်းမှ အိမ်သို့ပြန် လာသည့် ဘတ်စ်ကားကို တာလီဘန်တို့သည် ရပ်ခိုင်းပြီး မာလာလာ၏ ဦးခေါင်းနှင့် လည်ပင်းတို့ကို သေနတ်ဖြင့် ပစ်ကာ လုပ်ကြံ သတ်ဖြတ်ခဲ့သည်။ ဦးခေါင်း သေနတ် ဒဏ်ရာကြောင့် သတိမေ့သွားပြီး အသက်အန္တရာယ် စိုးရိမ်ရသည့် အနေအထားသို့ ရောက်ခဲ့သည်။ ပါကစ္စတန် ဆေးရုံမှ တစ်ဆင့် အခြေအနေ စိုးရိမ်ရသောကြောင့် ဗြိတိန်နိုင်ငံ၊ ဘာမင်ဟမ်ရှိ ‘ကွင်းအဲလိဇဘက်’ ဆေးရုံကြီးသို့ ပေးပို့လိုက်ရသည်။ အောက်တိုဘာ ၁၂ ရက်နေ့တွင် ပါကစ္စတန်ရှိ အစ္စလာမ္မစ် ဘာသာရေး ခေါင်းဆောင် ၅၀ သည် သူမကို သတ်ရန် အားထုတ်ခဲ့သည့် တာလီဘန်တို့ကို အစ္စလာမ် ဓမ္မသတ်နှင့် ဆန့်ကျင်သူများဟု ကြေညာခဲ့သည်။ တာလီဘန်တို့ကလည်း မာလာလာကို မသေမချင်း ထပ်လုပ်ကြံမည့်အပြင် သူမ၏ ဖခင်ကိုပါ သတ်ပစ်မည်ဟု ခြိမ်းခြောက်ခဲ့ကြသည်။
ယခင် ဗြိတိန် ဝန်ကြီးချုပ် ဖြစ်ခဲ့ပြီး ယခု ကုလသမဂ္ဂ ပညာရေး အထူး သံတမန်အဖြစ် တာဝန် ထမ်းဆောင်နေသော ဂေါ်ဒန်ဘရောင်းကလည်း ကုလသမဂ္ဂ၏ ပန်ကြားလွှာတွင် မာလာလာ၏ အမည်ကို ၂၀၁၅ ခုနှစ်တွင် ကလေးများအားလုံး ကျောင်းသို့ရောက်ရန် လှုံ့ဆော်သည့် ဆောင်ပုဒ် အဖြစ် သုံးရန် တင်ပြခဲ့သည်။ ထိုဆောင်ပုဒ်မှာ "I am Malala" ဖြစ်သည်။ ထိုဆောင်ပုဒ်ကို ပါကစ္စတန် သမ္မတ အဆစ်အလီဇာဒါရီထံ ဂေါ်ဒန်ဘရောင်းက လာမည့် နိုဝင်ဘာလတွင် လွှဲပြောင်း ပေးအပ်မည် ဖြစ်သည်။ ကုလသမဂ္ဂ အတွင်းရေးမှူးချုပ် မစ္စတာ ဘန်ကီမွန်းကလည်း ဇူလိုင်လ ၁၂ ရက်နေ့ (မာလာလာ မွေးနေ့) ကို ‘မာလာလာနေ့’ အဖြစ် ကျင်းပရန် ကြေညာခဲ့သည်။ အဓိက ဦးတည်ချက်မှာ ကလေးများအတွက် ပညာရေး ပန်းတိုင် မပျောက်ရေးကို ဦးတည် လုပ်ဆောင်ကြရန် ဖြစ်သည်။
၂၀၁၃ ခုနှစ် ဧပြီလ ၂၉ ရက်နေ့ TIME မဂ္ဂဇင်း မျက်နှာဖုံးတွင် ကမ္ဘာကို အလွှမ်းမိုးဆုံး ပုဂ္ဂိုလ် ၁၀၀ စာရင်းဝင်အဖြစ် မာလာလာကို ဂုဏ်ပြု ဖော်ပြခဲ့သည်။ သူမကို ဂုဏ်ပြုသည့် ဆောင်းပါးကိုလည်း ယင်းမဂ္ဂဇင်းတွင် အမေရိကန် သမ္မတဟောင်း ဘီလ်ကလင်တန်၏ သမီးဖြစ်သူ ချဲလ်ဆီးလ်ကလင်တန် က ရေးသားခဲ့သည်။
၂၀၁၃ ခုနှစ် ဇူလိုင်လ ၁၂ ရက်နေ့ မာလာလာ ၁၆ နှစ်ပြည့် မွေးနေ့တွင် ပြန်လည် ကျန်းမာလာသည့် မာလာလာကို ကုလသမဂ္ဂ လူငယ် ညီလာခံ၌ တက်ရောက် မိန့်ခွန်း ပြောကြားခွင့် ပြုခဲ့သည်။ (မိန့်ခွန်း အပြည့်အစုံကို ၁၅.၇.၂၀၁၃ နေ့ထုတ် The Voice Daily သတင်းစာတွင် ဖော်ပြခဲ့ပြီး ဖြစ်သည်။)
ကုလသမဂ္ဂ အထွေထွေ ညီလာခံသို့ ဆရာ အသစ်များ၊ ကျောင်းများ၊ စာအုပ်များ ရရှိရေးအတွက် ထောက်ပံ့ရန်နှင့် ၂၀၁၅ ခုနှစ် ဒီဇင်ဘာလတွင် ကလေးတိုင်း ကျောင်းတက်ခွင့်ရရေး၊ ပညာသင်ခွင့် ရရေးကို တိုက်တွန်း တောင်းဆိုခဲ့သည်။
မာလာလာကို ဖခင်ဖြစ်သူ ဇီယာအူဒင်ယူဆပ် ဇိုင်ယာက အိမ်တွင် ခိုးပြီး ပညာ သင်ကြားပေးခဲ့သည်။ သူ့ဖခင်သည် ကဗျာဆရာ တစ်ယောက်ဖြစ်ပြီး၊ ကျောင်း တစ်ကျောင်းလည်း ဖွင့်ထားသည်။ သူသည် ပညာရေးနှင့် ပတ်သက်ပြီး အစဉ်အလာကို ဆန့်ကျင်သော တက်ကြွသည့် လှုပ်ရှားသူ တစ်ဦးလည်း ဖြစ်သည်။ သူ့ ကျောင်းအမည်မှာ ခူရှာလ် ပြည်သူ့ကျောင်း ဖြစ်သည်။ မာလာလာသည် ဆရာဝန် ဖြစ်ချင်သော်လည်း ဖခင်က နိုင်ငံရေးသမား ဖြစ်စေချင်ခဲ့သည်။ သို့ဖြစ်ရာ ညမအိပ်မီ သမီးနှင့် နှစ်ယောက်သား နိုင်ငံရေး အကြောင်းများကို ညဥ့်နက်သည်အထိ ပြောဆို ဆွေးနွေး ငြင်းခုံခဲ့ကြသည်။
၂၀၀၈ ခုနှစ်လောက်တွင် မာလာလာ ကိုယ်တိုင်က အမျိုးသမီးများ ပညာသင်ကြားခွင့် ရရှိရေးအတွက် စတင် ပြောကြားလာခဲ့သည်။ သူမဖခင်က ပတ်ရ်ှဝါမြို့ရှိ သတင်းဌာန တစ်ခုသို့ ခေါ်သွားပြီး သမီးကို စကားပြောစေခဲ့ခြင်း ဖြစ်သည်။
“တာလီဘန်တွေက ကျွန်မဆီကနေ ပညာ သင်ကြားပိုင်ခွင့်ကို သိမ်းပိုက်ထားလို့ ရသလား” ဆိုသည့် သူမ၏ ရဲရဲတောက် ပြောကြားမှုများသည် သတင်းစာများနှင့် ရုပ်မြင်သံကြားများတွင် ဖော်ပြခြင်း ခံလိုက်ရပြီး ဒေသ တစ်လုံးသို့ ပျံ့နှံ့သွားကာ တာလီဘန်တို့ကိုလည်း စိန်ခေါ်လိုက်သလို ဖြစ်သွားခဲ့ သည်။
၂၀၀၉ ခုနှစ်တွင် မာလာလာသည် ဘီဘီစီ အူရ်ဒူ အစီအစဉ်သို့ စာတစ်စောင် ရေးပို့လိုက်သည်။ ဘီဘီစီ သတင်းထောက် အဘဒူဟိုင်ကာကာအား မာလာလာ၏ ဖခင်က တာလီဘန်တို့ လက်အောက် ရှိ အမျိုးသမီးတို့၏ ပညာ သင်ကြားရသည့် ဘဝကို စာဖြင့် ရေးသား ပေးပို့ရန် ဖိတ်ခေါ်ခိုင်းခဲ့သည်။
ထိုစဉ်က တာလီဘန် စစ်ရေး ခေါင်းဆောင်မှာ မော်လာနာဖာဇ် လူလာ ဖြစ်သည်။ မော်လာနာသည် ဆွပ် တောင်ကြား ဒေသကို သိမ်းပိုက်ပြီး စိုးမိုးနေသူလည်း ဖြစ်သည်။ သူက ရုပ်မြင်သံကြား ကြည့်ခွင့်၊ သီချင်း နားထောင်ခွင့်၊ မိန်းကလေးများ ပညာ သင်ကြားခွင့်နှင့် မိန်းကလေးများ ဈေးဝယ် ထွက်ခွင့် တို့ကိုပါ ပိတ်ပင် တားမြစ်ခဲ့သည်။ ပြည်သူများကို ခြိမ်းခြောက်သည့် အနေနှင့် ခေါင်းဖြတ်ထားသည့် ရဲများ၏ အလောင်းများကို မြို့လယ်ရှိ ကွက်လပ်တွင် ချိတ်ဆွဲ ပြသထားခဲ့သည်။
မာလာလာ ဖခင်ကျောင်းမှ အီရှာဆိုသူက ဘီဘီစီထံ စာ တစ်စောင် ရေးရန် သဘောတူခဲ့သော်လည်း မိဘများက တာလီဘန်တို့ သတ်ဖြတ်မည်ကို စိုးရိမ်သဖြင့် အစီအစဉ် ပျက်သွားခဲ့ရသည်။ ထို့ကြောင့် မာလာလာက ဘီဘီစီထံ စာရေးရန် သဘောတူလိုက်ပြီး စာရေးပေးခဲ့ခြင်း ဖြစ်သည်။
၂၀၀၉ ခုနှစ် ဇန်နဝါရီ ၃ ရက်နေ့တွင် မာလာလာ၏ စာကို ဘီဘီစီ အူရ်ဒူပိုင်း အစီအစဉ်ကို လွှင့်ထုတ် ဖတ်ပြခဲ့သည်။ ဆွပ်နယ်တွင် တာလီဘန်တို့သည့် ကျောင်းတက်နေသည့် အမျိုးသမီးများကို လိုက်လံ တားမြစ်ခဲ့သည့်အပြင် မာလာလာ တက်နေသည့် ကျောင်းကိုလည်း ပိတ်လိုက်တော့သည်။
၂၀၀၉ ခုနှစ် ဇန်နဝါရီ ၁၅ ရက်နေ့တွင် တာလီဘန်တို့က မင်ဂိုရာ၌ မည်သည့် မိန်းကလေးမှ ကျောင်း မတက်ရ အမိန့် ထုတ်လိုက်သည်။ ထို့ပြင် အမျိုးသမီး ကျောင်းပေါင်း ၁၀၀ ခန့်ကိုလည်း ဗုံးများဖြင့် ဖောက်ခွဲ ဖျက်ဆီးခဲ့သည်။ မာလာလာ တက်နေသည့် ကျောင်းမှ ကျောင်းအုပ်ကြီးကလည်း ကျောင်းသူများကို ကျောင်းလာလျှင် ကျောင်းဝတ်စုံ ဝတ်မလာဘဲ သာမန် ဝတ်စုံများဖြင့်သာ လာကြ ရန် ပြောခဲ့သည်။ မာလာလာက ထိုအကြောင်းနှင့် ပတ်သက်ပြီး “သမီးကတော့ သမီးအကြိုက်ဆုံး ပန်းရောင် ဝတ်စုံလေးကို ဝတ်ဖို့ ဆုံးဖြတ်လိုက်တယ်။ အခြား မိန်းကလေးတွေလည်း ကျောင်းကို အဝတ်အစား အမျိုးမျိုးတွေနဲ့ ရောက်လာကြတယ်။ ကျောင်းက ကျောင်းနဲ့ မတူတော့ဘူး အိမ်လို ဖြစ်သွားတယ်” ဟု သူ့ ဘလော့ဂ်တွင် ရေးသားခဲ့သည်။
မာလာလာသည် ၂၀၀၉ ခုနှစ်မှ စတင်ပြီး အမျိုးသမီးများ ပညာသင်ကြားခွင့်ရရေးကို သူမ၏ ဘလော့ဂ်မှ လည်းကောင်း၊ ကျောင်းများ ဒေသများ အတွင်းသို့ လှည့်လည် သွားလာ၍ လည်းကောင်း ဟောပြော စည်းရုံး လှုပ်ရှားခဲ့သည်။ သူမအတွက် ဖခင်ကသာ နောက်မှ မားမားမတ်မတ် ရပ်တည် ပေးပြီး လှုပ်ရှားမှုတိုင်းတွင် လိုက်ပါ ကူညီခဲ့သည်။
၂၀၀၉ ခုနှစ် ဒီဇင်ဘာလ နှောင်းပိုင်းတွင် မာလာလာသည် ‘စစ်နှင့် ငြိမ်းချမ်းရေး အစီရင်ခံစာ အဖွဲ့’ တွင် ပါဝင်ခွင့် ရခဲ့သည်။ ထိုပရောဂျက်သည် သတင်း မီဒီယာ သင်တန်း တစ်ခုဖြစ်ပြီး ပါကစ္စတန်နိုင်ငံ အတွင်းရှိ ကျောင်းပေါင်း ၄၂ ကျောင်းနှင့် ပတ်သက်ပြီး လေ့လာ သုံးသပ် ဆွေးနွေးခဲ့ကြသည်။ သူတို့ ဆန်းစစ်ချက်များကို ပြည်တွင်းထုတ် သတင်းစာများတွင် ဖော်ပြခွင့်များ ရရှိခဲ့သည်။ ထိုသင်တန်းတွင် တက်ရောက်သည့် အမျိုးသမီးများထဲ၌ မာလာလာသည် အငယ်ဆုံးနှင့် အတက်ကြွဆုံး ဖြစ်ခဲ့သည်။
သူ့ဖခင်က မျှော်မှန်းနေသည်မှာ မာလာလာ ဖောင်ဒေးရှင်းတစ်ခု ထောင်ပြီး ဆင်းရဲသည့် မိန်းကလေး များကို ကျောင်း ပို့ပေးနိုင်ရေး ဆောင်ရွက်ရန် ဖြစ်သည်။ မာလာလာကလည်း ဖော်ဒေးရှင်းတစ်ခု ထူထောင်နိုင်ရန် အပြင်းအထန် ကြိုးစားနေပြီး ၂၀၁၂ ဧပြီလတွင် အမျိုးသမီးများ ပညာရေးအတွက် ဗီဒီယို အစီအစဉ် တစ်ခုကို ထုတ်လွှင့်ခဲ့သည်။
နောက်ပိုင်းတွင် မာလာလာကို မီဒီယာများက အလေးပေးလာပြီး ကမ္ဘာက သိလာသည်ကို စိုးရိမ် ထိတ်လန့်လာသည့် တာလီဘန်များက သေနတ်ဖြင့် ပစ်ခတ်ပြီး လုပ်ကြံ သတ်ဖြတ်ရန် ဆုံးဖြတ်ခဲ့ကြ သည်။ သို့ဖြစ်ရာ သူမအိမ်သို့ စာများ ပို့ကာ ခြိမ်းခြောက်ခြင်း၊ Facebook ပေါ်တွင် သူမအကြောင်းနှင့် ပတ်သက်ပြီး လုပ်ကြံ ရေးသားချက်များ တင်ခြင်း စသည်တို့နှင့် ရင်ဆိုင်ခဲ့ရသည်။ သို့သော် အမျိုးသမီးများ ပညာသင်ခွင့် ရရေးကို မည်သည့် အကြောင်းပြချက်နှင့်မျှ မရပ်နားရန် ဆုံးဖြတ်ချက် ပိုမို ခိုင်မြဲစေခဲ့သည်။
ခြိမ်းခြောက်တိုင်း မကြောက်သည့် မာလာလာကို တာလီဘန်တို့က အကြမ်းဖက် သတ်ဖြတ်ရန် ဆုံးဖြတ်လိုက်ကြောင်း ကြေညာလိုက်သည်။
တစ်နေ့ ပါကစ္စတန် ဆွပ်တောင်ကြားတွင် ဘတ်စ်ကား တစ်စီး မောင်းလာနေသည်။ ထိုကားပေါ်တွင် စာမေးပွဲဖြေပြီး ပြန်လာသည့် ကျောင်းသားလေးများ ပါလာကြသည်။ ကားကို မျက်နှာဖုံးစွပ် လက်နက်ကိုင် သူပုန်များက ရပ်ခိုင်းပြီး ကားပေါ် တက်လာခဲ့ကြသည်။ သေနတ် ကိုင်ထားသည့် တစ်ယောက်က “ဘယ်သူ မာလာလာလဲဟေ့” ဟု အော်ပြောလိုက်သည်။ ပြီးလျှင် “ပြောရင်ပြော မပြောရင် အားလုံးကို ပစ်သတ်မယ်” ဟုလည်း အော်လိုက်သည်။ မာလာလာက သူမဖြစ်ကြောင်း မတ်တတ်ထပြီး ပြောလိုက်သည်။ တာလီဘန် သူပုန်တွေက သူမ မျက်နှာကို သေနတ်ဖြင့် တစ်ချက် ပစ်လိုက်သည်။ ပြီးတော့ လည်ပင်းကို နောက်တစ်ချက် ထပ်ပစ်လိုက်ပြန်သည်။ နောက်တစ်ချက် ပခုံးကို ထပ်ပစ်လိုက်သည်။ ပစ်ခတ်မှုတွင် အခြား မိန်းကလေး နှစ်ဦးကိုလည်း ကျည်တွေ ထိကုန် သည်။ ထိုတိုက်ခိုက်မှု အကြောင်းကို မာလာလာအား ပစ်ခတ်စဉ် ထိခိုက်ခဲ့သော ရီရာ့ဇ်နှင့် ရမ်ဇမ် ဆိုသည့် မိန်းကလေး နှစ်ဦးက ဒဏ်ရာရနေသည့် ကြားမှ သတင်းထောက်များကို ပြောပြနေခြင်း ဖြစ်သည်။
သေနတ် ဒဏ်ရာများဖြင့် မေ့မြောနေသော မာလာလာကို ပတ်ရှာဝါ စစ်ဆေးရုံကြီးသို့ ရဟတ်ယာဉ် ဖြင့် ချက်ချင်း ခေါ်ဆောင်သွားခဲ့သည်။ ဦးနှောက်ကို ထိထားသည့် အပိုင်းမှ လွဲပြီး ခွဲစိတ် ကုသပေး ခဲ့သည်။ ကျည်ဆန်က ခေါင်းကို ဖောက်ထွက်သွားခြင်း ဖြစ်သည်။ သုံးနာရီအကြာ ခွဲစိတ်ပြီး လည်ပင်း နှင့် ပခုံးထဲမှ ကျည်များကို ထုတ်ခဲ့ရသည်။
ခွဲစိတ်မှုများ မလုပ်မီ အချိန်အထိ စိတ်ဓာတ် ခိုင်မာလှသော မာလာလာသည် လက်နှင့် ခြေထောက် များကို လှုပ်နိုင်ခဲ့သည်။ သေနတ်ဖြင့် ပစ်ခတ်ခံရပြီးစတွင်လည်း ဆရာကို စကားပြောသွားခဲ့ သေးသည်။
၂၀၁၂ ခုနှစ် အောက်တိုဘာ ၁၅ ရက်နေ့တွင် မာလာလာကို ပါကစ္စတန် စစ်ဆေးရုံကြီးမှ ဗြိတိန်သို့ ပို့ဆောင် ကုသရန် ဆုံးဖြတ်ခဲ့ကြသည်။ အောက်တိုဘာ ၁၇ ရက်နေ့တွင် မာလာလာ မေ့မြောနေပြီး ဦးနှောက် မပျက်စီးရန် ကုသဖို့ လိုကြောင်း အဲလိဇဘတ် ဆေးရုံကြီးက ကြေညာခဲ့သည်။ ၂၆ ရက်နေ့ တွင် အခြေအနေ ပြန်ကောင်းလာသည်။ နိုဝင်ဘာ ၈ ရက်နေ့တွင် အခြေအနေ ကောင်းလာသဖြင့် ခုတင်ပေါ် ထိုင်ပြီး ဓာတ်ပုံ အရိုက်ခံနိုင်ခဲ့သည်။
မာလာလာသည် အမျိုးသမီးများ ပညာ သင်ကြားခွင့်ရရေး၊ ကျောင်းနေအရွယ် ကျောင်းသားတိုင်း ပညာ သင်ကြားခွင့် ရရေးကို စိတ်ဓာတ် ခိုင်မာစွာဖြင့် ဆက်လက် လုပ်ဆောင်နေခဲ့သည်။ သေလောက်သည့် ဒဏ်ရာများဖြင့် မိန်းမောနေခဲ့သည့်တိုင် သူမ စိတ်ကူးထဲတွင် ကလေးတွေကို စာတွေ သင်နေသည်။ အမျိုးသမီးတွေကို ကျောင်း ပို့နေသည်။
မာလာလာသည် ယခုမှ အသက် ၁၆ နှစ်သာ ရှိသေးသည်။ အသက် ၁၆ နှစ်အရွယ် ကလေး တစ်ယောက်၏ လှုပ်ရှား ဆောင်ရွက်ခဲ့မှုများကား အံ့သြစရာပင်။ လူတစ်ယောက် တစ်ခါသာ သေသည်ဟု ဆိုပါသည်။ သူမသည် တကယ်တော့ တစ်ခါ သေခဲ့ပြီးပြီ။ မသေမီ အားလုံးအတွက် ပညာရေးကို ဟစ်ကြွေး ပေးခဲ့သည်။
“ကျွန်မ မာလာလာ” ဆိုသည့် ဆောင်ပုဒ်ဖြင့် ကျောင်းနေအရွယ် ကလေးတိုင်းကို ကျောင်းပို့ပေးခဲ့ သည်။ သူမ နောက်တစ်ကြိမ် ပြန်နိုးထလာသည်။ ယခုတစ်ကြိမ် သူမ ကြွေးကြော်ချက်က ကြက်သီးထစရာ ဖြစ်သည်။
“ကလေး တစ်ယောက်၊ ဆရာ တစ်ယောက်၊ စာအုပ် တစ်အုပ်နဲ့ ကလောင် တစ်ချောင်းဟာ ကမ္ဘာကြီး ကို ပြောင်းလဲနိုင်ပါတယ်” ဟူ၍ ဖြစ်သည်။
Wikipedia နှင့် အင်တာနက်ပေါ်မှ အချက်အလက်များကို ရယူ ရေးသားပါသည်။
(အယ်ဒီတာတစ်ဦး)
The Voice Weekly
