ဆက်သွယ်ရေးအော်ပရေတာလုပ်ခွင့်ရ ကုမ္ပဏီနှစ်ခု ယနေ့မွန်းလွဲပိုင်း ထုတ်ပြန်မည်

ဆက်သွယ်ရေးအော်ပရေတာ လုပ်ကိုင်ခွင့်ရရှိသည့် ကုမ္ပဏီနှစ်ခုကို ယနေ့မွန်းလွဲပိုင်းတွင် ထုတ်ပြန်ကြေညာမည်ဖြစ်ပြီး သတင်းမီဒီယာများကိုပါ တရားဝင်ထုတ်ပြန်မည်ဖြစ်ကြောင်း ဆက်သွယ်ရေးအော်ပရေတာလုပ်ငန်း တင်ဒါခေါ်ယူရေးကော်မတီဥက္ကဋ္ဌဦးဆက်အောင်က ယနေ့နံနက် 7Day Daily သို့ ပြောကြားသည်။

မြန်မာ့ဆက်သွယ်ရေးနှင့် နည်းပညာသတင်းအချက် ၀န်ကြီးဌာန ပြည်ထောင်စုဝန်ကြီး ဦးမြတ်ဟိန်းကလည်း ယနေ့ကျင်းပသော ပြည်သူ့လွှတ်တော် အစည်းအဝေးသို့ လာရောက်၍ ဆက်သွယ်ရေးအော်ပရေတာ ၂ နေရာအတွက် တင်ဒါခေါ်ယူခဲ့မှုများနှင့် ပတ်သက်ပြီး အသေးစိတ် ဆွေးနွေးပြောကြားပြီး၊ တင်ဒါအောင်သူများကို ယနေ့ကြေညာမည်ဟု တရားဝင်သတင်းထုတ်ပြန်ထားပြီးမှ မကြေညာနိုင်လျှင် ရင်းနှီးမြှုပ်နှံသူများက မြန်မာနိုင်ငံအပေါ် ယုံကြည်မှု လျော့နည်းသွားနိုင်ကြောင်းပြောသည်။

တင်ဒါအောင်သော ကုမ္ပဏီ ၂ ခုမှာလည်း ၄င်းတို့ လုပ်ငန်းများ နောင်သုံးလလောက်မှ လည်ပတ်နိုင်မည်ဖြစ်ပြီး ဆက်သွယ်ရေးဥပဒေကြမ်းကို လွှတ်တော်တင်ထားပြီးဖြစ်၍ ဆက်သွယ်ရေးနည်းဥပဒေနှင့် အညီဆက်သွယ်ရေး လိုင်စင်ရသော ကုမ္ပဏီနှစ်ခု လုပ်ကိုင်ရမည်ဖြစ်ကြောင်း ပြည်ထောင်စုဝန်ကြီးကပြောသည်။

ပြည်ထောင်စုဝန်ကြီး ဆွေးနွေးရှင်းလင်းမှုများအပြီး ပြည်သူ့လွှတ်တော်ဥက္ကဋ္ဌသူရဦးရွှေမန်းက ဆက်သွယ်ရေးတင်ဒါနှင့် ပတ်သက်၍ အစိုးရ ဆောင်ရွက်မှုများကို လွှတ်တော်က အနီးကပ်စောင့်ကြည့်နေမည်ဟုပြောသည်။

လွှတ်တော်မှ ပြန်ထွက်လာသော ပြည်ထောင်စုဝန်ကြီး ဦးမြတ်ဟိန်းကို သတင်းထောက်များကမေးရာတွင်လည်း တင်ဒါအောင်သူနှစ်ဦးကို ယခင်အစီအစဉ်အတိုင်း ယနေ့ကြေညာမည်ဟု ပြောသည်။

''လျှောက်တဲ့ ကုမ္ပဏီတွေက East ကရော West ကရောပါတဲ့အတွက် အချိန်ကွာခြားမှုတွေရှိလို့ တစ်ပြိုင်တည်း သိရှိနိုင်မယ့် အချိန်တစ်ခုကို စောင့်နေတာပါ။ ပြီးရင် ကုမ္ပဏီတွေကို အရင်အကြောင်းကြားပြီး အသိပေးသွားမယ်။ ပြီးရင် Press Release လုပ်ပြီး ဒီနေ့မွန်းလွဲပိုင်းလောက် ထုတ်ပြန်ပေးသွားမှာပါ'' ဟု ဦးဆက်အောင်က ပြောသည်။

ဆက်သွယ်ရေးအော်ပရေတာ လိုင်စင်အတွက် ၀င်ရောက်ယှဉ်ပြိုင်ထားသော ကုမ္ပဏီ ၁၁ ခုထံသို့ ယနေ့အချိန်အထိ ညွှန်ကြားချက်တစ်စုံတစ်ရာ မရောက်သေးကြောင်း ၄င်းတို့အနေဖြင့် ယနေ့ထုတ်ပြန်ချက်ကိုသာ စောင့်ဆိုင်းလျက်ရှိသည်ဟု အဆိုပါ ကုမ္ပဏီများထံမှ တာဝန်ရှိသူများကပြောသည်။
7Day News Journal