ရခိုင် သရုပ်ဆောင် တစ်ဦး မူးယစ်ဆေးဝါး လက်ဝယ်ထားရှိမူနှင့် ဖမ်းဆီးခံရ

ရခိုင်အမျိုးသား ရုပ်ရှင် သရုပ်ဆောင် တစ်ဦးဖြစ်သူ ဘုန်းလျှံသည် မူးယစ်ဆေးဝါး လက်ဝယ် ထားရှိမူနှင့် ဖမ်းဆီးခံခဲ့ရကြောင်း Myit Makha Mediagroup သတင်းတွင် ဖေါ်ပြသည်။

ဇွန် ၂၈ ရက်နေ့က မူးယစ်အထူးအဖွဲ့မှ သတင်းအရ ရုပ်ရှင်သရုပ်ဆောင် ဘုန်းလျှံ ခေတ္တနေထိုင်ရာ ရန်ကုန်တိုင်းဒေသကြီး ဗဟန်းမြို့နယ်၊ ဆရာစံရပ်ကွက်၊ သာယာဝတီလမ်း၌ရှိသော Inn တစ်ခု အတွင်းသို့ ၀င်ရောက်ရှာဖွေရာမှ မူးယစ်ဆေးဝါများကို  ဖမ်းဆီးရမိခဲ့သည်ဟု ဆိုသည်။

သူနှင့်  အဖော်ဖြစ်သူ ဦးမောင်ထွန်းလှ ဆိုသူတို့ နေထိုင်ရာ အခန်းထဲရှိ ခရီးဆောင် လက်ဆွဲ အိတ်အတွင်းတွေ့ရှိသော Red Ruby စီးကရက်ဗူး ခွံတစ်ခုထဲမှ  WY စာတမ်းပါရှိသော လိမ္မော်ရောင် စိတ်ကြွဆေးပြား (၄၇)ပြား၊ အစိမ်း ရောင် (၂) ပြား၊စုစုပေါင်း (၄၉)ပြားကို ရှာဖွေတွေ့ရှိသည်ဟု ဆိုသည်။

၎င်းနောက် ဘုန်းလျှံနှင့်အတူ နေထိုင်သူ ဦးမောင်ထွန်းလှ အိပ်သော ကုတင်ခေါင်းရင်းမှ ဂျာနယ်ခေါက်ထဲ၌ တိပ်အကြည်ဖြင့်ကပ်ပြီး ထုတ်ထားသော  အဖြူရောင် တစ်ရှုး စက္ကူအတွင်း ပလတ်စတစ်အိတ် အတွင်းမှလိမ္မော်ရောင် စိတ်ကြွဆေးပြား(၉၉)ပြားအား ထပ်မံ ရှာ တွေ့ရှိခဲ့သည်ဟု ဆိုသည်။

အဆိုပါအခန်းအတွင်းတွင် စိတ်ကြွဆေးပြားများနှင့်အတူ စိတ်ကြွဆေးပြား သုံးစွဲရာတွင်  အသုံးပြုရသော ရေသန့် ဘူးဘေးဘက်တွင် ပိုက်တပ်လျက်နှင့်(၆)လက်မခန့်ရှိ ခဲပြား (၂)ပြား၊မီးခြစ် (၁)လုံးတို့ကိုသိမ်းဆည်းရမိပြီး စုစု ပေါင်းစိတ်ကြွဆေးပြား ကျပ်(၇)သိန်းလေးသောင်းဖိုးခန့် ဖမ်းဆီးရမိကြောင်းသတင်းတွင် ဖေါ်ပြထားသည်။

ဗဟန်းမြို့နယ်ရဲစခန်းမှ သရုပ်ဆောင် ဘုန်းလျှံနှင့်အဖော်ဖြစ်သူ ဦးမောင်ထွန်းလှတို့အား ယခုအခါ မူးယစ်ဆေးဝါးနှင့် စိတ် ကိုပြောင်းလဲစေသောပုဒ်မ ၁၅/၁၉(က)/၂၁ဖြင့် အမူဖွင့်အရေးယူထားကြောင်း သိရသည်။
Narinjara

ကနေဒါနိုင်ငံမှာ ၈ လေးလုံးညီလာခံ ဆက်လက်ကျင်းပ

2013-06-29      
ကနေဒါနိုင်ငံ တိုရွန်တိုမြို့ မှာ ဆက်လက်ကျင်းပနေတဲ့ ၈ လေးလုံး ၂၅ နှစ်ပြည့်ညီလာခံမှာ ဇွန်လ ၂၉ ရက်နေ့ မနက်မှာတော့ မြို့ တော်ခန်းမမှာ စတင်ပြုလုပ်နေပြီး မနက်ပိုင်းအစီအစဉ်မှာ ကနေဒါနိုင်ငံရဲ့ အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌါနရဲ့ ပါလီမန်ဆိုင်ရာ အတွင်းရေးမှူး Lois Brown တက်ရောက်ခဲ့ပြီး ကနေဒါဝန်ကြီးချုပ် Steven Harper ရဲ့ သဝဏ်လွှာ၊ လူဝင်မှုကြီးကြပ်ရေးဝန်ကြီး Jason Kenning ရဲ့ သဝဏ်လွှာတွေ ဖတ်ကြားသွားပါတယ်။

ဒီကနေ့ မြန်မာနိုင်ငံမှာ ဒီမိုကရေစီစနစ်ဖွံ့ ဖြိုးရေးနဲ့  အပြောင်းအလဲတွေအတွက်ကို အရေးကြီးတဲ့အဆင့်တွေ ဆောင်ရွက်နေတာတွေ ရပါတယ်။ ဒါပေမယ့် ဒီအပြောင်းလဲတွေ ဆက်ပြီးတိုးတက်လာဖို့ အတွက် ဆောင်ရွက်စရာတွေ အမြောက်အများ ကျန်နေပါသေးတယ်။ ဒီညီလာခံတက်လာသူ အားလုံးကလည်း မြန်မာပြည်သူတွေ လွတ်လပ်ရေးနဲ့ ဒီမိုကရေစီရေးတွေအတွက် ကိုယ်စားပြုဆောင်ရွက်နေကြတယ်လို့လဲ နားလည်သဘောပေါက်ပါတယ်လို့  ဝန်ကြီးချုပ်ရဲ့သဝဏ်လွှာကို ဖတ်ပြသွားတာပါ။

ကနေဒါနိုင်ငံ လူဝင်မှုကြီးကြပ်ရေးဝန်ကြီးရဲ့ သဝဏ်လွှာမှာလဲ ဒီညီလာခံကျင်းပတာဟာ မြန်မာပြည်သူတွေရဲ့ ဒီမိုရေစီရေးတိုက်ပွဲအတွက် စွန့်လွှတ်အနစ်နာခံမှုတွေကို အမှတ်တရဖြစ်စေတယ်လို့ ပြောဆိုသလို၊ မြန်မာနိုင်ငံရဲ့ ဒီမိုကရေစီရေး ပြုပြင်ပြောင်းလဲမှုကို ထောက်ပံ့နေတာဖြစ်တဲ့အကြောင်း၊ ကနေဒါနဲ့  မြန်မာနှစ်နိုင်ငံ ဆက်ဆံရေး ပိုမိုခိုင်မာအောင် ဆောင်ရွက်နေတာလို့ မျှော်လင့်တဲ့အကြောင်း၊ ဒီကြိုးစားမှုတွေကြောင့် မြန်မာနိုင်ငံမှာ ငြိမ်းချမ်းရေးနဲ့  ဒီမိုကရေစီရလာမယ်လို့ မျှော်လင့်တဲ့အကြောင်း ဖေါ်ပြထားပါတယ်။ ဒါ့အပြင် ညီလာခံကို ကနေဒါနိုင်ငံရဲ့ လေဘာပါတီခေါင်းဆောင် Justin Trudeau ကလဲ သဝဏ်လွှာပေးပို့လိုက်သလို၊ ABSDF ကျောင်းသားတပ်မတော်ကလည်း သဝဏ်လွှာ ပို့လိုက်ပါတယ်။

ညီလာခံနေ့လည်ပိုင်းမှာ အမေရိကန်ပြည်ထောင်စု ဆန်ဖရန်စစ္စကိုမြို့ကိုရောက်နေတဲ့ မြန်မာနိုင်ငံက ၈၈ မျိုးဆက်ငြိမ်းချမ်းရေးနဲ့ ပွင့်လင်းလူ့အဖွဲ့ အစည်းက ကိုမင်းဇေယျာ၊ ကိုအံ့ဘွယ်ကျော်နဲ့ ကိုပြုံးချို၊ ဘန်ကောက်မြို့ကိုရောက်နေတဲ့ ကိုနေမျိုးဇင်တို့ကလဲ အင်တာနက်ကနေတဆင့် ပါဝင်ဆွေးနွေးခဲ့ကြပါတယ်။
RFA (မြန်မာပိုင်း)

အိုဘားမား မင်ဒဲလားမိသားစုနှင့်သာ တွေ့ဆုံမည်

ပရက်တိုးရီးယား၊ ဇွန် ၂၉။
သမ္မတအိုဘားမားသည် ၎င်း၏သူရဲကောင်းမင်ဒဲလားအားတွေ့ဆုံရန် တောင်အာဖရိကသို့ ရောက်ရှိနေပြီဖြစ်သော်လည်းအသည်းအသန် ဖြစ် နေသည့် သမ္မတဟောင်းအားတွေ့ဆုံမည်မဟုတ်ဘဲ မိသားစုဝင်များနှင့်သာ ယနေ့တွေ့ဆုံမည်ဖြစ်သည်။

အိမ်ဖြူတော်က သမ္မတသွားရောက်မည့် အစီအစဉ်အသေးစိတ်ကို ထုတ်ပြန်ထားခြင်းမရှိဘဲ
မိသားစုနှင့်တွေ့ဆုံမည်ဖြစ်ကြောင်း ထုတ်ပြန် ချက်အတိုတစ်ခုထုတ်ပြန်ခဲ့ပြီး အိုဘားမားနှင့်ဇနီးတို့သည် အခက်အခဲကြုံနေရသည့် မိသားစုအား ၎င်းတို့၏ အတွေးများနှင့် ဆုတောင်းများ
ထုတ်ဖော်ပြောကြားသွားမည်ဖြစ်ကြောင်းပါရှိသည်။

“မင်ဒဲလားငြိမ်းချမ်းသက်သာစေမှုရေးနှင့် မိသားစုအလိုအရ သမ္မတ ဆေးရုံသို့ သွားရောက်လည်ပတ်မည်မဟုတ်” ဟု ထုတ်ပြန်ချက်တွင် ဖော်ပြသည်။

သမ္မတအိုဘားမားက တောင်အာဖရိကသို့လေယာဉ်ဖြင့် သွားရောက်စဉ်သတင်းထောက်များအား မင်ဒဲလားအား၎င်းနှင့် ဇနီးသည်၊ သမီးများ အား တွေ့ခွင့်ပေးသောကြောင့် ကျေးဇူးတင်ကြောင်း ပြောကြားသည်။

အိုဘားမားသည် ၂၀၀၅ခုနှစ် အထက်လွှတ်တော်အမတ်အဖြစ် တာဝန်ထမ်းဆောင်စဉ် မင်ဒဲလားနှင့်တွေ့ဆုံခဲ့စဉ်က ပုံကို အိမ်ဖြူတော်ကိုယ် ပိုင်ရုံးခန်းတွင် ချိတ်ထားသည်။

“ဓာတ်ပုံတစ်ပုံရရေးလာတာမဟုတ်ပါဘူး၊ မိသားစုတွေ မင်ဒဲလားအခြေအနေကို စိုးရိမ်နေချိန်မှာ ကျွန်တော် နောက်ဆုံးလုပ်ဆောင်ချင်တာ ကတော့ ဘယ်လိုနည်းနဲ့မဆိုသိသာစေချင်တာပါပဲ” ဟု အိုဘားမားက ဆိုသည်။

အိုဘားမားသည် မင်ဒဲလားတက်ရောက်နေသည့် ဆေးရုံနှင့် မိုင်အနည်းငယ်သာဝေးကွာသည့်နေရာသို့ ရောက်ရှိမည်ဖြစ်သည်။

သမ္မတအိုဘားမားသည် တောင်အာဖရိကသမ္မတနှင့် နှစ်ဦးချင်းတွေ့ဆုံခြင်း၊ သတင်းထောက်များနှင့်တွေ့ဆုံခြင်းများကို မင်ဒဲလား၂၇နှစ်ကြာ ထောင်ကျခံရပြီးနောက် ၁၉၉၄ ခုနှစ်တွင် ပထမဆုံးလူမည်းသမ္မတအဖြစ် ခန့်အပ်ပွဲပြုလုပ်ခဲ့သည့် ပြည်ထောင်စု အဆောက်အအုံတွင် ပြု လုပ်ခဲ့သည်။

အိုဘားမားက အခွင့်အရေးတန်းတူမရရှိခြင်းကြောင့် ထောင်ချခံရသည့် လှုပ်ရှားတက်ကြွသူ၏
အသက်စွန့်တိုက်ပွဲဝင်နိုင်သည့်စိတ်သည် ၎င်း၏ နိုင်ငံရေးတက်ကြွလှုပ်ရှားမှုများတွင်လွှမ်းမိုးခဲ့ကြောင်း ပြောကြားသည်။

အိုဘားမားက မင်ဒဲလားဘဝမှ သင်ခန်းစာများမှ ရရှိသည့် ၎င်း၏စကားသည် “အာဖရိကတွင်ပြည်သူများသည် မျိုးနွယ်စုအရ၊ လူမျိုးအရ၊ ဘာသာအရကွဲပြားနေမှုအစား စုစည်းကြလျှင် အာဖရိက၏တိုးတက်မှုသည် ဆက်လက်ဖြစ်ပေါ်နေမည်ဖြစ်ကြောင်း”  ပြောကြားသည်။

“သူ့ကိုတိုက်ရိုက်မပေးရဘဲ မိသားစုဆီပြောပြမယ့်အဓိက စကားကတော့ နှစ်တွေအကြာကြီး သူ့ခေါင်းဆောင်နိုင်မှုကို ရိုးစင်းစွာ ကျေးဇူးတင် တယ်ဆိုတာရယ် ပြီးတော့ အမေရိကန်ပြည်သူတွေရဲ့ ဆုတောင်းသံတွေ အတွေးတွေဟာ သူနဲ့ သူ့မိသားစု သူ့တိုင်းပြည်နဲ့အတူ ရှိနေတယ်ဆို တာတွေလို့ ထင်ပါတယ်” အိုဘားမားက တောင်အာဖရိကသို့လာရာလမ်းတွင် ပြောကြားသည်။

အိုဘားမားသည် စနေနေ့မွန်းလွဲပိုင်းတွင် ဆိုဝက်တို နယ်မြေသို့သွားရောက်ပြီး လူမျိုးရေးခွဲခြားမှုတိုက်ပွဲဝင်ခဲ့ခြင်းများကို အလေးအမြတ်ပြု မည် ဖြစ်သည်။ ဆိုဝက်တိုမြို့နယ်တွင် လွန်ခဲ့သည့် ၂၇ နှစ် ဇွန်လအတွင်း လူမျိုးခွဲခြားအုပ်ချုပ်သောအစိုးရကို လူငယ်များ ဆန့်ကျင်ဆန္ဒပြကြရာ အနည်းဆုံး လူငယ် ၁၇၆ ဦးသေဆုံးခဲ့သည်။

၎င်းလှုပ်ရှားမှုကြောင့် ခွဲခြားမှုကို ဆန့်ကျင်ရာတွင် နိုင်ငံတကာကူညီပေးမှုများရှိလာစေခဲ့ပြီး
တောင်အာဖရိကတွင် ယခုအခါ ဇွန်လကို လူငယ် လအဖြစ် သတ်မှတ်ထားပြီးဖြစ်သည်။

အိုဘားမားသည် တောင်အာဖရိကတွင် တနင်္ဂနွေနေ့ထိနေမည်ဖြစ်ပြီး
အမေရိကန်-အာဖရိကန်ပေါ်လစီနှင့်စပ်လျဉ်း၍ ကိပ်တောင်း တက္ကသိုလ် တွင် မိန့်ခွန်းပြောကြားမည်ဖြစ်ကာ မင်ဒဲလား အကျဉ်းကျခံခဲ့ရာထောင်သို့ သွားရောက်လည်ပတ်မည်ဖြစ်သည်။
Ref:AP
မြန်မာ့ခေတ်

စည်းကမ်းမဲ့ ရပ်နားထားသော ယာဉ်များအား TOW TRUCK ဖြင့် ဖမ်းဆီးသယ်ဆောင်

မန္တလေး-ဇွန်၂၉
မန္တလေးမြို့တော်စည်ပင်သာယာရေးကော်မတီ စက်ရုံနှင့် မော်တော်ယာဉ်ဌာနမှ ၀န်ထမ်းများနှင့် အခွန်ဌာနမှ ၀န်ထမ်းများ ပူးပေါင်း၍ မန္တလေးမြို့တော် စည်ပင်သာယာရေးကော်မတီ နယ်နိမိတ်အတွင်း ယာဉ်မရပ်ရနယ်မြေ (ဖြူနီကြား) ဆေးသုတ်ထားသော နေရာများ၌ စည်းကမ်းမဲ့ ရပ်နားထားသော ယာဉ်များအား TOW TRUCK ဖြင့် ဖမ်းဆီးသယ်ဆောင်လျက်ရှိကြောင်း
Mandalay City Development Committeeမှသိရသည်။
Popular Myanmar News Journal

တစ်နှစ်အတွင်း စိတ်ကြွဆေးပြား အလုံးရေ သိန်း ၇၀ ကျော် ဖမ်းဆီးရမိ

ရှမ်းပြည်နယ်အတွင်း ဖမ်းဆီးရမိခဲ့သည့် စိတ်ကြွဆေးပြား အထုပ်များကို တွေ့ရစဉ်

Sunday, 30 June 2013
တစ်နှစ်အတွင်း ပြည်တွင်း၌ စိတ်ကြွမူးယစ်ဆေးပြား အရေအတွက် စုစုပေါင်း ၇၀၆၄၀၉၈ ကို ဖမ်းဆီးရမိခဲ့ကြောင်း တိုင်းဒေသကြီးများနှင့် ပြည်နယ်တို့ရှိ မူးယစ် (အထူး) ဌာနတုို့မှ သိရှိရသည်။

အဆိုပါ ဖမ်းဆီးရမိခဲ့သည့် မူးယစ်ဆေးပြား စုစုပေါင်း သိန်း ၇၀ ကျော်မှာ မြန်မာနိုင်ငံတစ်ဝန်း ၂၀၁၂ ခုနှစ် ဇွန် ၂၆ ရက်မှ ၂၀၁၃ ခုနှစ် ဇွန် ၂၆ ရက်ထိ ဖမ်းဆီးရမိခဲ့သော မူးယစ်ဆေးပြားများဖြစ်ကြောင်း မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ အန္တရာယ် တားဆီးရေး ဗဟိုဌာနမှ သိရှိရသည်။

ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ တနသာင်္ရီတိုင်းဒေသကြီး၊ မွန်ပြည်နယ်၊ ကရင်ပြည်နယ်၊ ရခိုင်ပြည်နယ် အတွင်းတို့မှ စိတ်ကြွမူးယစ်ဆေးပြား ၈၄၂၈၇၇၊ ရှမ်းပြည်နယ် (တောင်၊ မြောက်၊ အရှေ့) နှင့် ကယားပြည်နယ်တို့မှ စိတ်ကြွမူးယစ်ဆေးပြား ၅၆ သိန်းကျော်၊ စစ်ကိုင်းတိုင်းဒေသကြီး၊ နေပြည်တော်၊ ချင်းပြည်နယ်၊ ကချင်ပြည်နယ်နှင့် မန္တလေးတိုင်းဒေသကြီး အတွင်းတို့မှ စိတ်ကြွမူးယစ်ဆေးပြား ၆၂၁၂၂၁ ဒသမ ၅ တို့ကို ဖမ်းဆီးရမိခဲ့ကြောင်း သိရှိရသည်။

မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ အန္တရာယ် တားဆီးရေး ဗဟိုဌာနမှ ဌာနမှူးရဲမှူးကြီး မြင့်သိန်းက "ကျွန်တော်တို့ အနေနဲ့ မူးယစ်ဆေးဝါးနဲ့ ထိန်းချုပ်ဓာတု ပစ္စည်းတွေကို သုံးစွဲတဲ့သူတွေ၊ ရောင်းဝယ်ဖောက်ကား ဖြန့်ချိတဲ့သူတွေ၊ နောက်ကွယ်က ကျူးလွန်တဲ့ သူတွေကို ထိထိရောက်ရောက် ဖမ်းဆီးဖော်ထုတ်နိုင်ဖို့ ဆောင်ရွက်နေပါတယ်။ ယခုလက်ရှိ ကာလမှာ ရန်ကုန်တိုင်းဒေသကြီး၊ မန္တလေးတိုင်းဒေသကြီးတွေနဲ့ တခြားမြို့ကြီးတွေမှာ မူးယစ်ဆေးဝါးနဲ့ ဆက်စပ်ပစ္စည်းတွေကို အလွယ်တကူ ၀ယ်ယူရရှိနေတယ်။ ဒါတွေကို ထိထိရောက်ရောက် နှိမ်နှင်းဖို့ဆိုရင် ပြည်သူတွေ သတင်းပေးတိုင်ကြားပြီးတော့ ပူးပေါင်းပါဝင်ဖို့ လိုအပ်ပါတယ်" ဟု ပြောကြားခဲ့သည်။

ထို့အပြင် ရှမ်းပြည်နယ် ရဲတပ်ဖွဲ့မှူးဖြစ်သူ ရဲမှူးကြီး ၀င်းထွန်းက "ဘိန်းနဲ့ဆက်စပ် မူးယစ်ဆေးဝါး ရောင်းဝယ်မှုတွေရဲ့ နောက်ကွယ်မှာ နယ်စပ်ဒေသတွေမှာရှိတဲ့ တရားမ၀င် ရောင်းဝယ်သူတွေနဲ့ တရားမ၀င် လက်နက်ကိုင် အဖွဲ့စည်းတွေ ပါဝင်နေပါတယ်။ လူငယ်နဲ့ လူလတ်ပိုင်း အချို့က စိတ်ကြွဆေးပြားတွေကို ရှူတယ်၊ ဘိန်းစိမ်းကို ချောင်းဆိုးပျောက်ဆေးရည် ရောစပ်ပြီးတော့ ဖေါ်မြူလာအဖြစ် အသုံးပြုနေကြပါတယ်" ဟု ပြောကြားခဲ့သည်။
Eleven Media Group

အမြန်လမ်းတွင် သစ်တင်ယာဉ်တစ်စီး တိမ်းမှောက်မှုဖြစ်ပွား

နေပြည်တော်မှ ရန်ကုန်သို့ အပြန် အမြန်လမ်း မိုင်တိုင် ၂၂ အနီးတွင် ယနေ့ ညနေ ၆နာရီခွဲခန့် အချိန်က သစ်ခိုးတင်ဆောင်လာသည် ဟု ယူဆရသည့် အမှတ်တံဆိပ် မသိရသေးသော luxury (minivan) အမျိုးအစားယာဉ်တစ်စီး တိမ်းမှောက်မှု ဖြစ်ပွားခဲ့သည်။ ဒဏ်ရာရရှိမှု အခြေအနေနှင့် ဖြစ်စဉ်တို့ကို အသေးစိတ်သိရှိရခြင်းမရှိသေးပေ။
ပြည်သူ့ခေတ်

ဂစ်တာတီး လူငယ်အဖွဲ့ကို ဆိုင်ကယ်စီး လူငယ်အဖွဲ့က ဝင်ရိုက်ရာမှ စီးပွားရေးတက္ကသိုလ် ကျောင်းသားတစ်ဦး သေဆုံး

မုံရွာ၊ ဇွန် ၂၇
မုံရွာမြို့၏ တက္ကသိုလ်ကြီးများသို့ သွားရာ လမ်းမကြီးဖြစ်သော ကျောက္ကာလမ်းမကြီး ဘေးရှိ အမျိုးသမီး ဘော်ဒါဆောင် တစ်ဆောင်ရှေ့တွင် ဇွန်လ ၂၅ ရက်နေ့ ညပိုင်း ၁၀ နာရီ ၃၀ မိနစ်ခန့်က ဂစ်တာထိုင်တီးနေသော လူငယ်အဖွဲ့ကို ဆိုင်ကယ် စီးလာသည့် လူငယ်အဖွဲ့က ဝင်ရိုက်ရာမှ အသက် ၂၁ နှစ်အရွယ် စီးပွားရေးတက္ကသိုလ် နောက်ဆုံးနှစ်ကျောင်းသား မောင်အောင်ဝိုင်းချစ်သူ သေဆုံး ခဲ့ကြောင်း မိသားစုဝင်များနှင့် မုံရွာမြို့နယ်မှ ရဲတပ်ဖွဲ့ဝင်များထံမှ သိရသည်။

သေဆုံးသူသည် အင်းတော်မြို့နယ် မော်သစ်ကျေးရွာအုပ်စု ရွာသာရွာတွင် နေထိုင်ပြီး ညီအစ်ကိုသုံးဦး ရှိသည့်အနက် ဒုတိယသားဖြစ်ကာ တိုင်းရင်းဆေးရုံ လမ်းမဘေးရှိ ပြင်ပဆောင်တွင် နေထိုင်၍ စီးပွားရေးတက္ကသိုလ် တက်နေခြင်း ဖြစ်ကြောင်း၊ သားဖြစ်သူ သေဆုံးခြင်းကို မုံရွာမြို့ပေါ်ရှိ ဆွေမျိုးသားချင်းများက အကြောင်းကြား၍ သိရှိခဲ့ရပြီး ဇွန်လ၂၇ ရက် နေ့နံနက် ၉ နာရီတွင် မုံရွာ မြနန္ဒာသုသာန်တွင် သဂြုင်္ိဟ်ခဲ့ကြောင်း ၎င်း၏ မိခင်က ပြောကြားသည်။

“ညပိုင်း ၈ နာရီလောက်က ထမင်းစား သွားမယ်ဆိုပြီး ထွက်သွားတာပဲ။ အဆောင်က ကောင်လေး တစ်ယောက်ကိုတော့ ဒီည အဆောင်ပြန်မအိပ်ဘူးလို့ ပြောသွားတယ်၊ ကျွန်မက စာသင်နေတော့ ကျွန်မကို လာမပြောဘူး။ အဲဒီညပိုင်း ၂ နာရီလောက်မှ ရဲအရာရှိတွေ ရောက်လာပြီး မောင်အောင်ဝိုင်း ချစ်သူ ဆုံးပြီဆိုတဲ့ အကြောင်း လာပြောမှ ဆုံးမှန်း သိရတယ်” ဟု သေဆုံးခဲ့သည့် နောက်ဆုံးနှစ် ကျောင်းသား နေထိုင်ခဲ့သည့် အဆောင်ပိုင်ရှင်က ဆိုသည်။

လူငယ်ရှစ်ဦးသည် မုံရွာ စီးပွားရေးတက္ကသိုလ်အနီး ကျောက္ကာ လမ်းမဘေးရှိ ရွှေမင်းသမီး အမျိုးသမီးဆောင် ရှေ့တွင် ဂစ်တာတီးနေစဉ်၊ ဆိုင်ကယ်လေးစီးဖြင့် အမည်မသိ လူ ၁၀ ဦး ရောက်လာပြီး အသင့် ယူဆောင်လာသည့် သစ်သားများဖြင့် ရိုက်နှက်ကြရာ ဂစ်တာတီးနေသူ များအနက် တစ်ဦးသေဆုံးပြီး နှစ်ဦး ဒဏ်ရာ ရရှိခဲ့ကြောင်း မုံရွာမြို့ အမှတ် (၂) ရဲစခန်းမှ ရဲအရာရှိတစ်ဦးက ပြောကြားသည်။

“ဘာရန်ငြိုးမှ မရှိဘဲ ဒီလိုအသတ်ခံရတဲ့ သူတွေက တက္ကသိုလ် အနီးအနား ဝန်းကျင်တွေမှာ ဖြစ်နေတာ အရင်က သာဓကတွေလည်း ရှိခဲ့ပါတယ်။ ကျွန်တော်တို့ ကျောင်းတက်တုန်းက ဆိုလည်း ညဆိုအပြင် မထွက်ဝံ့ဘူး” ဟု မုံရွာတက္ကသိုလ် ကျောင်းသားဟောင်း တစ်ဦးက ဆိုသည်။

ယခုကဲ့သို့ ဖြစ်စဉ်မျိုးမှာ ယခင်ကာလများ ကလည်း ဖြစ်ခဲ့ဖူးပြီး လွန်ခဲ့သော သုံးလခန့်ကလည်း မုံရွာ စီးပွားရေးတက္ကသိုလ် အနီးတွင် ယခုကဲ့သို့ပင် သစ်ပင်အနောက်မှ ကွယ်၍ ဆိုင်ကယ် စီးသွားသူတစ်ဦး အရိုက်ခံခဲ့ရကြောင်း မုံရွာ စီးပွားရေးတက္ကသိုလ်မှ ဆရာတစ်ဦးက ပြောကြားသည်။
The Voice Weekly

မိမိအပါအ၀င် အစိုးရ ၀န်ကြီးများ မဟုတ်တာလုပ်တာ သေချာပါက တရားစွဲဆိုရန် သမ္မတရုံးဝန်ကြီး တိုက်တွန်း

Sunday, 30 June 2013
မိမိအပါအ၀င် အစိုးရ၀န်ကြီးများ မဟုတ်တာလုပ်တာ သေချာပါက တရားစွဲဆိုရန် သမ္မတရုံးဝန်ကြီး ပြည်ထောင်စုဝန်ကြီး ဦးစိုးသိန်းက ဇွန် ၂၉ ရက်တွင် ပြုလုပ်သည့် ပြည်ထောင်စု ၀န်ကြီးများနှင့် မီဒီယာတွေ့ဆုံပွဲတွင် ပြောကြားသည်။

အစိုးရသစ်သက်တမ်း နှစ်နှစ်တာ ကာလအတွင်း မီဒီယာ လွတ်လပ်ခွင့်နှင့် ၀န်ကြီးများ၏ ပြောဆိုမှုများအပေါ် ရေးသားချက်များနှင့် ပတ်သက်၍ ယင်းကဲ့သို့ ပြည်ထောင်စု ၀န်ကြီးများသည် မမှန်မကန် လုပ်ရပ်များရှိသည်မှာ သေချာလျှင် တရားစွဲဆိုနိုင်ကြောင်း ပြည်ထောင်စုဝန်ကြီးက ပြောကြားသည်။

သမ္မတရုံး ၀န်ကြီးဌာန ပြည်ထောင်စုဝန်ကြီး ဦးစိုးသိန်းက "ဟိုတစ်ခါ debate မှာ မေးသလို ကျွန်တော်တို့ မီဒီယာ လွတ်လပ်ခွင့်က အမေရိကန်လိုဖြစ်ဖို့ နည်းနည်းလိုဦးမယ်။ အရှေ့တောင်အာရှမှာ ကြည့်မယ်ဆိုရင် စင်ကာပူတို့၊ ဗီယက်နမ်တို့ တရုတ်တို့ထက်သာတာ တွေ့ရတယ်။ ယခင်ကထက်စာရင် အခုကျွန်တော်တို့ကို တွေ့လို့ရတယ်။ မေးလို့ရတယ်။ အရင်တုန်းက ဘယ်ရမလဲ။ ခင်ဗျားတို့လည်း ရေးလို့ရတယ်။ ဒါပေမယ့် ဖြတ်သန်းလာတဲ့ နှစ်နှစ်တာမှာ တစ်ခါတလေ တစ်ပိုင်းတစ်စလေးနဲ့ ကျွန်တော်တို့ ဒုက္ခရောက်သွားတာတွေ ရှိသလို တစ်ခါတလေကျရင် ကျွန်တော်တို့ကို နာမည်မဖော်ရုံတစ်မယ် စွပ်စွဲတာတွေကြတော့ သတိပြုဖို့လိုတယ်။ သေချာတယ်ဆိုရင် တရားစွဲလိုက်ပါ။ ဘယ်ဝန်ကြီး၊ ဘယ်အသိုင်းအ၀ိုင်းက ဘာတွေမဟုတ်တာ လုပ်နေတယ်ဆိုတာ သေချာရင် တရားစွဲလိုက်ပါ။ ဒါကောင်းတာပေါ့။ ထင်ယောင်ထင်မှားကျတော့ မီဒီယာနဲ့ ရန်ဖြစ်ရတာ ဘယ်ကောင်းမလဲ" ဟု ပြောကြားသည်။

အစိုးရ ၀န်ထမ်းများ၏ လစာနှုန်းထား ဖော်ပြမှုများတွင် ပြည်ထောင်စု ၀န်ကြီး၏ တရားဝင်လစာမှာ ၆၀၀၀၀၀ ဖြစ်ပြီး ဒုတိယ ၀န်ကြီးတစ်ဦး၏ လစာမှာ ၄၅၀၀၀၀ ဖြစ်သည်။ ထို့ပြင် အစိုးရအဖွဲ့ဝင် ၀န်ကြီးများ အနေဖြင့် ၎င်းတို့၏ ပိုင်ဆိုင်မှုများကို သမ္မတထံ တင်ပြထားပြီး ဖြစ်ကြောင်းလည်း ကြားသိရပါသည်။ သို့သော်လည်း နိုင်ငံတကာနည်းတူ ယင်းကဲ့သို့ အစိုးရ အဖွဲ့ဝင် ၀န်ကြီးများ၏ ပိုင်ဆိုင်မှု အလုံးစုံကို အများပြည်သူသို့ တရားဝင်ထုတ်ပြန် ကြေညာထားခြင်း မရှိသေးကြောင်းလည်း သိရသည်။
Eleven Media Group

မြန်မာ တစ်နိုင်ငံလုံးတွင် ဘင်္ဂါလီ မွတ်စလင်ဦးရေ ၁ ဒသမ ၃၃ သန်းရှိပြီး ရခိုင်ပြည်နယ် တစ်ခုတည်းတွင် ၁ ဒသမ ၀၈ သန်းရှိ

Sunday, 30 June 2013
လက်ရှိ စာရင်းများအရ မြန်မာတစ်နိုင်ငံလုံးတွင် ဘင်္ဂါလီ မွတ်စလင်ဦးရေ ၁ ဒသမ ၃၃ သန်းရှိပြီး ရခိုင်ပြည်နယ် တစ်ခုတည်းတွင် ၁ ဒသမ ၀၈ သန်းရှိကြောင်း လူဝင်မှု ကြီးကြပ်ရေးနှင့် ပြည်သူ့အင်အား ၀န်ကြီးဌာန ပြည်ထောင်စုဝန်ကြီး ဦးခင်ရီက ဇွန် ၂၉ ရက်တွင် ပြုလုပ်သည့် ပြည်ထောင်စု ၀န်ကြီးများနှင့် မီဒီယာ တွေ့ဆုံပွဲတွင် ပြောကြားသည်။

မီဒီယာ တွေ့ဆုံပွဲသို့ တက်ရောက်လာသည့် သတင်းထောက် တစ်ဦးက လက်ရှိပြည်တွင်းရှိ ဘင်္ဂါလီ မွတ်စလင် အရေအတွက် မည်မျှရှိကြောင်း မေးမြန်းချက်ကို ပြန်လည်ဖြေကြားရာတွင် ထည့်သွင်းပြောကြားခဲ့သည်။

လူဝင်မှု ကြီးကြပ်ရေးနှင့် ပြည်သူ့အင်အား ၀န်ကြီးဌာန ပြည်ထောင်စုဝန်ကြီး ဦးခင်ရီက "နှစ်စဉ် အောက်တိုဘာလ ၁ ရက်နေ့တိုင်း လူဦးရေစာရင်း ထုတ်ပြန်လေ့ ရှိပါတယ်။ နောက်ဆုံး ၂၀၁၂ အောက်တိုဘာလ ၁ ရက်နေ့ ထုတ်ပြန်ချက်အရ လူဦးရေ ၆၀ ဒသမ ၉၈ သန်းလို့ ထုတ်ပြန်ထားပါတယ်။ ယနေ့ကောက်ထားတဲ့ အခြေအနေအရ မြန်မာပြည် တစ်ပြည်လုံးမှာ ဘင်္ဂါလီ မွတ်စလင်ဦးရေ ၁ ဒသမ ၃၃ မီလျံ ရှိပါတယ်။ ရခိုင်တစ်ခုတည်းမှာ ၁ ဒသမ ၀၈ မီလျံ ရှိပါတယ်။ ဒါလက်ရှိ စာရင်းအရပါ" ဟု ပြောကြားသည်။

နောက်ဆုံး ၂၀၁၂ အောက်တိုဘာလ ၁ ရက်နေ့ ထုတ်ပြန်ချက်အရ လူဦးရေ ၆၀ ဒသမ ၉၈ သန်းလို့ ထုတ်ပြန်ထားပါတယ်။ ယနေ့ကောက်ထားတဲ့ အခြေအနေအရ မြန်မာပြည် တစ်ပြည်လုံးမှာ ဘင်္ဂါလီ မွတ်စလင်ဦးရေ ၁ ဒသမ ၃၃ မီလျံ ရှိပါတယ်။ ရခိုင်တစ်ခုတည်းမှာ ၁ ဒသမ ၀၈ မီလျံ ရှိပါတယ်။ ဒါလက်ရှိ စာရင်းအရပါ . . . . .

ရခိုင်ဒေသရှိ ဘင်္ဂါလီများကို ၁၉၈၂ ခုနှစ် မြန်မာနိုင်ငံသား ဥပဒေပါ Criterial များနှင့် ကိုက်ညီပါက သတ်မှတ်ထားသည့် ကတ်ပြားတစ်ခုခု ရရှိမှာဖြစ်ကြောင်း ဦးခင်ရီက ဆက်လက်ပြောကြားသည်။

ယခုလာမည့် ရွေးကောက်ပွဲတွင် အဆိုပါ ကတ်ပြားတစ်ခုခု ရရှိထားသည့် ဘင်္ဂါလီများ အနေဖြင့် မဲပေးခွင့် ရှိ၊ မရှိ ဆိုသည်မှာ ရွေးကောက်ပွဲ ကော်မရှင်၏ သတ်မှတ်ချက် အပေါ်တွင်သာ မူတည်မည်ဖြစ်ကြောင်း ထည့်သွင်းပြောကြားသည်။

ထိုသို့ အစိုးရမှ တရားဝင် ထုတ်ပြန်ခဲ့သည့် ဘင်္ဂါလီ မွတ်စလင် လူဦးရေ စာရင်းအရ မြန်မာနိုင်ငံ အတွင်းရှိ အစ္စလာမ်ဘာသာ ကိုးကွယ်သူဦးရေသည် ယခင်ထုတ်ပြန်ထားသည့် မြန်မာနိုင်ငံ လူဦးရေ၏ လေးရာခိုင်နှုန်းမျှ ရှိသည်ဆိုသည့် ပမာဏထက် ပိုမိုများပြားနိုင်ဖွယ် ရှိနေကြောင်း သုံးသပ်နေကြသည်။
Eleven Media Group

ချောင်လည်ပါတယ် ဆရာ...

FB-Kyaw Soe Moe

သံဃာတော် ၁၅၀၀ ကျော် ထောက်ခံမှုဖြင့် အမျိုးဘာသာ သာသနာ စောင့်ရှောက်ရေးအဖွဲ့ ဖွဲ့စည်း

ရန်ကုန်၊ ဇွန် ၂၈
သံဃာတော်အပါး ၁၅၀၀ကျော်၏ ထောက်ခံမှုဖြင့် အမျိုးဘာသာ သာသနာ စောင့်ရှောက်ရေးအဖွဲ့ကို ဇွန်လ ၂၇ရက်နေ့တွင် ဖွဲ့စည်းခဲ့ကြောင်း အမျိုးဘာသာ သာသနာ ထိန်းသိမ်းစောင့်ရှောက်ရေး သြဝါဒခံယူပွဲနှင့် ဦးဆောင် ဆရာတော်များ တွေ့ဆုံညှိနှိုင်းပွဲ သတင်းထုတ်ပြန်ရေးအဖွဲ့မှ အရှင်စန္ဒာသီရိက မိန့်ကြားသည်။

အဆိုပါ အဖွဲ့တွင် ဗဟို အလုပ်အမှုဆောင် အဖွဲ့နှင့် အလုပ်အမှုဆောင်အဖွဲ့ ဥက္ကဋ္ဌ အဖြစ် ရွာမပရိယတ္တိ စာသင်တိုက် (အင်းစိန်)၊ နိုင်ငံတော် သြဝါဒစရိယ အဂ္ဂမဟာ ပဏ္ဍိတ ဆရာတော်ဘဒ္ဒန္တ တိလောကာဘိဝံသ တာဝန်ယူမည် ဖြစ်ပြီး သံဃာတော် အပါး ၆၁ ပါးဖြင့် ကနဦး ဖွဲ့စည်းလိုက်ကြောင်း၊ ဥပဒေပညာရှင်များနှင့် လူပုဂ္ဂိုလ်များကိုလည်း ထည့်သွင်း ဖွဲ့စည်းရန် စီစဉ်ထားကြောင်း ၎င်းက ထပ်မံမိန့်ကြားသည်။

“နိုင်ငံတော် သံဃမဟာနာယက အဖွဲ့ကို ခွင့်ပြုချက် တောင်းခံဖို့ စီစဉ်နေတယ်” ဟု အရှင်စန္ဒာသီရိက မိန့်ကြားသည်။

အင်းစိန်မြို့နယ် အောင်ဆန်းတောရ တပ်ဦးကျောင်းတိုက်တွင် ဇွန်လ ၂၇ရက်နေ့က ပြုလုပ်သော သံဃာတော်အပါး ၁၅၀၀ ကျော် တက်ရောက်ခဲ့သည့် အမျိုးဘာသာ သာသနာ ထိန်းသိမ်း စောင့်ရှောက်ရေး သြဝါဒခံယူပွဲနှင့် ဦးဆောင် ဆရာတော်များ တွေ့ဆုံညှိနှိုင်းပွဲတွင် သံဃာတော်များ ထောက်ခံမှုဖြင့် အဆိုပါအဖွဲ့ ဖွဲ့စည်းခဲ့ခြင်း ဖြစ်သည်။
ပဋိပက္ခ မဖြစ်ရန် အသိပညာပေး တားဆီးရန်၊ နိုင်ငံသားများ ညီညွတ်မှု၊ စည်းကမ်းရှိမှုဖြင့် ဘာသာပေါင်းစုံ ငြိမ်းချမ်းစွာ အတူယှဉ်တွဲ နေထိုင်ရေး စည်းရုံးရန်၊ အမျိုးဘာသာ သာသနာကို တရားဥပဒေနှင့်အညီ ကာကွယ်ထိန်းသိမ်း ရန်ရည်ရွယ်ကာ ယင်းအဖွဲ့အစည်းကို ဖွဲ့စည်းခြင်း ဖြစ်ကြောင်း၊ သာသနာ ပြန့်ပွားစေရန် ဟောပြောခြင်း၊ သင်တန်းပေးခြင်းများကို ဓမ္မနှင့်အညီ လုပ်ဆောင်ရန်၊ အသိအမြင်၊ အတွေးအခေါ်၊ ပညာရေး မြင့်မားရေး လုပ်ငန်းများကို ဆောင်ရွက်ရန်၊ မျိုးစောင့် ဥပဒေတစ်ရပ် ထွက်ပေါ်ရန် လုပ်ဆောင်မည် ဖြစ်ကြောင်း အဆိုပါအဖွဲ့ထံမှ သိရှိရသည်။

ဗုဒ္ဓဘာသာနှင့် ပတ်သက်၍ တိုင်းမ်မဂ္ဂဇင်း ဖော်ပြချက်ကဲ့သို့ အလားတူ ပြဿနာများတွင် နိုင်ငံတကာကို ဖြေရှင်းနိုင်ရေးနှင့် အမျိုးဘာသာ သာသနာ ထိန်းသိမ်း စောင့်ရှောက်ရေးအတွက် ဦးဆောင်လမ်းညွှန် ကော်မတီတစ်ရပ်ကို ဖွဲ့စည်းသင့်ပြီး ယင်းကော်မတီတွင် နိုင်ငံတကာ အသိအမြင်ရှိသည့် လူပုဂ္ဂိုလ်များကို ထည့်သွင်းရန် သီတဂူ ကမ္ဘာ့ ဗုဒ္ဓတက္ကသိုလ် အဓိပတိ ဒေါက်တာအရှင်ဉာဏိဿရက ယင်းတွေ့ဆုံညှိနှိုင်း အစည်းအဝေးတွင် အကြံပြု တိုက်တွန်းခဲ့သည်။

အဆိုပါ အစည်းအဝေး အပြီးတွင် အမျိုးဘာသာ သာသနာ စောင့်ရှောက်ရေး အဖွဲ့ကို ဖွဲ့စည်းရန် ထောက်ခံရေး၊ မျိုးစောင့် ဥပဒေ ပြဋ္ဌာန်းရေး၊ အရှင်ဝီရသူ The Face of Buddhist Terror ဆောင်းပါးကို ဖော်ပြခဲ့သည့် တိုင်းမ် မဂ္ဂဇင်းကို အပြင်းအထန် ကန့်ကွက်ရေး၊ နိုင်ငံတော် အစိုးရနှင့် နိုင်ငံတော် သံဃမဟာနာယက အဖွဲ့တို့က အမျိုးဘာသာ သာသနာရေးတွင် အကူအညီပေးရေး၊ ပဋိပက္ခ မဖြစ်ပွားရန် ဝိုင်းဝန်း ထိန်းသိမ်းရေး အချက်ငါးချက် ပါဝင်သည့် ကြေညာချက်တစ်စောင် ထုတ်ပြန်ခဲ့သည်။

တိုင်းမ်မဂ္ဂဇင်း ဖော်ပြချက်နှင့် ပတ်သက်၍ သံဃာတော်များက သည်းခံ၊ ခွင့်လွှတ်ရန် မေတ္တာရပ်ခံခဲ့ပြီး မဟုတ် မမှန်သည့် အကြောင်းကို မဟုတ်ကြောင်း ပြန်လည်ရှင်းလင်းရန်၊ ဟုတ်မှန်ပါက ဟုတ်မှန်ကြောင်း ဝန်ခံရန် လိုအပ်ကြောင်း ဒေါက်တာအရှင်ဉာဏိဿရက ယင်းအခမ်းအနားတွင် မိန့်ကြားသည်။
Living Color ၊ ကောင်းဆက်နိုင်
The Voice Weekly

နောင်ချိုမြို့နယ်ရဲစခန်းမှ ဖမ်းဆီးထားသော တောင်သူ (၄)ဦးကို အာမခံဖြင့် ပြန်လွတ်လာ

နောင်ချို၊ ဇွန် ၂၈။
နောင်ချိုမြို့နယ်ရဲစခန်းမှ ဖမ်းဆီးထားသော တောင်သူ လေးဦးအား (၂၇)ရက်နေ့ နံနက် ကိုးနာရီခွဲအချိန်တွင် ၎င်းတို့၏ကျေးရွာမှ ရွာသား သုံးဦးစီမှ အာမခံပေးသဖြင့် ပြန်လည်လွှတ်ပေးလိုက်ကြောင်း သတင်းရရှိသည်။

လယ်ယာမြေများအတွင်း ဝင်ရောက်လုပ်ကိုင်ခြင်းကြောင့် အဖမ်းခံရသောရွာသားများအား ပြန်လွတ်ပေးရန် ဇွန်လ၂၆ရက်နေ့၌ နောင်ချိုမြို့နယ် ရဲစခန်းရှေ့တွင် ရွာ ၆ရွာမှ တောင်သူ လေးရာခန့်စုဝေးပြီး တောင်းဆိုသဖြင့် ဇွန်လ ၂၇ရက်နေ့ နံနက်တွင် အာမခံဖြင့် ပြန်လည်လွှတ်ပေးလိုက်ခြင်းဖြစ်ကြောင်း သိရသည်။

အာမခံပေးမည့် ရွာသားများအား နောင်ချိုမြို့နယ်၊ ရဲစခန်းသို့ (၂၇)ရက်နေ့နံနက် ကိုးနာရီတွင်
ခေါ်ဆောင် ပြီး ဇူလိုင်လ ဆယ်ရက်နေ့တွင် တရားရုံးသို့ လာရောက် အမှုရင်ဆိုင်ရမည်ဖြစ်ကြောင်း၊ မလာရောက်ပါက ငွေဆယ်သိန်း လျော်ရမည်ဖြစ်ကြောင်း အာမခံခိုင်းကာ လွှတ်ပေးလိုက်ခြင်းဖြစ်ကြောင်း ထပ်မံသိရသည်။

ထိုသို့လွတ်မြောက်လာသူများမှ ဦးထွန်းအောင် က “ကျွန်တော်အခုပဲ လွတ်လာတယ်။ ကျွန်တော့်ကို မနေ့က ယာတဲမှာ မနက် (၇း၁၅)မှာ လက်ထိပ်ခတ်ပြီး ခေါ်သွားတာ။ ပြီးတော့ သေနတ်တွေနဲ့လည်း
မိသားစုအားလုံးကို ချိန်ထားတော့ ကျွန်တော်က  မိသားစုတွေ ကြောက်မှာစိုးလို့ လိုက်မယ်ဆိုပြီး လိုက်သွားတာ စခန်းရောက်တော့ စခန်းမှူးက အချုပ်ထဲ ထည့်ထား လိုက်တော့တာပါပဲ”ဟု ပြောကြားသည်။

“သူတို့ကိုဖမ်းတဲ့ ဥပဒေက ခြေချုပ်နဲ့ ခံဝန်ဥပဒေနဲ့ဖမ်းတာ။ ဒီဥပဒေက ကျမသိသလောက်ဆို ခိုးဆိုးနေတဲ့ ခြေသလုံး အိမ်တိုင်တွေကို စွဲတဲ့ ဥပဒေပဲ။ အခုဟာက နိုင်ငံတော်ရဲ့ အကျိုးစီးပွားကို တစ်ဖက်တစ်လမ်းကနေ တိုးတက်အောင် ကူညီပေးနေတဲ့ တောင်သူတွေကို ဒီဥပဒေနဲ့ စွဲတယ်ဆိုတော့ တစ်ခုခုတော့ လွဲနေတယ် ထင်တယ်”ဟု တောင်သူများဘက်မှ မြေယာကိစ္စလိုက်လံ ဆောင်ရွက်ပေးသူ တစ်ဦးက ပြောကြားသည်။

ယင်းသို့ လွတ်မြောက်လာပြီးနောက် တောင်သူလေးဦးအား နောင်ချိုမြို့နယ်၊ ဘန့်ဘွေးကျေးရွာအုပ်စု
ရဲစခန်းသို့ လာရောက်ရန် ဖုန်းဖြင့် ခေါ်ဆိုကြောင်း၊ စခန်းသို့ ရောက်သောအခါ ယနေ့ ဇွန်လ၂၈နေ့တွင် ပြန်လည်လာရောက်ရန်နှင့် အမှုကိုအပြီးပြတ် ဆောင်ရွက်ပေးမည်ဟု ပြောဆိုလိုက် သော်လည်း ညနေငါးနာရီ အချိန်ထိ မပြီးပြတ်သေးကြောင်း သိရသည်။

တောင်သူများမှ မိမိတို့စားဝတ်နေရေး ကျပ်တည်းမှုနှင့် မိုးဦးကျအမီ စိုက်ပျိုးရမည်ဖြစ်သဖြင့် နိုင်ငံတော်မှ ကော်ဖီစီမံကိန်းဟုဆိုကာ ပုဂ္ဂလိက လုပ်ငန်းရှင်များအား ရောင်းချထားသော မိမိတို့လယ်ယာမြေများပေါ်တွင် ဝင်ရောက်လုပ်ကိုင်ကြခြင်းကြောင့် အဖမ်းခံခဲ့ရခြင်းဖြစ်ကြောင်း တောင်သူများထံမှ သိရသည်။
စိုင်းကံသာ
မြန်မာ့ခေတ်

ရန်ကုန်မြို့ကမ်းနားလမ်းတွင် ရေနံများထွက်ရှိ

ရန်ကုန်၊ ဇွန် ၂၈။
ရန်ကုန်မြို့ လမ်းမတော်မြို့နယ် အတွင်းရှိ ကမ်းနားလမ်းနားနှင့် (၇)လမ်းထောင့်တွင် မြို့တော်စည်ပင်မှ လမ်းများတိုးချဲ့လျက်ရှိသော မြေများတူးဖော်နေသည့် နေရာတွင် ရေနံများ ထွက်ရှိနေကြောင်း မြို့တော်စည်ပင်မှ ယင်းနေရာသို့ ရောက်ရှိနေသော တာဝန်ရှိသူတစ်ဦးက ပြောကြားသည်။

“ဒီနားမယ် မြေတူးတာက အရင် ပထမပတ်လောက် ကတည်းက မိုးရွာတော့ ရေတွေများနေလို့ ထားခဲ့တာ။ ဒီနေ့မှ ၁၁နာရီလောက်က အလုပ်ဆက်လုပ်ဖို့ ရေခပ်ထုတ်တော့ ရေနံတွေ ထွက်နေတာကို တွေ့တာ။ ရေတွေနဲ့ ရောနေသေးတော့ ရေနံစိမ်းလား ရေနံဆီလား မသိသေးပါဘူး ”ဟု မြေတူးအလုပ်သမား ကြီးကြပ်ရေးမှူး ကိုအောင်ထွေးက ပြောကြားသည်။

လွန်ခဲ့သောတစ်ပတ် မြေတူးစဉ်ကတည်းက ရေနံအနံ့ ရရှိခဲ့ပြီး ယင်းနေရာ အနီးရှိ မီးစက်မှ ရေနံများ
ယိုစိမ့်နေသည်ဟု ထင်ခဲ့ခြင်းဖြစ်ကြောင်း၊ ယခုအခါ အလုပ်သမားများ ရေပက်ထုတ်သော အခါတွင်
ရေနံထွက်နေသော နှစ်လက်မခန့် အပေါက်နှစ်ပေါက်ကို မြင်တွေ့ရှိခဲ့ခြင်းဖြစ်ကြောင်း အဆိုပါရေနံထွက်ရှိရာ နေရာနှင့် ကပ်လျက်ရှိသော ဈေးဆိုင်မှ ဒေါ်တင်တင်အေးက ပြောကြားသည်။

ယနေ့နေ့လည် ၁၁နာရီခန့်မှ စတင်ခပ်ထားသော ၎င်းရေရောရာ ရေနံများသည် ယခုညနေ ၇နာရီခန့် အချိန်ထိ ဆီပေပါ ငါးလုံးခန့်ရရှိထားပြီဖြစ်ကြောင်း သိရသည်။ ယင်းနေရာတွင် မီးဘေးအန္တရာယ် ကြိုတင်ကာကွယ်သော အနေဖြင့် မီးသတ်ကားနှစ်စီး အဆင်သင့် ထားရှိထားကြောင်းလည်း သိရသည်။
အောင်သိုက်

ကျောက်လာဝယ်သူ တရုတ်နိုင်ငံသားနှစ်ဦး သိန်း ၁၅၀ တန်ဖိုးရှိ ကျောက်များ ခိုးယူဟုဆို

မန္တလေး၊ ဇွန် ၂၇
မန္တလေးတိုင်းဒေသကြီး၊ ချမ်းအေးသာစံမြို့နယ် ပတ်ကုန်းဝန်းကျင် ရပ်ကွက်ရှိ အောင်သပြေ ကျောက်မျက်ရတနာ ရောင်းဝယ်ရေးဆိုင်သို့ ကျောက်လာဝယ်သူ တရုတ်နိုင်ငံသားနှစ်ဦး ကျပ်သိန်း ၁၅၀ တန်ဖိုးရှိ ကျောက်မျက်ထည်များခိုးယူမှု ဇွန်လ ၂၆ ရက်နေ့က ဖြစ်ပွားခဲ့သည်ဟု အဆိုပါ ကျောက်မျက်ရတနာဆိုင်၏ ပြောကြားချက်အရ သိရှိရသည်။

အဆိုပါနေ့ မွန်းလွဲ ၁ နာရီ ၃၅ မိနစ်ခန့်က တရုတ်နိုင်ငံသား နှစ်ဦးသည် ပတ္တမြားအပွင့်ထဲမှ အရည်ကောင်းကို ဝယ်ယူရန် ကျပ်သိန်းတစ်ရာခန့် တန်ဖိုးရှိ နီလာ၊ စိန်ပတ်လည် လက်စွပ်တစ်ကွင်း နှင့် ကျပ်သိန်း ၅၀ တန်ဖိုးရှိ ကျောက်စိမ်း၊ စိန်၊ ရွှေပါဆွဲသီးတစ်ခု ကြည့်ရှုပြီးနောက် ပျောက်ဆုံးသွားခဲ့ခြင်း ဖြစ်ကြောင်း မန္တလေးတိုင်း ဒေသကြီးရဲတပ်ဖွဲ့မှူးရုံး ထံမှ သိရသည်။

အဆိုပါ တရုတ်နိုင်ငံသားနှစ်ဦးသည် ဆိုင်တာဝန်ခံကို ဗီဇာကတ်ဖြင့် ဝယ်ယူ၍ ရမည်လားဟုမေးပြီး ပြန်လာမည်ဟု ပြောကာ ထွက်သွားပြီးနောက် ယင်းကဲ့သို့ ပျောက်ဆုံးသွားခဲ့ခြင်း ဖြစ်ကြောင်း အဆိုပါ ရဲတပ်ဖွဲ့မှူးရုံးထံမှ ထပ်မံသိရှိရသည်။

"အခု ရဲက လိုက်နေတုန်းပဲ ရှိသေးတယ်။ အမှုဖွင့်ထား ပါတယ်" ဟု အောင်သပြေ ကျောက်မျက်ရောင်းဝယ်ရေး ဆိုင်လုပ်ငန်းရှင် ဦးကျော်ကျော်ခိုင်က The Voice သို့ ပြောကြားသည်။

အဆိုပါ တရုတ်နိုင်ငံသားနှစ်ဦးကို ဆိုင်အရောင်း တာဝန်ခံက ချမ်းအေးသာစံမြို့နယ် အမှတ်(၃)ရဲစခန်း တွင် တရားလိုပြု၍ အမှုအမှတ် (ပ)၃၀၁/၂၀၁၃၊ ပုဒ်မ ၃၈၀ အရ အမှုဖွင့် တိုင်တန်းထားကြောင်း အဆိုပါ ရဲတပ်ဖွဲ့မှူးရုံးမှ တာဝန်ရှိသူတစ်ဦးက ပြောကြားသည်။
ဖြိုးဖြိုးဇော်
The Voice Weekly

မန္တလေး NDF ပါတီ မျိုးစောင့်ဥပဒေ ပေါ်ထွက်ရေး လှုပ်ရှားမှုပြုလုပ်

မန္တလေး၊ ဇွန် ၂၇
မန္တလေးတိုင်းဒေသကြီး အမျိုးသား ဒီမိုကရေစီအင်အားစုပါတီ (NDF) က အမျိုးဘာသာ သာသနာ ထိန်းသိမ်းစောင့်ရှောက်ရေး ဆရာတော်များ စီစဉ်နေသော မျိုးစောင့်ဥပဒေ ပေါ်ထွက်ရေး အဆိုကို ထောက်ခံသည့် လှုပ်ရှားမှုတစ်ခု မန္တလေး ခရိုင်လေးမြို့နယ်တွင် ဇွန်လ ၂၆ ရက်နေ့က ပြုလုပ်ခဲ့ကြောင်း ယင်းပါတီထံမှ သိရှိရသည်။

"ကျွန်တော်တို့ မန္တလေး လေးမြို့နယ် မှာ မျိုးစောင့်ဥပဒေကို ထောက်ခံခြင်းနဲ့ တိုင်းမ်မဂ္ဂဇင်းကို ကန့်ကွက်တဲ့ Campaign လုပ်ပါတယ်။ ထောက်ခံကြောင်းနဲ့ ဆန့်ကျင် ရှုတ်ချကြောင်း ပါတဲ့ စာရွက်တစ်သောင်းခန့် ဝေပါတယ်" ဟု ယင်းပါတီ ဗဟိုကော်မတီဝင် မန္တလေးတိုင်းဒေသကြီး လူငယ်တာဝန်ခံ ဦးစည်သူအောင်က The Voice သို့ ပြောကြားသည်။

ယင်းပါတီမှ အဖွဲ့ဝင်အင်အား ၅၀ ခန့်သည် ပုသိမ်ကြီး၊ မဟာအောင်မြေ၊ အောင်မြေသာစံ၊ ချမ်းမြသာစည် မြို့နယ်တို့ရှိ ဈေးနှင့် လူစည်ကားသည့် နေရာများတွင် ယင်းအစီအစဉ်ကို ပြုလုပ်ခဲ့ကြောင်း ၄င်းက ဆိုသည်။

တိုင်းမ်မဂ္ဂဇင်း၏ ဖော်ပြချက်သည် နှစ်ပေါင်းထောင်ချီ၍ တည်တံ့ခိုင်မြဲလာသော မြန်မာနိုင်ငံသား အများစု ကိုးကွယ်ရာ ဗုဒ္ဓဘာသာအပေါ် အထင်အမြင် လွဲမှားစေပြီး လက်ရှိ ဆောင်ရွက်နေသည့် ဘာသာပေါင်းစုံ ညီညွတ်ရေးအကြား အပြန်အလှန် ယုံကြည်မှု တည်ဆောက်နေမှုကို ထိခိုက်စေခြင်း၊ ဖြူစင်သန့်ရှင်း လွတ်လပ်ပွင့်လင်း သည့် မြတ်ဗုဒ္ဓ၏ ငြိမ်းချမ်းသော ဘာသာ တရားကို အကြမ်းဖက်ဝါဒီ အဖြစ် အရုပ်ဆိုး အကျည်းတန်အောင် ရေးသားချက်များ အားလုံးကို အမျိုးသားဒီမိုကရေစီ အင်အားစု ပါတီက ရဲဝံ့ပြတ်သားစွာ ရှုတ်ချကန့်ကွက်ကြောင်းနှင့် NDF ပါတီမှ လွှတ်တော်ကိုယ် စားလှယ်များ လွှတ်တော်အသီးသီးသို့ တင်ပြ၍ သဘောထား ကြေညာချက် တစ်ရပ် အမြန်ထုတ်ပြန်ပေးရန် တင်ပြသွားမည့် အဆိုကို ကြိုဆိုပါကြောင်း ယင်းပါတီက ပြုလုပ်သည့် လှုပ်ရှားမှုတွင် ဖြန့်ဝေသောစာ၌ ဖော်ပြပါရှိသည်။
The Voice Weekly

ကမ္ဘာ့ပထမဆုံး အာကာသစူးစမ်းလေ့လာရေး စက်ရုပ် Kirobo

အာကာသ စူးစမ်းလေ့လာရေး လုပ်ငန်းများတွင် အထောက်အကူ ဖြစ်စေရန်အတွက် စကားပြောတတ်သည့် စက်ရုပ်လေး တစ်ရုပ်ကို ပထမဆုံး အသုံးပြုသွားရန် စီစဉ်နေကြောင်း သိရှိရသည်။ Kiroboဟု အမည်ပေးထားသော စက်ရုပ် အငယ်စားလေးသည် နိုင်ငံတကာ အာကာသ အေဂျင်စီ (ISS)တွင် တာဝန်ထမ်းဆောင်နေသော နက္ခတ်ဗေဒ ပညာရှင်များနှင့် စကားလက်ဆုံ ကျနိုင်မည်ဟု ဆိုသည်။

Kiboဟူသော ဂျပန် စကားနှင့် ဆက်နွယ်ပြီး အမည်ပေးထားသည့် စက်ရုပ်လေးများသည် အမြင့် (၃၄)စင်တီမီတာသာ ရှိမည်ဟုဆိုသည်။ Kiboဆိုသော စကားလုံးသည် ဂျပန်ဘာသာအရ မျှော်လင့်ချက်ဟု အဓိပ္ပါယ်ရသည်။ ယင်းစက်ရုပ်ငယ်လေးအနက် ပထမဆုံး တစ်ရုပ်သည် ဩဂုတ်လတွင် ဂျပန်နိုင်ငံမှ နက္ခတ်ဗေဒ ပညာရှင် တစ်ဦးနှင့်အတူ အာကာသတွင်း သွားရောက် ချိတ်ဆက်မည် ဖြစ်သည်။

ပညာရှင်များက Kiroboသည် အာကာသ စူးစမ်းလေ့လာရေး လုပ်ငန်းစဉ်များတွင် အမှန်တကယ် အကူအညီ ပေးနိုင်မည်ဟု ယုံကြည်လျှက် ရှိသည်။ Kiroboကို ဂျပန်နိုင်ငံတွင် မိတ်ဆက် ပြသခဲ့ရာ သွက်လက်ချက်ချာစွာ စကားပြောနိုင်သလို သတင်းထောက်များ၏ မေးမြန်းမှုများကိုလည်း ရည်ရည်မွန်မွန် ဖြေဆိုခဲ့သည်။

ပြည်သူ့ဆက်ဆံရေးနှင့် ကြော်ငြာ လုပ်ငန်းစု Dentsuနှင့် တိုကျိူတက္ကသိုလ်တို့သည် Robo Gargaeနှင့် Toyota ကော်ပိုရေးရှင်းတို့ကို ချိတ်ဆက်ပူးပေါင်းကာ ယခုစက်ရုပ်ငယ်လေးကို သုတေသနပြု ဖန်တီးခဲ့ခြင်း ဖြစ်သည်။ "ရုရှားက အာကာသထဲ အရင်ဆုံး ရောက်ခဲ့သူတွေ ဖြစ်တယ်။ အမေရိကန်တွေက လပေါ်ကို ပထမဆုံး ခြေချခဲ့တယ်။ ဒီတော့ ကျွန်တော်တို့ကလည်း ဂျပန်တွေဟာ လူသားတွေနဲ့ ဆက်သွယ် ပြောဆိုနိုင်တဲ့ ပထမဆုံး စက်ရုပ် နက္ခတ်ဗေဒ ပညာရှင်ကို အာကာသထဲ လွှတ်ပေးနိုင်သူတွေ ဖြစ်ချင်တယ်လေ"ဟု Kirobo ပရောဂျက်၏ မန်နေဂျာဖြစ်သူ ယိုရီချီကာ နီရှီဂျာမာက ပြောကြားခဲ့သည်။

Kiroboသည် (၁၃)လက်မသာ မြင့်ပြီး (၁)ကီလိုဂရမ် ဝန်းကျင်သာ အလေးချိန်ရှိသည်။ သတင်းထောက်များက Kirobo၏ အိပ်မက်ကို မေးမြန်းခဲ့ရာ "စက်ရုပ်နဲ့ လူသားတွေ အတူတကွ ယှဉ်တွဲနေထိုင်နိုင်တဲ့ အနာဂတ် တစ်ခုကို ဖန်တီးသွားချင်တာပါ"ဟု ဖြေဆိုသွားသည်။
Planet Myanmar Network

ပညာခေတ်...ပညာခေတ်နဲ့

Cartoon ကာတွန်း

လက်ကိုင်ဖုန်းပြောဆိုခ များ တစ်မိနစ်လျင် ၅ ကျပ် နှုန်းအထိ ကျဆင်းလာနိုင်ဟု ဆက်သွယ်ရေး ဒု ၀န်ကြီးဆို

ဇွန်၊၂၈
GSM နှင့် CDMA လက်ကိုင်ဖုန်းများ၏ ပြောဆိုဆက်သွယ်ခကို တစ်မိနစ်လျင် ၅ ကျပ်နှုန်း အထိကျဆင်းလာနိုင်သည့် အလားအလာ ရှိကြောင်း ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာနမှ ဒုတိယ၀န်ကြီး ဦးသောင်းတင်က ပြည်သူ့လွှတ် တော်တွင် ပြောကြားလိုက်သည်။
"ခုအချိန်ထိ (၅) ကျပ် နှုန်းအထိ အဆိုပြု ကမ်းလှမ်းထားတာ များမရှိသေးသည့်တိုင် အပြိုင် အဆိုင် လုပ်လာ ကြမည့် ကုမ္မဏီ ၄ ခုအနေနဲ့ ပြိုင်ဆိုင် မှု ရဲ့ သဘောတရား အရ တစ်ချိန်ပြီး တစ်ချိန် ဈေး နှုန်းတွေ ကျဆင်းလာမှာ ဖြစ် ပါတယ်။ တစ်ချိန်ချိန် မှာ တော့ ၅ကျပ် နှုန်း အထိကျဆင်းကောင်း ကျဆင်းလာနိုင်ပါတယ်" ဟု ဒု ၀န်ကြီးကပြောသည်။

ယင်းကိစ္စနှင့်ပတ်သက်၍ လသာ မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးကြည်မြင့် က "လက်ကိုင်ဖုန်းများ၏ ပြောဆို ဆက်သွယ်ခကို တစ်မိနစ်လျှင်(၅၀)ကျပ်နှုန်းမှ (၅)ကျပ်နှုန်းသို့ လျှော့ချပေးရန် လက်ကမ်းအဆိုပြုလာသည့် ကုမ္ပဏီများ ရှိ/မရှိနှင့် မြန်မာ့ဆက်သွယ်ရေး ကော်ပိုရေးရှင်းက ဦးဆောင် လျှော့ချ သတ်မှတ်ပေးရန် အစီအစဉ်ရှိ/မရှိ နှင့်စပ်လျဉ်းကာ ပြည်သူ့လွှတ်တော်တွင် မေးမြန်းခဲ့ ခြင်းဖြစ်သည်။

ထို့ပြင် ဒု ၀န်ကြီးက "ကျွန်တော် တို့ ဝန်ကြီးဌာန က လွှတ်လပ်စွာဈေးကွက်ယှဉ် ပြိုင် မှု အရ ဈေးနှုန်းကိစ္စကို သတ်မှတ်မှာ မဟုတ်ပါဘူး သူတို့ အနေ နဲ့ လွှတ်လပ်စွာ ယှဉ်ပြိုင်ခွင့်ပေးမှာ ဖြစ်ပါတယ်" ဟု ထပ်လောင်းပြောကြားသည်။

လက်ရှိတွင် GSM ၊CDMA လက်ကိုင်ဖုန်း များ၏ပြောဆိုဆက်သွယ်ခကို တစ်မိနစ်လျှင် (၅၀)ကျပ် နှုန်းမှ (၅) ကျပ်နှုန်းသို့လျှောချပေးရန်ကမ်းလှမ်း အဆိုပြုလာသည့် ကုမ္မဏီများ
မရှိသေးကြောင်း ဒု ၀န်ကြီး၏ ပြောကြားချက်အရ သိရသည်။
စိုင်းနောင်
နေပြည်တော်
Popular Myanmar News Journal

မြေပိုင်ဆိုင်မှုအတုဖြင့် ဂျပန်နိုင်ငံသားထံမှ လိမ်လည်ရန် ကြိုးစားသူကို အမှုဖွင့်

ရန်ကုန်၊ ဇွန် ၂၇
ဂျပန်နိုင်ငံသား Mr. Tetsuya Nakajima (၂၇ နှစ်) ထံမှ ရှင်းထက်ကျော် သွင်းကုန်ပို့ကုန် ကုမ္ပဏီ၏ အုပ်ချုပ်မှု ဒါရိုက်တာဦးညီညီဟန်က မြေပိုင်ဆိုင်မှု စာရွက်စာတမ်း အတုဖြင့် ကျပ်သိန်း ၅၀၀၀ ကို လိမ်လည်ရန် ကြိုးစားသည်ဟု ဆိုကာ ဂျပန်နိုင်ငံသားက အမှုဖွင့် တိုင်ကြားခဲ့ကြောင်း ရန်ကုန်တိုင်း ရဲတပ်ဖွဲ့မှူးရုံး၏ ထုတ်ပြန်ချက်အရ သိရသည်။

ဦးညီညီဟန်က မှော်ဘီမြို့နယ်ရှိ မြေကွက်တစ်ခုကို ၄င်းအမည်ပေါက် ပိုင်ဆိုင်ကြောင်း စာရွက်စာတမ်း အထောက်အထားများကို ဂျပန်နိုင်ငံ Harada Foods Co., Ltd. ၏ မန်နေဂျာဖြစ်သူ Mr. Tetsuya Nakajima ထံပေးပို့၍ ကျပ်သိန်း ၅၀၀၀ ဖြင့် ရောင်းချရန် အကြောင်းကြားခဲ့ရာ မြို့နယ်မြေ စာရင်းရုံးတွင် မြေကွက်နှင့် ပတ်သက်၍ စာရွက်စာတမ်းများကို စုံစမ်းစစ်ဆေးရာ လိမ်လည် အတုပြုလုပ်ထားသည့် စာရွက်စာတမ်းများ အဖြစ် တွေ့ရှိရကြောင်း အမှုစစ်ဒုရဲမှူးက The Voice သို့ ပြောကြားသည်။

အဆိုပါ ဂျပန်နိုင်ငံရှိ Harada Foods Co., Ltd. ၏ မန်နေဂျာကို ရှင်းထက်ကျော် သွင်းကုန်ပို့ကုန်ကုမ္ပဏီ ၏ အုပ်ချုပ်မှု ဒါရိုက်တာက ဦးညီညီဟန်က ကြိုတင်ငွေ စိုက်ထုတ်ပါက ဂျပန် လူမျိုးများ ကြိုက်သည့် “ဝ” ဥများကို တင်ပို့မည်ဟု ပြောဆိုသဖြင့် ၂၀၁၂ ခုနှစ် ဇန်နဝါရီလမှ နိုဝင်ဘာလအထိ ချေးငွေ၊ ကုန်ပစ္စည်းကြိုတင်ငွေ အပါအဝင် စက်ပစ္စည်းများ ပါဝင်သည့် ကျပ် ၉၆၅၄ သိန်းကို ရန်ကင်းမြို့နယ်ရှိ ရှင်းထက်ကျော် သွင်းကုန်ပို့ကုန် ကုမ္ပဏီရုံးခန်းတွင် စာချုပ် ချုပ်ဆိုကာ ပေးသွင်းခဲ့ကြောင်း၊ ထို့နောက် ကျပ် ၃၉၃၇ သိန်း ကိုးသောင်း တန်ဖိုးရှိ သော “ဝ”ဥ များကိုသာ ပေးပို့ခဲ့သဖြင့် Harada Foods Co., Ltd. ၏ အမှုဆောင် အရာရှိချုပ်နှင့် ဦးညီညီဟန်တို့ ၂၀၁၃ ခုနှစ် ဧပြီလတွင် ငွေကြေးဆိုင်ရာ သဘောတူညီမှု စာချုပ်ချုပ် ဆိုခဲ့ရာ ၂၀၁၃ ခုနှစ် မေလတွင် အပြီးသတ်ရှင်းလင်းရန် သဘောတူညီ ခဲ့သော်လည်း သတ်မှတ်ရက်တွင် ငွေကြေးများ ရှင်းလင်းခြင်း မရှိကြောင်း ဂျပန်နိုင်ငံသား၏ တိုင်ကြားချက်များ အရ သိရှိရသည်။

အဆိုပါ လိမ်လည်သည်ဟု တိုင်ကြားခံရသည့် အမှုကို မြို့နယ်ရဲတပ်ဖွဲ့မှူး၊ အမှုစစ် ဒုရဲမှူး၊ အမှုစစ်ဒုရဲအုပ်၊ နယ်ထိန်း အရာရှိတို့ဖြင့် အမှုစစ်ကော်မတီဖွဲ့ကာ စစ်ဆေးလျက်ရှိပြီး လိမ်လည်သူဟု စွပ်စွဲခံရသူကို ခေါ်ယူစစ်ဆေးရာတွင် တိုင်ကြားသူ၏ ပြောကြားချက် အချို့နှင့် ကွဲလွဲမှုများ ရှိကြောင်း အဆိုပါ ကော်မတီအဖွဲ့ဝင် တစ်ဦးက ဆိုသည်။
The Voice Weekly

စည်ပင်သက်တမ်းတိုးမပေး၍ ရေခဲကမ္ဘာပိတ်မည်

ရန်ကုန်၊ ဇွန် ၂၇
မြေငှားသက်တမ်း တစ်နှစ်ခြောက်လ ထိသာခွင့်ပြုခဲ့သော ကန်တော်ကြီး အမျိုးသားဥယျာဉ် အတွင်းရှိ ရေခဲကမ္ဘာ (ငွေနှင်းကမ္ဘာ)ကို ရန်ကုန်မြို့တော် စည်ပင်သာယာရေး ကော်မတီက ထပ်မံသက်တမ်း မတိုးပေးသဖြင့် ဇွန်လကုန်တွင် ပိတ်သိမ်းမည် ဖြစ်ကြောင်း ယင်းကုမ္ပဏီ၏ မန်နေဂျင်း ဒါရိုက်တာ ဦးကျော်ခိုင်က ပြောကြားသည်။

ကျပ်သိန်းပေါင်းတစ်သောင်း ခြောက်ထောင် အကုန်အကျခံဆောက်လုပ် ထားသော ရေခဲကမ္ဘာ(ငွေနှင်းကမ္ဘာ) ကို စည်ပင်သာယာရေးကော်မတီက ဆက်လက် လုပ်ကိုင်လိုလျှင် အခမဲ့လွှဲပြောင်း ပေးမည်ဖြစ်ပြီး နည်းပညာ အကူအညီလည်း ပေးသွားမည်ဖြစ်ကြောင်း ၄င်းကဆိုသည်။

ရန်ကုန်မြို့တွင် သတ်မှတ်ထားသော ပန်းခြံများအပါအဝင် ကန်တော်ကြီး၊ အင်းလျားကန် ဘေးပတ်လည်ရှိ ဧရိယာ များကို အစိမ်းရောင်ဧရိယာအဖြစ် သတ်မှတ်လိုက်သဖြင့် အဆောက်အအုံအသစ်များ ထပ်မံဆောက်လုပ်ခွင့်ကို ကန့်သတ်သွားရန် ရန်ကုန်တိုင်း ဝန်ကြီးချုပ်ထံ တင်ပြထားကြောင်း ရန်ကုန်မြို့တော် စည်ပင်သာယာရေး ကော်မတီက အင်ဂျင်နီယာဌာန (အဆောက်အအုံ) လက်ထောက်ဌာနမှူး ဦးနေဝင်းက ပြောကြားသည်။
"ဆောက်ပြီးသား အဆောက်အအုံ တွေကို ဖျက်ဖို့မရှိပါဘူး"ဟု ၄င်းကဆိုသည်။

ဆဲလ်ဆီးယပ် အနုတ် ၅ ဒီဂရီ မှ ၁၀ အထိအေးမြသော ကမ္ဘာ့မြောက်ဝင်ရိုးစွန်းတန်း အရသာကို မြန်မာနိုင်ငံတွင် ခံစားနိုင်ရန် ၂၀၁၂ ခုနှစ် ဖေဖော်ဝါရီလက ပထမဆုံး ဆောက်လုပ်ခဲ့ခြင်း ဖြစ်ပြီး လက်ရှိ ဝန်ထမ်း ၅၅ ဦးခန့် အလုပ်ခန့်ထားသည်။

ယခုလ ကျန်ရှိရက်များအတွင်း ကျောင်းသားများကို အခမဲ့ ပြသသွားမည် ဖြစ်ကြောင်း၊ လူကြီးဝင်ကြေး ၁၀၀၀ ကျပ်၊ ကလေး ၅၀၀ ကျပ်ဖြင့် ပြသမည် ဖြစ်ကြောင်း ဦးကျော်ခိုင်က ဆိုသည်။
The Voice Weekly

ဆရာတို့.. မြိုတာကျတော့

လမ်းပေါ်က လူ

တိုင်းမ်မဂ္ဂဇင်း ရေးသားချက် သံဃာ့ညီလာခံ ကန့်ကွက်

ဇူလိုင်လ ၁ ရက်နေ့ထုတ် ကမ္ဘာကျော် တိုင်းမ်မဂ္ဂဇင်းမှာ ရေးသားထားတဲ့ The Face of Buddhist Terror ဆိုတဲ့ဆောင်းပါးကို ဒီကနေ့ ရန်ကုန်မြို့မှာကျင်းပတဲ့ သံဃာ့ညီလာခံကြီးကနေ ကန့်ကွက်လိုက်ပါတယ်။

မြန်မာနိုင်ငံမှာ ဖြစ်ပွားခဲ့တဲ့ ပဋိပက္ခတွေဟာ သံဃာတော်တွေ မြှောက်ပင့်ပေးလို့ ဖြစ်ရတာမဟုတ်သလို မျိုးချစ်စိတ်ပြင်းထန်လွန်းတဲ့ လူငယ်တွေအပေါ်ကိုလည်း သံဃာတော်တွေအနေနဲ့ ငြိမ်းချမ်းအောင် ထိန်းသိမ်းပေးဖို့လိုအပ်ကြောင်း သီတဂူ ကမ္ဘာ့ဗုဒ္ဓတက္ကသိုလ် အဓိပတိဆရာတော် အရှင်ဥာဏိဿရက ညီလာခံမှာ မိန့်ကြားခဲ့ပါတယ်။ ဒါ့အပြင် သံဃာ့ညီလာခံကို တက်ရောက်လာကြတဲ့ သံဃာတော်တွေနဲ့ နိုင်ငံတော် သံဃာ့နာယကအဖွဲ့ချုပ် ဆရာတော်တွေ ညီညွတ်ကြဖို့ သီတဂူဆရာတော်က တိုက်တွန်းခဲ့သလို ဗုဒ္ဓဘာသာ ရဟန်းတော်တွေအနေနဲ့ သည်းခံခွင့်လွှတ်ကြဖို့ကိုလည်း မိန့်ကြားခဲ့ပါတယ်။

"သံဃာတော် တစ်ထောင်ကျော်က အစည်းအဝေးမှာ စကားပြောပါဆိုတဲ့ အခွင့်အရေးဟာ ဗမာနိုင်ငံမှာ တစ်ခါမှမရဖူးဘူး၊ ဒီတစ်ခါဘဲ ရဖူးတယ်၊ ရှေးဦးစွာပြောချင်တာက အားလုံးဗုဒ္ဓရဲ့တပည့် သားသံဃာတွေ သည်းခံတော်မူကြပါလို့ ပြောချင်ပါတယ်၊ သည်းခံခြင်းရဲ့နောက်မှာ တဆက်တည်း မရှိမဖြစ်တာက ခွင့်လွှတ်တော်မူကြပါ၊ ဒီနှစ်ချက်၊ အဲဒါကြောင့် ဒီကနေ့ မွတ်စလင်ကလည်း ဘာပြောပြော၊ ခရစ်ယာန်ကလည်း ဘာပြောပြော၊ တိုင်းမ်မဂ္ဂဇင်းက ဘာပြောပြော၊ သည်းခံတော်မူကြပါ၊ သည်းမခံနိုင်ရင် တပည့်တော်တို့ လုပ်ငန်းစဉ်ကြီးတစ်ရပ်လုံးကို အန္တရာယ်ရှိနိုင်တယ်၊ သည်းခံခြင်းနဲ့ ခွင့်လွှတ်ခြင်းကို လိုက်နာကျင့်သုံးကြပါ”

နိုင်ငံတော်သြဝါဒစရိယ ဆရာတော်ကြီးတွေအပါအဝင် မြန်မာနိုင်ငံ အနယ်နယ်အရပ်ရပ်က သံဃာတော်တွေ တစ်ထောင်ကျော်တက်ရောက်တဲ့ အမျိုးဘာသာသာသနာ ထိန်းသိမ်းစောင့်ရှောက်ရေး သြဝါဒခံယူပွဲ သံဃာ့ညီလာခံမှာ သီတဂူဆရာတော် အရှင်ဥာဏိဿရက အခုလိုသြဝါဒ မိန့်ကြားလိုက်တာဖြစ်ပါတယ်။

ဒါအပြင် မျိုးစောင့်ဥပဒေလို့ခေါ်တဲ့ မြန်မာဗုဒ္ဓဘာသာ အမျိုးသမီးများ လက်ထပ်ထိမ်းမြားခြင်းဆိုင်ရာ အရေးပေါ်ဥပဒေမူကြမ်းကို ဆွေးနွေးခဲ့ကြသလို အဲဒီဥပဒေမူကြမ်းဟာ ကုလသမဂ္ဂ အပြည်ပြည်ဆိုင်ရာ လူ့အခွင့်အရေး ကြေညာစာတမ်းကို ချိုးဖောက်တာမဟုတ်ဘူးလို့လည်း တက်ရောက်လာတဲ့ ရှေ့နေတွေက ဆွေးနွေးပြောဆိုခဲ့ကြပါတယ်။

ဒီသံဃာ့ညီလာခံကို ရန်ကုန်မြို့ အင်းစိန်မြို့နယ် အောင်ဆန်းတပ်ဦးကျောင်းမှာ ကျင်းပခဲ့တာဖြစ်ပြီး သီတဂူ ကမ္ဘာ့ဗုဒ္ဓတက္ကသိုလ် အဓိပတိဆရာတော် အရှင်ဥာဏိဿရအပြင်၊ နိုင်ငံတော်သြဝါဒါစရိယ အင်းစိန်ရွာမ ပရိယတ္တိစာသင်တိုက် ဆရာတော် ဘဒ္ဒန္တတိလောကာဘိဝံသ၊ မန္တလေး မစိုးရိမ်တိုက်သစ်ဆရာတော် ဦးဝီရသူတို့လည်း တက်ရောက်ခဲ့ကြပါတယ်။
RFA Burmese

ကလေးအလုပ်သမားကိစ္စဟာ စိန်ခေါ်မှုတစ်ရပ် ဖြစ်နေဆဲ

2013-06-27
မြန်မာနိုင်ငံမှာ နိုင်ငံရေးး စီးပွားရေး ပြောင်းလဲ ပွင့်လင်းလာနေပေမယ့် ကလေးအလုပ်သမားကိစ္စဟာ အဓိက ပြဿနာတစ်ရပ် ဖြစ်နေဆဲပဲလို့ ပြင်သစ်သတင်းဌာန တစ်ခုက ဖော်ပြပါတယ်။

၂၀၁၂ ခုနှစ် နိုင်ငံတကာအလုပ်သမားအဖွဲ့ချုပ် ( ILO ) ရဲ့ ညွှန်းကိန်းတွေအရ အရွယ်မရောက်သေးတဲ့ ကလေးငယ်တွေ အလုပ်ခိုင်းစေခံရမှု အခြေအနေမှာ မြန်မာနိုင်ငံဟာ မြောက်ကိုရီးယား၊ ဆိုမာလီယာ၊ ဆူဒန် နိုင်ငံတွေနဲ့အတူ အဆိုးရွားဆုံးနိုင်ငံများစာရင်းမှာ ပါဝင်နေဆဲဖြစ်ပါတယ်။

အသက် (၁၅)နှစ်အောက် ကလေးတွေကို အလုပ်မခိုင်းရ၊ (၁၅) နှစ် နဲ့ (၁၈) နှစ်ကြားကလေးတွေကို (၄) နာရီသာ အလုပ်လုပ်ခွင့်ပြုရမယ်လို့ ဥပဒေပြဌာန်းထားပေမယ့် ဒီဥပဒေဟာ မြန်မာနိုင်ငံမှာ အသက်မ၀င်ဘဲ ဖြစ်နေတယ်လို့ France 24 သတင်း က ဆိုပါတယ်။

မြန်မာနိုင်ငံလူဦးရေ ရဲ့သုံးပုံတစ်ပုံ နီးပါးဟာ (၁၅) နှစ်အောက်ကလေးတွေဖြစ်ပြီး၊ ကျောင်းမနေနိုင်ဘဲ စားဝတ် နေရေးအတွက် အလုပ်လုပ်ခိုင်းခံနေရတာ၊ စစ်တပ်ထဲ ဆွဲသွင်းခံနေကြရပါတယ်။

မြန်မာနိုင်ငံရဲ့ လက်ရှိ ပြုပြင်ပြောင်းလဲမှုတွေဟာ အဲဒီကလေးတွေ ဆီမရောက်သေးဘူးလို့လည်းဖော်ပြပါတယ်။

ကမ္ဘာလှည့် ခရီးသွားတွေ ထူပြောရာ လဘက်ရည်ဆိုင်တွေ၊ စားသောက်ဆိုင်တွေ၊ ကာရာအိုကေဘားတွေ အနှိပ်ခန်း တွေမှာ အလုပ်လုပ်နေကြတဲ့ ကလေးငယ်တွေကို မမြင်ချင်အဆုံး တွေ့နေရတယ်လို့ ရေးသားပါတယ်။
RFA Burmese

ရှားပါးစာအုပ် မိတ္တူဈေးကွက်ဖြင့် အရောင်းဆက်နေ

ရှားပါးစာအုပ်များအတွက် ကော်ပီ (မိတ္တူ) စာအုပ်ဈေးကွက် ဆက်လက် ရှိနေဦးမည်ဟု စာအုပ်အရောင်းဆိုင် ရှင်အချို့က ဆိုသည်။”တချို့ စာအုပ်တွေက ရှားပါး စာ အုပ်တွေ ဖြစ်နေတယ်။ နောက်ထပ် ပုံ နှိပ် ထုတ်ဝေတာကလည်း မရှိတော့ လူ တစ်ဦးတစ်ယောက်အတွက် အသုံးဝင် တယ်ဆိုရင်ပဲ ကော်ပီလုပ်ပေးလိုက်တာ ပါ။ အကျိုးအမြတ် ဆိုတာထက် စာဖတ် သူရဲ့ အသုံးဝင်မှုအတွက် လုပ်တာပါ” ဟု ပန်းဆိုးတန်းလမ်းရှိ ဝင်းညီနောင် စာအုပ် အဟောင်းမျိုးစုံ ရောင်းဝယ်ရေး ဆိုင်ရှင်က ပြောသည်။

ထပ်မံထုတ်ဝေခြင်း မရှိတော့ သည့် ရှားပါးစာအုပ်အချို့အား ၎င်းတို့ အနေဖြင့် ကော်ပီလေးငါးအုပ် ပြုလုပ်၍ ရောင်းပေးသည့်အခါ ရံဖန်ရံခါတွင် ချက်ချင်းကုန်သွားသည် ရှိသကဲ့သို့ နှစ် ချီ၍ ရောင်းရသည့်အခါများလည်း ရှိ ကြောင်း မိတ္တူအရောင်းဆိုင်များထံမှ သိရသည်။ရှားပါးစာအုပ်များ အဖြစ် ကော်ပီ ကူး၍ ရောင်းချသည့် စာအုပ်အများ စုမှာအရေးတော်ပုံ ကျမ်းများ၊ ဆေးကျမ်း များ၊ ဂါထာမန္တာန်နှင့် အင်းစာအုပ်များ၊ သမိုင်းမှတ်တမ်း စာအုပ်များ၊ ဥပဒေ စာအုပ်များ ဖြစ်ပြီး ကော်ပီဆွဲ၍ စာအုပ် ပြန်လုပ်သည့် ကုန်ကျစရိတ်ထက် အ နည်းငယ်ပိုယူ၍ စာအုပ်တန်ဖိုးများကို သတ်မှတ်ကြသည်ဟုလည်း မိတ္တူစာ အုပ်ဆိုင်များက ဆိုသည်။

ယင်းကဲ့သို့ ရှားပါး စာအုပ်အချို့ ကား ကော်ပီပြုလုပ်ရာတွင် မည်သူတစ် ဦးတစ်ယောက်ထံမှ ခွင့်ပြုချက် တောင်း ခံခြင်း မပြုကြကြောင်းလည်း မိတ္တူစာ အုပ်ဆိုင်ရှင် အချို့ထံမှ သိရသည်။”သူတို့ကလည်း ဒီလို စာအုပ်လေး တစ်အုပ် နှစ်အုပ် မိတ္တူဆွဲရောင်းတာနဲ့ ပတ်သက်ပြီး ဘာမှ ပြောနေကြမှာ မ ဟုတ်ပါဘူး။ ပုံနှိပ်ထုတ်ရအောင်လည်း ကုန်ကျစရိတ်နဲ့ ဘယ်လိုမှ မျှမှာမဟုတ် ဘူးလေ” ဟု ၃၇-လမ်းရှိ အုန်းစော စာအုပ်ဆိုင်ရှင်က ပြောသည်။ လက်ရှိကော်ပီဈေးကွက်တွင် နိုင်ငံရေး စာအုပ်များ၊ သမိုင်းမှတ်တမ်းများ၊ အရေးတော်ပုံကျမ်းများ အရောင်းသွက်ကာ ဝယ်ယူသူအများစုမှာ ပြည်တွင်း စာပေဝါသနာ ရှင်များ ဖြစ်သည်ဟု စာ အုပ်ဆိုင်များက ပြောသည်။
အိမ်စည်စိုးစံ
Popular Myanmar News Journal

သံဃာများထောက်ခံထားသည့် မျိုးစောင့်ဥပဒေပြဋ္ဌာန်းရေး မကြာမီ လွှတ်တော်တင်မည်

ရန်ကုန်၊ ဇွန် ၂၇
ဗုဒ္ဓဘာသာဝင် အမျိုးသမီးများ၏ ရပိုင်ခွင့်များ အပြည့်အဝရရှိရေးဟုဆိုကာ
ရေးဆွဲနေသည့် မျိုးစောင့်ဥပဒေကို ပြဋ္ဌာန်းနိုင်ရန်အတွက် တစ်နိုင်ငံလုံးက သံဃာတော် အပါး ၁၅၀၀ကျော် တက်ရောက်သည့် အမျိုးဘာသာ သာသနာ ထိန်းသိမ်းစောင့်ရှောက်ရေး သြဝါဒ ခံယူပွဲနှင့် ဦးဆောင် ဆရာတော် များ တွေ့ဆုံ ညှိနှိုင်းပွဲက ထောက်ခံလိုက်ပြီး ဥပဒေပြဋ္ဌာန်းရန် မကြာမီ လွှတ်တော်တင်မည်ဖြစ်ကြောင်း ယင်းပွဲ၏ သတင်း ထုတ်ပြန်ရေး အဖွဲ့ခေါင်းဆောင် ဆရာတော် ဒေါက်တာဘဒ္ဒန္တဓမ္မပီယက မိန့်ကြားသည်။

သီတဂူ ကမ္ဘာ့ဗုဒ္ဓတက္ကသိုလ် အဓိပတိ ဒေါက်တာ အရှင်ဥာဏိဿရ တက်ရောက်ခဲ့သည့် အင်းစိန်မြို့နယ် အောင်ဆန်းတောရ တပ်ဦးကျောင်း တိုက်တွင် ဇွန်လ၂၇ရက်နေ့က ပြုလုပ်သည့် ယင်းအခမ်းအနားအပြီးတွင် မျိုးစောင့်ဥပဒေကို ထောက်ခံသည့်အချက် အပါအဝင် အချက်ငါးချက် ပါဝင်သည့် ကြေညာချက် တစ်စောင်ကို ထုတ်ပြန်ခဲ့သည်။

ထိုကြေညာချက် ငါးချက်အနက် ကျန်လေးချက်မှာ နိုင်ငံတော် အစိုးရနှင့် နိုင်ငံတော် သံဃမဟာ နာယကအဖွဲ့တို့အား အမျိုးဘာသာ သာသနာအရေးကိစ္စများကို ကူညီရေး၊ ပြည်သူများ ငြိမ်းချမ်းစွာ နေထိုင်ရေး အတွက် ပဋိပက္ခများ ထပ်မဖြစ်စေရန် ဝိုင်းဝန်းဆောင်ရွက်ရေး၊ အမျိုးဘာသာ သာသနာ ထိန်းသိမ်းစောင့်ရှောက်ရေးအဖွဲ့ ဖွဲ့စည်းရေးနှင့် တိုင်းမ်မဂ္ဂဇင်း ၏ ဖော်ပြချက်ကို ကန့်ကွက်ကြောင်းတို့ဖြစ်သည်။

အမျိုးသမီး အခွင့်အရေးများကို ချိုးဖောက်သည်ဟု ဝေဖန်မှုများ ထွက်ပေါ်နေ သည့် အဆိုပါ မျိုးစောင့်ဥပဒေကို အမျိုးသမီးများ၏ အခွင့်အရေးများနှင့် ဂုဏ်သိက္ခာကို မြှင့်တင်ပေးရန် ရေးဆွဲထားခြင်းဖြစ်ပြီး ယင်းဥပဒေကို ဥပဒေ ပညာရှင်များနှင့် နောက်ဆုံးအဆင့် ပြင်ဆင်ပြီး ပြည်သူလူထု၊ သံဃာထု ထောက်ခံမှုဖြင့် လွှတ်တော်သို့ တင်ပြသွားမည်ဖြစ်ကြောင်း အထက်ပါ တွေ့ဆုံညှိနှိုင်းပွဲ၏ သတင်း ထုတ်ပြန်ရေးအဖွဲ့ အဖွဲ့ခေါင်းဆောင် ငါးကျမ်းပြန်ကျောင်းတိုက် ဆရာတော် ဒေါက်တာဘဒ္ဒန္တဓမ္မပီယက မိန့်ကြား သည်။

မြန်မာနိုင်ငံရှိ အစ္စလာမ်၊ ခရစ်ယာန်၊ ဟိန္ဒူဘာသာတို့တွင် ထိမ်းမြားခြင်းနှင့် ပတ်သက်သည့် ဥပဒေအသီးသီး ပြဋ္ဌာန်းထားကြောင်း၊ ယင်းဘာသာတို့တွင် အခြားဘာသာဝင်များနှင့် လက်ထပ်ခွင့်မပြုကြောင်း၊ လက်ထပ်လိုပါက ၎င်းတို့ ဘာသာများသို့ ကူးပြောင်းပြီးမှသာ လက်ထပ်ခွင့်ရှိပြီး ဗုဒ္ဓဘာသာတွင် ယင်းကဲ့သို့ ဥပဒေ ပြဋ္ဌာန်းထားခြင်း မရှိသေးကြောင်း မျိုးစောင့်ဥပဒေကြမ်း ထွက်ပေါ်ရန် ရေးဆွဲနေသည့် ဥပဒေပညာရှင် ဦးရဲခေါင်ညွန့်က ပြောကြား သည်။

မြန်မာနိုင်ငံတွင် ပြဋ္ဌာန်းထားသည့် ၁၉၅၄ ခုနှစ် ဗုဒ္ဓဘာသာဝင် မိန်းမများ
အထူး ထိမ်းမြားခြင်းနှင့် အမွေဆက်ခံမှု အက်ဥပဒေသည်လည်း ဗုဒ္ဓဘာသာ
မဟုတ်သည့် အခြားဘာသာဝင်များက ၎င်း၏ဘာသာကို စွန့်လွှတ်ရန်မလိုဘဲ
မြန်မာ ဗုဒ္ဓဘာသာဝင် အမျိုးသမီးများကို လက်ထပ်နိုင်သည့် ဥပဒေဖြစ်ကြောင်း၊ ဗုဒ္ဓဘာသာဝင် အမျိုးသမီးများသည် အခြား ဘာသာဝင် များ လက်ထပ်ရန် ဘာသာပြောင်းနေရကြောင်း မျိုးစောင့်ဥပဒေ ပြဋ္ဌာန်းရေး စာတမ်းတွင် ဖော်ပြထားသည်။

လက်ရှိအခြေအနေအရ နိုင်ငံတွင် ခေတ်နှင့်လျော်ညီရန်ပြင်ဆင်ရမည့် ဥပဒေ ၃၀၀ ကျော်ခန့်ရှိပြီး လယ်ယာမြေ ဥပဒေကို အရေးတကြီး ပြင်ဆင်ရန် လိုအပ် လျက်ရှိကြောင်း၊ လက်ထပ် ထိမ်းမြားခြင်းနှင့် ကွာရှင်းခြင်းဥပဒေအရ အမျိုးသမီးများ အခွင့်အရေး ဆုံးရှုံးလျက်ရှိသောကြောင့် ထိုဥပဒေကို သာ ပြင်ဆင်ရန် လိုအပ်ကြောင်း၊ မျိုးစောင့်ဥပဒေနှင့် ပတ်သက်၍ ထောက် ခံ ဆွေးနွေးခြင်း၊ ကန့်ကွက်ခြင်းတို့မှာ မိမိ တစ်ဦး တစ်ယောက်တည်းနှင့် ဆုံးဖြတ်ခွင့်မရနိုင်ဘဲ ပါတီ၏ သဘောထားများလည်း လိုအပ်ကြောင်း မင်္ဂလာတောင်ညွန့် မဲဆန္ဒနယ်မှ လွှတ်တော်ကိုယ်စားလှယ် ဒေါ်ဖြူဖြူသင်းက ဆိုသည်။

အဆိုပါ အခမ်းအနားတွင် မန္တလေး မစိုးရိမ်ကျောင်းတိုက် သံဃာတော် တစ်ပါးဖြစ်သူ အရှင်ဝီရသူပုံကို မျက်နှာဖုံးတင်၍ ‘ဗုဒ္ဓဘာသာဝင်များ ဆိုးသွမ်းသောအခါ’ ဟု အဓိပ္ပာယ်ရသည့် ဆောင်းပါးကိုဖော်ပြခဲ့သည့် ယခုနှစ် ဇူလိုင်လ ၁ရက်နေ့တွင် ထွက်ရှိသည့် TIME မဂ္ဂဇင်းကို ကန့်ကွက် ရှုတ်ချကြောင်း ဒေါက်တာအရှင်ဥာဏိဿရ မိန့်ကြားခဲ့ပြီး တက်ရောက် လာသည့် သံဃာတော်များကလည်း ကန့်ကွက်ကြောင်း ကြေညာချက် တွင် ဖော်ပြထားသည်။

တိုင်းမ် မဂ္ဂဇင်း၏ ဖော်ပြချက်နှင့် ပတ်သက်၍ သံဃာတော်များက သည်းခံ၊ ခွင့်လွှတ်ရန် မေတ္တာရပ်ခံခဲ့ပြီး မဟုတ်မမှန်သည့် အကြောင်းကို မဟုတ်ကြောင်း ပြန်လည် ရှင်းလင်းရန်၊ ဟုတ်မှန်ပါက ဟုတ်မှန်ကြောင်း ဝန်ခံရန် လိုအပ်ကြောင်း ဒေါက်တာ အရှင်ဥာဏိဿရက မိန့်ကြားခဲ့သည်။

"မွတ်ဆလင်၊ ခရစ်ယာန်၊ TIME ဘာပြောပြော သည်းခံ ခွင့်လွှတ်ကြပါ။ သည်းခံခွင့်လွှတ်ခြင်းက ရည်ရွယ်ချက်တွေ အောင်မြင်ဖို့ အခြေခံ အုတ်မြစ်ဖြစ်တာကြောင့် ဗုဒ္ဓရဲ့ သားတပည့် သံဃာတော်များအနေနဲ့ သည်းခံတော်မူကြပါ။ ခွင့်လွှတ်တော်မှုကြပါ" ဟု ဆရာတော်က အဆိုပါ အခမ်းအနားတွင် အကြိမ်ကြိမ် မိန့်ကြားခဲ့သည်။

ငြိမ်းချမ်းရေးကို လုပ်ဆောင်နေသည့် ဘာသာ၊ ငြိမ်းချမ်းရေးကို လုပ်ဆောင်နေသည့် ပုဂ္ဂိုလ်များကို တိုင်းမဂ္ဂဇင်းက 'ဗုဒ္ဓဘာသာ သွေးဆူနေ ကြပြီ' ဟု ဖော်ပြခဲ့ကြောင်း ဒေါက်တာ အရှင်ဥာဏိဿရက ထပ်မံ မိန့်ကြားခဲ့သည်။
The Voice Weekly

အမျိုးဘာသာသာသနာ စောင့်ရှောက်ရေးအသင်း ဖွဲ့စည်းရန် သံဃာ့အစည်းအဝေးကျင်းပ (ရုပ်/သံ)

Friday, June 28, 2013
မျိုးစောင့်ဥပဒေမူကြမ်းကို ဥပဒေပြဋ္ဌာန်းရေးအတွက် လွှတ်တော်သို့ တင်သွင်းသည့်အခါတွင် မည်သည့်ပါတီ၏ အကူအညီကိုမျှ ရယူမည်မဟုတ်ဘဲ ပြည်သူများကို ဆန္ဒခံယူပြီး ပြည်သူများရဲ့ ဆန္ဒမဲလတ်မှတ်များဖြင့်သာ လွှတ်တော်ကို တင်ပြတောင်းဆိုသွားမည်ဖြစ်ကြောင်း

မြန်မာ့ခေတ်

သစ်ထုတ်ရေးဌာနပိုင် ဆင်ကိုသတ်၍ အစွယ်ဖြတ်ယူခံရ

မော်လိုက်၊ ဇွန် ၂၇
စစ်ကိုင်းတိုင်းဒေသကြီး၊ မော်လိုက်မြို့နယ် အနောက်သစ်ထုတ်ရေး ဒေသရှိ သစ်ထုတ်ရေးဌာနပိုင် ဆင်တစ် ကောင်းအား ယခုလ ၂၁ ရက်နေ့ မနက် ၈ နာရီအချိန်ခန့်က သေနတ်ဖြင့်ပစ်သတ်၍ အစွယ်ဖြတ်တောက်ခိုးယူခံ ခဲ့ရကြောင်း ရဲဌာနပိုင် မှတ်တမ်းများက ဖေော်ပြထားသည်။

အဆိုပါ မှတ်တမ်းများတွင် မော်လိုက်အနောက်ဘက်သစ်ထုတ်ရေးေးသမှ လက်ထောက်ဆင်ခေါင်း ဦးမောင်ဆန်းသည် သစ်ထုတ်ရေးဌာနပိုင် ဆင်အမှတ် (၅၆၀) ဆင်အမည် ဇော်ဇော်(အထီး) အသက် ၃၁နှစ် ၅ လ ခန့်၊ ကာလတန်ဘိုး ငွေကျပ် သိန်း ၇၀ တန် ဆင်ကြီးတစ်ကောင်အား ယခုလ ၁၉ ရက်နေ့ မနက် ၉ နာရီအချိန်ခန့်က ဆင်စခန်းမှ ထူးခတ်၍ တောတွင်းသို့ လွတ်ကျောင်းထားခဲ့ရာ ယခုလ ၂၁ ရက်နေ့ မနက် ၈ နာရီခွဲအချိန်တွင် ၎င်းဆင်၏ ဆင်ဦးစီး ဦးဖိုထောင်ဆိုသူမှ လိုက်လံရှာဖွေစဉ် မော်လိုက်သစ်တောကြိုးဝိုင်း အကွက်အမှတ် (၁၄၆) ဆိုင်ခန်းစခန်းမှ နှစ်မိုင်အကွာ တောတွင်းတစ်နေရာတွင် လွတ်ကျောင်းဆင်၏ ၀ဲဘက်နားထင်၌ သေနတ်ဒဏ်ရာနှစ်ချက်ဖြင့် သေဆုံးနေခဲ့ကြောင်း၊ ၎င်းဆင်၏အစွယ်နှစ်ချောင်းမှာ ဖြတ်တောက် ခိုးယူခံရသည့်အတွက် အစွယ်များမရှိတော့ကြောင်း ဆက်လက်၍ ဖော်ပြထားသည်။

“ တိရစ္ဆာန်လောကမှာ လူကနေပါးစပ်ကပြောပြီးခိုင်းလို့ရတာဟာ ဆင်ပဲရှိတယ်..။ ခွန်အားကြီးသလောက် စိတ်ကောင်းရှိတတာ ဆင်တွေဘဲဖြစ်ပါတယ်..” ဟု သဘာဝပတ်ဝန်းကျင် ထိန်းသိမ်းစောင့်ရှောက်ရေးနှင့် သစ် တောရေးရာ တိုင်းဒေသကြီးဌာနမှ အကြီးတန်းအရာရှိတစ်ဦးမှ ပြောပြသည်။

အဆိုပါ သစ်ထုတ်ရေးဌာနပိုင် ဆင်ကိုသတ်၍ အစွယ်ဖြတ်တောက်ခိုးယူခံရခြင်းနှင့်ပတ်သက်၍ ယခုလ ၂၃ ရက်နေ့ မွန်းလွဲ ၂ နာရီအချိန်ခန့်က မော်လိုက်အနောက်ဘက်သစ်ထုတ်ရေး ဒေသမှ သစ်တောအုပ်ကြီး ဦးအောင်တင်၏ တိုင်တန်းချက်များအရ တမူးမြို့နယ်ခွဲ ရဲစခန်းမှ (ပ) ၁၂/ ၂၀၁၃ ပြည်သူပိုင်ပစ္စည်းကာ ကွယ်ရေးအက်ဥပဒေပုဒ်မ ၆(၁)အရ အမှုရေးဖွင့်၍ ရဲစခန်းက ဆက်လက်ဆောင်ရွက်ရှိကြောင်း သိရသည်။
ကိုတိုး ချင်းတွင်း

မွေးကင်းစ ကလေးငယ်အလောင်းအား စွန့်ပစ်ထားသည်ကို တွေ့ရှိ

ဓါတ်ပုံ google

ချောင်းဦး၊ ဇွန် ၂၈
မုံရွာခရိုင်၊ ချောင်းဦးမြို့နယ်၊ ငါးယှန်ကျေးရွာ ဘုန်းကြီးကျောင်း အုတ်တံတိုင်းအနီး ယခုလ ၂၇ ရက်နေ့မနက် ၇ နာရီ ခွဲအခိန်ခန့်က မွေးကင်းစ ကလေးငယ် အလောင်းတစ်လောင်း အား တွေ့ရှိခဲ့ရကြောင်း ရဲဌာနပိုင် မှတ်တမ်းများအရ သိရသည်။

အဆိုပါ မှတ်တမ်းများတွင် ကလေးသူမွေးဖွားခြင်းကိစ္စရပ်အား ထိန်ချန်လိုသော ရည်ရွယ်ချက်များဖြင့် မွေးကင်းစ ကလေးသူငယ်(ယောင်္ကျားလေး)ဖြစ်သူကို ယင်းကဲသို့ လာရောက်စွန့်ပစ်ထားခြင်းဖြစ်နိုင်ဖွယ်ရာရှိကြောင်း၊ စွန့်ပစ်ခံ ကလေးသူငယ်၏ ရုပ်အလောင်းသည် ချက်ကြိုးဖြတ်တောက်ထားခြင်းမရှိသေးကြောင်း အမှုမှန်ပေါ်ပေါက်စေရေး အတွက် ချောင်းဦးရဲစခန်း (ပ) ၁၇၃/ ပုဒ်မ ၃၁၈ အရ ဒုရဲအုပ် အောင်ခိုင်ထွန်းမှ ဆက်လက်ဆောင်ရွက် လျက်ရှိ ကြောင်း ဖော်ပြပါရှိသည်။

မွေးကင်းစ ကလေးသူငယ်စွန့်ပစ်ခြင်းနှင့်ပတ်သက်၍ ပြီးခဲ့သည့် မေလခန့်ကလည်း ချောင်းဦးမြို့နယ် ဘူတာ ကျေးရွာလမ်းခွဲ အမှိုက်ပုံပေါ်တွင် အလားတူ ကလေးစွန့်ပစ်သည့် ကိစ္စတစ် ရပ်ပေါ်ပေါက်ခဲ့ကြောင်း ဒေသခံ လူမှုကွန် ယက် အဖွဲ့၏ မှတ်တမ်းများ၌ ဖော်ပြထားကြောင်း သိရှိရသည်။
ကိုတိုး ချင်းတွင်း

လမ်းဘေး ဖုန်းဆိုင်တွေ ပျောက်ကွယ်တော့မလား

မဝေးတော့တဲ့ အနာဂါတ်မှာ အများပြည်သူဖုန်းဆိုင်လေးများကို လျှော့ချဖို့ ဆက်သွယ်ရေးစာတိုက်နှင့် ကြေးနန်းဝန်ကြီးဋ္ဌာနက ဆုံးဖြတ်ရတော့မည် (ဓာတ်ပုံ – Reuters)

June 28, 2013
မိုဘိုင်းဖုန်း ဆက်သွယ်ရေး အော်ပရေတာ လိုင်စင်အတွက် နော်ဝေက တယ်လီနောနဲ့ ကာတာက အူရီဒူးကို လေလံချထားပေးခဲ့ပြီးပါပြီ။ တချိန်တည်းမှာ ၁၅၀၀ တန် တန်ဖိုးနည်း မိုဘိုင်းဖုန်းဆင်းကတ်များကိုလည်း အစိုးရက ချထားနေတဲ့နောက်ပိုင်းတွင် ရန်ကုန်မြို့ လမ်းဘေးတယ်လီဖုန်း ဆိုင်လေးများ၏ ၀င်ငွေမှာ သိသိသာသာ လျော့ကျသွားခဲ့ကြောင်း လမ်းဘေးဖုန်းဆိုင်လုပ်ငန်း  လုပ်ကိုင်သူများက ပြောဆိုသည်။

တန်ဖိုးနည်းတယ်လီဖုန်းဆင်းကတ်များ မပေါ်ပေါက်မီက အစိုးရ အများပြည်သူသုံးတယ်လီဖုန်းဆိုင်တစ်ခု၏ တစ်ရက် ပျမ်းမျှဝင်ငွေမှာ  ကျပ်နှစ်သောင်းခန့်အထိရှိခဲ့ရာမှ ယခုအခါ ကျပ် ၇၀၀၀ ခန့်သာ ရှိတော့ကြောင်း၊ မနက် မိုးလင်းမိုးချုပ်ဖွင့်သော ပုဂ္ဂလိက တယ်လီဖုန်းဆိုင်လေးများမှာလည်း တစ်ရက် ကျပ် သုံးသောင်းခန့်အထိ ၀င်ငွေရှိခဲ့ရာမှ ယခုအခါ တစ်ရက် ကျပ်တစ်သောင်းခန့်သာ ၀င်ငွေရှိတော့ကြောင်း လမ်းဘေးဖုန်းဝန်ဆောင်ပေးသူများက ပြောဆိုကြသည်။

မြန်မာဆက်သွယ်ရေးလုပ်ငန်း(MPT)လက်အောက်တွင် ရှိသော အများပြည်သူသုံးတယ်လီဖုန်းဆိုင်များ၏ တရက် ၀င်ငွေမှာလည်း သိသိသာသာ ကျဆင်းလာသည့်အတွက် ဖုန်းဆိုင်တွင် ၀န်ဆောင်မှုပေးသော ၀န်ထမ်းများမှာလည်း ၄င်းတို့အနာဂတ်အတွက် အခြားအလုပ်တစ်ခုခုပြောင်းလုပ်ရန် စဉ်းစားလာကြသည်ဟု ဆိုသည်။

‘အခုတောင် ဒီလောက်ဝင်ငွေ လျော့နေတာ နိုင်ငံခြားကုမ္ပဏီတွေပါ ၀င်လာရင် ကျမတို့လမ်းဘေးဖုန်းဆိုင်လေးတွေ ရပ်တည်ဖို့ ခက်မှာ။ ကျမတောင် ကုမ္ပဏီအလုပ်ပြောင်းလုပ်ဖို့ စဉ်းစားနေပြီ ”ဟု အသက် ၂၇ အရွယ် ဆက်သွယ်ရေးဝန်ထမ်း မကြည်နိုင်မြင့်က ဧရာဝတီသို့ ပြောသည်။

မကြည်မြင့်နိုင်မှာ မြန်မာ့ဆက်သွယ်ရေးလုပ်ငန်း အများပြည်သူသုံး တယ်လီဖုန်းဝန်ဆောင်မှုဋ္ဌာနတွင် ၄ နှစ်ခန့်အလုပ်လုပ်ခဲ့ပြီး ယခုအခါ ဆူးလေ ဘုရားအနီး မဟာဗန္ဓုလလမ်းပေါ်ရှိ အများပြည်သူသုံး တယ်လီဖုန်းဆိုင်တွင် မနက် ၇ နာရီမှ ညနေ ၄ နာရီအထိ အလုပ်လုပ်လျက် ရှိသည်။

တစ်ရက် ကျပ် ၇၀၀၀ ခန့်သာ ရရှိသော သူမ၏ဖုန်းဆိုင်သို့ လာရောက်ဖုန်းဆက်သူ အရေအတွက်မှာ မိနစ်သုံးဆယ်အတွင်း လူ ၄ ဦး ခန့်သာရှိပြီး အချိန်ခဏသာ လိုရင်းတိုရှင်း ပြောဆိုကြသည်ကို တွေ့ရသည်။ အစိုးရ အများပြည်သူသုံးဖုန်းဆိုင်များက တစ်မိနစ်လျှင် ကျပ် ၅၀ ယူပြီး ပုဂ္ဂလိက ဖုန်းဆိုင်များက တစ်မိနစ်လျှင် အနည်းဆုံး ၁၀၀ ကျပ်ယူသည်။

သူမ၏ ဖုန်းဆိုင်မှ လှည့်ထွက်လာသူတစ်ဦးက”လမ်းဘေးဖုန်းတွေ ရှိတာ ကျနော်အတွက်တော့ ကောင်းတယ်။ အလုပ်ထဲမှာ မပြောချင်တဲ့ ကိစ္စကိုဒီမှာ လာပြောတယ်။ ကျနော်မှာ GSM နှစ်သိန်းတန် ဖုန်းတလုံးရှိတယ်။ သိပ်မသုံးဖြစ်ဘူး”ဟု ဆိုသည်။ ၄င်းမှာ ဆိပ်ကမ်းသာလမ်းထဲရှိ ဆောက်လုပ်ရေးလုပ်ငန်းတစ်ခုတွင် အလုပ်သမားကြီးကြပ်သူ ဖြစ်ပြီး လမ်းဘေးဖုန်းကို လွတ်လွတ်လပ်လပ် စကားပြောနိုင်ရန် လာရောက်အသုံးပြုခြင်း ဖြစ်သည်။

မိမိမိုဘိုင်းလ်ဖုန်း ရုတ်တရက်ပျောက်သွားခြင်း၊ ဖုန်းမေ့ကျန်ခဲ့ခြင်းနှင့် အခြားကိစ္စအမျိုးမျိုးတို့ အတွက် လမ်းဘေးဖုန်းဆိုင်လေးများ ရှိနေခြင်းသည် အလွန်အသုံးဝင်ကြောင်း အသက် ၁၈ နှစ်အရွယ် ၁၀တန်းကျောင်းသား ကိုသက်ပိုင်က ပြောသည်။ ကိုသက်ပိုင်မှာ သူ၏ မိုဘိုင်းလ်ဖုန်း ခါးပိုက်နှိုက်ခံလိုက်ရသောကြောင့် ယခုဆက်သွယ်ရေးသို့ ဖုန်းကတ်ပျောက် ပြန်လျှောက်စဉ်ကာလတွင် လမ်းဘေးဖုန်းကို အားပြုနေရသည်။

”လမ်းဘေးဖုန်းဆိုင်က ဖုန်းမရှိတဲ့သူတွေနဲ့ အရေးပေါ်ဖုန်းဆက်ချင်တဲ့သူတွေ အတွက် အသုံးဝင်ပါတယ်။ ကျနော်လို ဖုန်းပျောက်သွားရင် သုံးလို့ရတယ်”ဟု ကိုသက်ပိုင်က ဆိုသည်။

ရန်ကုန်မြို့တွင် အစိုးရ အများပြည်သူသုံးတယ်လီဖုန်း ဆိုင်ပေါင်း တစ်ထောင်ကျော်ရှိပြီး ဖုန်းဆိုင်များ၏ တရက်ဝင်ငွေမှာလည်း လျော့ကျသွားကြောင်း မြန်မာ့ဆက်သွယ်ရေးလုပ်ငန်း PCO ဖုန်းဋ္ဌာနမှူး ဦးဝင်းဆွေက ပြောသည်။ ”လျော့သွားတာတော့ မှန်တယ်။ ဒါပေမယ့် အရမ်းကြီး ထိုးကျသွားတာမျိုး မဟုတ်ပါဘူး”ဟု သူကဆိုသည်။

ရန်ကုန်မြို့ ဆူးလေးဘုရားလမ်းပေါ်မှ တယ်လီဖုန်းဆိုင်တွင် တစ်နှစ်ခွဲခန့် အလုပ်လုပ်နေသူ မြန်မာဆက်သွယ်ရေးဝန်ထမ်း ဒေါ်အေးအေးနိုင်ကလည်း ”အရင်က တရက်ကို ဖုန်းဘေလ် ၅၀၀၀ လောက်ဆောင်ရတာ အခုတရက်ကို ၃၀၀၀ လောက်ပဲဆောင်ရတော့တယ်။ အခုလိုအချိန်မှာတောင် သိပ်မသုံးတော့ရင် နောက်ပိုင်းမှာ လူပိုနည်းသွားနိုင်တယ်”ဟု ဆိုသည်။

ဒေါ်အေးအေးနိုင်ကိုယ်တိုင်ပင် နှစ်သိန်းတန်ဖုန်းကိုအစိုးရထံမှ အရစ်ကျစနစ်ဖြင့် ၀ယ်ယူခဲ့ရာ ကျပ် ၁၂၅၀၀၀ သွင်းပြီးနောက် ၁၅၀၀ တန် တန်ဖိုးနည်းဖုန်း ပေါ်ပေါက်လာသောအခါ ငွေဆက်သွင်းမှုကို ရပ်နားလိုက်ရသည်။

ရန်ကုန်မြို့တွင်း လမ်းမကြီးတစ်ခုပေါ်တွင် ပုဂ္ဂလိက တယ်လီဖုန်း ၀န်ဆောင်ပေးနေသူ ဒေါ်ငယ်ငယ်မှာ သူမ၏ CDMA 800 ဖုန်းကို တစ်မိနစ် ရေငွကျပ်တစ်ရာတောင်းကာ တစ်နေ့လျှင် သုံးသောင်းကျပ်အထိရရှိနေရာမှ ယခုအခါ တစ်သောင်းခန့်သာ ၀င်ငွေရှိတော့ကြောင်း ပြောသည်။ ”အရင်က ည ၁၂ နာရီလောက်အထိ ဖုန်းနှစ်ခု သုံးခုထားပြီးတော့ လုပ်ရတာ။ တစ်ရက်ကို သုံးသောင်းလောက်က အသာလေးရှာလို့ရတယ်။ အခုက ဖုန်းတစ်လုံးပဲ ထားရတော့တယ်”ဟု ဆိုသည်။

သို့သော် ဖုန်းလုပ်ငန်းမှ ရရှိသောဝင်ငွေနည်းလာသော်လည်း နိုင်ငံတကာကုမ္ပဏီများက တန်ဖိုးနည်းဖုန်းများချထားပေးမည် ဆိုပါက ကြိုဆိုကြောင်း၊ အခြားလုပ်ငန်းတစ်ခု ပြောင်းလုပ်ရန် အဆင်သင့်ရှိကြောင်း သူကဆိုသည်။

”နိုင်ငံတကာ ကုမ္ပဏီတွေဝင်လာလို့ ဒီလုပ်ငန်း မလုပ်ကြတော့ဘူးဆိုရင် တခြားလုပ်ငန်းပြောင်းလုပ်မယ်။ အခု အလှပြင်ဆိုင်တစ်ခုကို အပေါ်ထပ်မှာလည်း ဖွင့်ထားတော့ အဲဒီလုပ်ငန်းကိုပဲ ဆက်လုပ်တော့မယ်”ဟု ဒေါ်ငယ်ငယ်က ဆိုသည်။

ရန်ကုန်မြို့ ၃၅ လမ်းထိပ်တွင် ဆန်ဆိုင်နှင့် ဆက်သွယ်ရေး ဖုန်းအငှားဆိုင်တွဲဖွင့်ထားသူ ကိုဖိုးကျော်က ”ကျနော်ဖုန်းဆိုင်ရဲ့ ၀င်ငွေက တရက် ၃ထောင်ပဲ ရှိတယ်။ ဒါပေမဲ့ ကျနော်က ဒီနားမှာ ကိုယ့်ခင်ရာမင်ရာ ဈေးသည်တွေဆီဖုန်းလာတဲ့အခါ ခေါ်ပေးတယ်။ ဒီဖုန်းနဲ့ပဲေ ဈးစုံစမ်းတာတို့ ဘာတို့လုပ်တယ်။ အကျိုးအမြတ်အဓိက မဟုတ်ဘူး။ ဖုန်းခကိုလည်း ၃ မိနစ်ကို နှစ်ရာပဲ ယူတာ”ဟု ဆိုသည်။

တန်ဖိုးနည်းဖုန်းများ ပေါများလာပြီး လမ်းဘေးတယ်လီဖုန်းဆိုင်လေးများမှာ အရေအတွက် လျော့ကျသွား နိုင်သော်လည်း လုံးဝ ပျောက်ကွယ်သွားမည် မဟုတ်ဟု ရန်ကုန်မြို့ခံများက သုံးသပ်ကြသည်။

နိုင်ငံတကာ ကုမ္ပဏီများအနေဖြင့် မိုးဘိုင်းဖုန်းဆက်သွယ်ရေးလုပ်ငန်းများကို ဈေးနှုန်းသက်သာစွာ လာရောက်ရောင်းချပေးပါက အစိုးရ အများပြည်သူဖုန်းဆိုင်လေးများကို လျှော့ချရန် သင့်မသင့်ကို ဆက်သွယ်ရေးစာတိုက်နှင့် ကြေးနန်းဝန်ကြီးဋ္ဌာနက ဆုံးဖြတ်ရတော့မည်ဖြစ်သည်။
ထက်နိုင်ဇော်
ဧရာဝတီ

စစ်တပ် သိမ်းမြေများ ပြန်ပေးမည်

ရှမ်းပြည်နယ် တောင်ကြီးမြို့နယ်အတွင်းတွင် တပ်မြေအဖြစ် သိမ်းရန် ကျောက်တိုင် စိုက်ထူထားသော ပင်ငိုကျေးရွာ တောင်ယာဧက ၆၁၀ ဧကမှ တနေရာ (ဓာတ်ပုံ – ဧရာဝတီ)

June 28, 2013
အစိုးရ စစ်တပ်က အဓမ္မ သိမ်းယူထားသော မြန်မာနိုင်ငံ တ၀န်းမှ လယ်မြေများအား မူလပိုင်ရှင် လယ်သမားများထံ ပြန်လည် ပေး အပ်သွားမည် ဖြစ်ကြောင်း သိရသည်။

စစ်တပ်သည် ၎င်းတို့၏ တပ်နှင့်သက်ဆိုင်သည့် အဆောက်အအုံများ ဆောက်လုပ်ရန် သိမ်းယူထားသည့် မြေများမှအပ တခြား အကြောင်းအရာများဖြင့် သိမ်းယူထားသည့် လယ်ယာမြေ၊ နွားစားကျက်မြေ၊ မြေလွတ် မြေရိုင်းများ စသည်ဖြင့် အဓမ္မ သိမ်းယူ ထားသည့် လယ်မြေများကို ပြန်ပေးနိုင်ရန် စစ်တပ်ခေါင်းဆောင်များက စီစဉ်နေကြောင်း စစ်တပ်နှင့်နီးစပ်သူ တချို့က ဧရာဝတီ ကို ပြောသည်။

“စစ်တပ်က သိမ်းထားတဲ့ လယ်မြေတွေအထဲက ဘာအဆောက်အအုံမှ မဆောက်တဲ့ မြေတွေ အကုန်လုံးပြန်ပေးမယ်၊ မဖြစ်မနေ သိမ်းထားတာတွေကိုလည်း တန်ရာတန်ကြေး လျော်ကြေးပေးသွားမယ်လို့ သိရတယ်၊ ဘယ်အချိန် ပြန်ပေးမယ်ဆိုတာတော့ မသိရ သေးဘူး”ဟု စစ်တပ်နှင့်နီးစပ်သူ တဦးက ပြောသည်။

တပ်မတော်အစိုးရ လက်ထက်တွင် အကြောင်း အမျိုးမျိုးကြောင့် သိမ်းယူထားသော လယ်ယာမြေများ အနက် တပ်မတော် အတွက် အမှန်တကယ် မလိုအပ်သည့် လယ်မြေများကို အခကြေးငွေ မယူဘဲ မူလပိုင်ရှင် လယ်သမားများကို လုပ်ကိုင်ခွင့် ပေးရန် ကာကွယ်ရေးဦးစီးချုပ်က ညွှန်ကြားထားသည် ဟု တွဲဖက် စစ်ထောက်ချုပ် ဗိုလ်ချုပ်မင်းနိုင်က  ပြည်ထောင်စု လွှတ်တော်၏ လယ်ယာမြေနှင့်အခြားမြေများ သိမ်းဆည်းခံရမှု စုံစမ်းစစ်ဆေးရေး ကော်မရှင် အဖွဲ့ဝင်များ နှင့်ဖေဖော်ဝါရီလ အတွင်းတွေ့ဆုံခဲ့စဉ် က ပြော ဆို ခဲ့ဖူးသေးသည်။

မြန်မာနိုင်ငံ တ၀န်းရှိ စစ်တပ်တခုတည်းက အဓမ္မ သိမ်းယူထားသည့် လယ်မြေဧကပေါင်း ၂ သိန်းကျော် (၂၄၇၀၇၇ ဒသမ ၀၆ ဧက) ရှိကြောင်း ပြည်ထောင်စု လွှတ်တော်၏ လယ်ယာမြေနှင့် အခြားမြေများ သိမ်းဆည်းခံရမှု စုံစမ်းစစ်ဆေးရေး ကော်မရှင်က ထုတ်ပြန်ထားသည်။

တပ်မတော်သည် လယ်မြေဧက ၁၉၀၀၀ ဒသမ ၅၁၉ ဧက သိမ်းယူထားပြီး ဧကပေါင်း ၄၃၁ ဧက အတွက် ကျပ်သန်းပေါင်း ၉၉၉ ဒသမ ၂၅ သန်းကို ၂၀၁၂ ခုနှစ် အတွင်း လျော်ကြေး ပေးခဲ့ကြောင်းလည်း ဗိုလ်ချုပ်မင်းနိုင် က ကော်မရှင်နှင့်တွေ့စဉ် ပြောဆိုခဲ့သည်။

စစ်တပ်အတွက် အသုံးမပြုသည့် လယ်ယာမြေများကို ပြန်ပေးမည်ဆိုသည့်အတွက် ကြိုဆိုကြောင်း၊ သို့သော်လက်တွေ့ ပေးရန် အရေးကြီးကြောင်း ရခိုင်ပြည်နယ်၏ လယ်ယာမြေ စုံစမ်းရေး ကော်မရှင် အဖွဲ့ဝင် ပြည်သူ့ လွှတ်တော် ကိုယ်စားလှယ် ဦးဖေသန်းက ဧရာဝတီ ကို ပြောသည်။

“ကျနော်တို့ ရခိုင်ဒေသမှာ စစ်တပ်က သိမ်းထားတာ ဧက သောင်းဂဏန်းနဲ့အထက်ရှိတယ်၊ တိုင်ထားတဲ့ အမှုပေါင်း ၂၀၀ ၀န်းကျင် ကို ကော်မရှင် အဖွဲ့ဝင်တွေ စစ်ဆေးနေတာ နှစ်ချီရှိပါပြီ၊ လယ်သမားတွေ လက်ထဲ အမှန်တကယ် ရောက်တာဆိုလို့ သုံးလေးမှုပဲ ရှိသေးတယ်”ဟု ၎င်းက ဆိုသည်။

လယ်ယာမြေ သိမ်းဆည်းခံရမှုနှင့်ပတ်သက်၍ လွှတ်တော်က ဖွဲ့စည်းထားသော ကော်မရှင်၊ ကော်မတီများ၏ ဆောင်ရွက်မှု သည် ထိရောက်မှု မရှိကြောင်း၊ ထိုအဖွဲ့အစည်းများ၏ စုံစမ်းစစ်ဆေးမှု ရလဒ်ကို တာဝန်ယူဖြေရှင်းပေးရမည့်သူသည် အစိုးရ သာဖြစ်ကြောင်း၊ သို့သော် သက်ဆိုင်ရာ အစိုးရ ၀န်ကြီးဌာနများ အနေဖြင့် ထိရောက်မြန်ဆန်သည့် အလေးထား ဆောင်ရွက်ပေးမှု မရှိကြောင်း သိရသည်။
“အစိုးရ ကိုယ်တိုင်ဖွဲ့တဲ့ ကော်မတီ၊ ကော်မရှင်တွေဟာ လွှတ်တော်က ဖွဲ့တဲ့ အဖွဲ့တွေထက် ပိုပြီးထိရောက်နေတာ တွေ့တယ်၊ ကျနော်တို့ လုပ်တာကို အစိုးရက လုပ်ပေးမှ ရတာဆိုတော့ လယ်သိမ်းမှုတွေ ဖြေရှင်းပေးတာဟာ ထင်သလောက် ခရီးမ ပေါက်ဘူး”ဟု ဦးဖေသန်း က ဆိုသည်။

စစ်တပ်သည် ၎င်းတို့၏ စစ်တပ်အဆောက်အအုံများ ဆောက်လုပ်ရန်နှင့်တပ်တွင်း တနိုင်တပိုင် စိုက်ပျိုးရေး၊ မွေးမြူရေး စသည့် လုပ်ငန်းများအတွက် သိမ်းထားသည့် လယ်မြေများအပြင် အကြောင်းပြချက် တစုံတရာ မရှိဘဲ သိမ်းယူထားသည့် လယ်မြေ ဧက ထောင်ပေါင်းများစွာ ရှိကြောင်း သိရသည်။

မွန်ပြည်နယ်တွင်လည်း ရာဘာခြံများ၊ လယ်မြေများ၊ နွားစားကျက်မြေများ စသည်ဖြင့် ဧကပေါင်းများစွာကို စစ်တပ်က သိမ်းယူ ထားကြောင်း မွန်ဒေသလုံးဆိုင်ရာ ဒီမိုကရေစီပါတီ၏ ဥက္ကဋ္ဌ ဦးနိုင်ငွေသိန်း က ဧရာဝတီ ကို ပြောသည်။

စစ်တပ် အပြင် မြို့ရွာဖွံ့ဖြိုးမှုအတွက်ဟုဆိုကာ သိမ်းယူထားသည့် လယ်မြေဧကမှာ ၁ သိန်းကျော် (၁၁၇၈၃၄ ဒသမ ၁၉ ဧက) ရှိကြောင်း ပြည်ထောင်စု လွှတ်တော်၏ လယ်ယာမြေ စုံစမ်းစစ်ဆေးရေး ကော်မရှင်က ထုတ်ပြန်ထားသည်။
ခင်ဦးသာ
ဧရာဝတီ